சென்னை: கடந்த 2021 தமிழ்நாடு சட்டப்பேரவைத் தேர்தலில், 10 ஆண்டுகளுக்குப் பிறகு திமுக வென்றதன் மூலம் மு.க.ஸ்டாலின் முதலமைச்சராக பதவியேற்றார். அதற்குப் பிறகு ஈரோடு கிழக்கு இடைத்தேர்தலில் திமுக கூட்டணியான காங்கிரஸ் வேட்பாளர் ஈவிகேஎஸ் இளங்கோவன் அமோக வெற்றி பெற்றார்.
இதனையடுத்து, திமுக தலைமையிலான இந்தியா கூட்டணி தமிழகத்தில் 2024 மக்களவைத் தேர்தலில் களம் கண்டது. இதிலும், தமிழகம் மற்றும் புதுச்சேரியில் திமுக மற்றும் கூட்டணிக் கட்சிகள் 40க்கு 40 தொகுதிகளிலும் வெற்றி பெற்று சாதனை படைத்தன. முன்னதாக, 2019 மக்களவைத் தேர்தலில் தேனி தொகுதி மட்டும் அதிமுகவுக்கு கிடைத்த நிலையில், தற்போது அந்த தொகுதியும் திமுகவசம் உள்ளது.
2026 சட்டமன்றத் தேர்தலை எதிர்கொள்ளும் பொருட்டு " ஒருங்கிணைப்புக் குழு" அமைத்து கழக தலைவர், மாண்புமிகு முதலமைச்சர் திரு @mkstalin அவர்கள் அறிவிப்பு! pic.twitter.com/QuOzDpNfFD
— DMK (@arivalayam) July 20, 2024
இதனைத் தொடர்ந்து, விக்கிரவாண்டி இடைத்தேர்தலில் திமுக - பாமக - நாதக என மும்முனைப் போட்டி நிலவியது. இதிலும், 67 ஆயிரத்துக்கும் அதிகமான வாக்குகள் வித்தியாசத்தில் திமுக வேட்பாளர் அன்னியூர் சிவா அமோக வெற்றி பெற்றார். இந்த நிலையில், 2026 சட்டமன்றத் தேர்தலுக்கும் திமுக ஆயத்தம் ஆகி வருகிறது.
அந்த வகையில், 2026 சட்டமன்றத் தேர்தலுக்கான ஒருங்கிணைப்புக் குழுவை நியமித்து முதலமைச்சர் மு.க.ஸ்டாலின் உத்தரவிட்டுள்ளார். இது தொடர்பாக அக்கட்சியின் தலைவர் ஸ்டாலின் அறிவித்துள்ளதாக திமுக வெளியிட்டுள்ள அறிக்கையில், “2024 நாடாளுமன்றத் தேர்தலுக்கு முன்பாக கட்சிப் பணிகளை ஒருங்கிணைக்கவும், மேற்பார்வையிடவும் அமைக்கப்பட்ட ஒருங்கிணைப்புக்குழு தனது பணிகளை மிகச் சிறப்பாக செய்தது.
அதே வகையில், வரவிருக்கும் 2026 சட்டமன்றத் தேர்தலை எதிர்கொள்ளும் பொருட்டு, திமுகவில் மேற்கொள்ள வேண்டிய மாறுதல்கள், அமைப்பு ரீதியான சீரமைப்புகளை திமுக தலைவருக்கும், கட்சித் தலைமைக்கும் பரிந்துரைக்கவும், தேவையான நடவடிக்கைகளை மேற்கொள்ளவும் ‘ஒருங்கிணைப்புக்குழு’ பின்வருமாறு அமைக்கப்படுகிறது.
அதன்படி, இந்த ஒருங்கிணைப்புக் குழுவில், கே.என்.நேரு, ஆர்.எஸ்.பாரதி, எ.வ.வேலு, தங்கம் தென்னரசு மற்றும் உதயநிதி ஸ்டாலின் ஆகியோர் உள்ளனர்” என தெரிவிக்கப்பட்டுள்ளது.
இதையும் படிங்க: துணை முதலமைச்சர் பதவியா? - அமைச்சர் உதயநிதி பளீச் பதில்
