சென்னை: தமிழக சட்டமன்ற கூட்டத்தொடரில் இன்று கீழ் பென்னாத்தூர் தொகுதி கடம்பை பகுதியில் தகவல் தொழில் நுட்ப பூங்கா அமைக்க அரசு ஆவன செய்யுமா? என்று கீழ் பென்னாத்தூர் தொகுதி சட்டமன்ற உறுப்பினர் கு.பிச்சாண்டியின் கேள்விக்கு பதிலளித்த அமைச்சர் பழனிவேல் தியாகராஜன், ''கீழ்பெண்ணாத்தூர் பகுதியில் 50 ஏக்கர் அரசு நிலத்தில் தற்போது எல்காட் பூங்கா அமைக்கும் பணி திட்டத்தில் இல்லை. ஓசூரில் உள்ள எல்காட் அதிக பணிகள் நடைபெற்று வருகின்றன'' என்றார்.
மேலும், கீழ்பெண்ணாத்தூரில் இருந்து சென்னையும், ஓசுரும் அருகில் இருப்பதாக சொன்னார்கள், அங்கெல்லாம் இடம் கிடைக்காது.. இங்கு அரசு புறம்போக்கு இடம் 100 ஏக்கருக்கு மேல் உள்ளது, இங்கு கட்டினால் உதவியாக இருக்கும் என்பதற்கு பதிலளித்த அமைச்சர் பி.டி.ஆர் பழனிவேல் தியாகராஜன், ''நிலம் கிடைப்பது கடினமானது தான் உண்மைதான். குறுகிய காலத்தில் வேலை உருவாக்கப்படும் ஆனால், நிதி ஒதுக்கீடுகள் ஏற்ப தான் பணி செய்ய முடியும். இந்த நிதியாண்டு 119 கோடி தான் தகவல் தொழில் நுட்ப துறைக்கு ஒதுக்கப்பட்டுள்ளது. ஆண்டுக்கு நூறு கோடி ஒதுக்கப்படும் பொழுது ஓர் அளவுக்கு தான் செயல்படுத்த முடியும். நிதி குறைவாக இருந்தும் சிறப்பாக செயலாற்றி வருகிறோம் அதற்கு நம் தமிழகத்தில் சிறப்பான ஐ.டி துறை சிறந்த வல்லுனர்கள் இருப்பது தான் காரணம்'' என்றார்.
தொடர்ந்து, சாப்ட்வேர் ஏற்றுமதியில் இந்தியாவில் தமிழகம் எத்தனையாவது இடத்தில் உள்ளது. எவ்வளவு மதிப்புள்ள சாப்வேர்கள் ஏற்றுமதி செய்யப்பட்டது என்று சட்டமன்ற உறுப்பினர் கு.பிச்சாண்டி கேட்க, அப்போது குறுக்கிட்ட அமைச்சர் துரைமுருகன், ''இப்போது தெரிகிறதா? நீங்கள் நிதி துறையில் இருக்கும் போது இப்படி தான் நிதி ஒதுக்கினீர்கள்'' என்றார்.
அமைச்சர் துரைமுருகனைத் தொடர்ந்து பேசிய பி.டி.ஆர் பழனிவேல் தியாகராஜன், ''அன்று நான் நிதித்துறை அமைச்சராக இருந்த போதும் இந்த துறைக்கு இவ்வளவு தான் நிதி ஒதுக்கினோம். அரசு நான் நிதி அமைச்சராக இருக்கும் போது, அதிகமாக நிதி ஒதுக்கியதாகவும், இப்போது குறைவு என்று சொல்லவில்லை. செயல்முறையை மாற்றினால் தான் நோக்கத்தை அடைய முடியும். நிதி மூன்றாவது பட்சம் தான். என்னை பொறுத்தவரை முதலமைச்சரின் ஆதரவும், ஊக்கமும் இருந்தால் அதை வைத்து என்ன வேண்டுமானாலும் செய்யலாம்'' என கூறினார்.
மேலும் ''நிதி துறையில் இரண்டு ஆண்டுகள் இருந்த போது 20 ஆண்டுகளில் செய்யாத மாற்றத்தை இரண்டு ஆண்டுகளில் செய்தேன் என்று கூறுவேன். ஐ.டி துறையில் ஏற்கனவே அறிவிக்கப்பட்டுள்ள பல மாற்றங்களுக்கு உட்பட்டு கூடுதல் செயல் முறைகளை மாற்றி இதுவரை இல்லாத வகையில் 20 ஆண்டுகள் பின் தங்கி இருந்ததை சீர்திருத்தி செயல்படுத்துவோம்''.
''மனித வளம் இங்கு மட்டும் இல்லை. சிலிக்கான் வேலி (silicon valley) என்று சொல்லப்படும் ஐ.டி துறையின் innovation hub இல் தமிழர்கள் முதலிடத்தில் உள்ளார்கள். அடுத்த வாரம் நான் அங்கு செல்கிறேன். என்னை பார்ப்பதற்கு இரண்டு நாளில் 100 தமிழர்கள் விண்ணப்பித்து உள்ளார்கள். நிதியை ஒரு பொருட்டாக இல்லாமல் அதற்கு மேல் வளர்ச்சி திட்டத்தை உருவாக்க முயற்சி எடுத்து வருகிறோம். 20 ஆண்டுகள் பின்தங்கியிருந்ததை இன்னும் ஓராண்டில் மாற்றி காட்டுவேன் '' என கூறினார்.
அதனை தொடர்ந்து பேசிய சட்ட பேரவை தலைவர் அப்பாவு '' நிதி மற்ற மாநிலத்தை விட குறைவாக இருந்தாலும், தனியார் நிறுவனங்கள் மூலம் கட்டமைப்பை முதலமைச்சர் உருவாக்கியதால் அதற்கான வாய்ப்பு உள்ளது'' என்றார்.
இதையும் படிங்க: கொடநாடு வழக்கு; 8 ஆயிரம் பக்கம் அறிக்கை, 'வெளிநாட்டு செல்போன் அழைப்பு'
