திண்டுக்கல்: திண்டுக்கல் மாவட்டத்தில் பல்வேறு நலத்திட்ட உதவிகள் வழங்கும் விழாவில் கலந்து கொண்ட ஊரக வளர்ச்சி மற்றும் ஊராட்சித் துறை அமைச்சர் ஐ.பெரியசாமி செய்தியாளர்களைச் சந்தித்துப் பேசினார். அப்போது, "நிறைய பேர் அரசியலுக்கு வந்திருக்கிறார்கள். 1973-ல் எம்ஜிஆரையே பார்த்துவிட்டு தான் திமுக வந்திருக்கிறது. திமுக பனங்காட்டு நரி, யாருக்கும் அஞ்சாது. எல்லா அரசியல் போராட்டங்களையும் சந்தித்த ஒரே இயக்கம் திராவிட முன்னேற்றக் கழகம்.
75 ஆண்டுகளைக் கடந்து வந்திருக்கிறோம், இப்பொழுது சொல்கிறேன், இன்னும் 100 ஆண்டுகள் ஆனாலும் இந்த இயக்கம் மக்களுக்காக உழைக்கக்கூடிய இயக்கமாக மற்றும் மக்களுக்காக போராடக்கூடிய தலைவர்களைக் கொண்ட இயக்கமாக திமுக இருக்கும்.
அரசியலில் யார் வேண்டுமானாலும் வரலாம் சந்தோசம், மகிழ்ச்சி. ஒருவர் புதிதாக அரசியல் கட்சி தொடங்குவதால் எங்களுக்கு கஷ்டம் வரப்போவதில்லை. எங்களுக்கு எங்கள் மீது நம்பிக்கை இருக்கிறது. மக்கள் எங்களது பக்கம் இருக்கிறார்கள். எங்களது பணி தொய்வில்லாமல் இன்னும் வேகமாக நடக்கும்.
பெரியாரின் திராவிட மாடலையும், ஒரு காலத்தில் காங்கிரஸ், காமராஜர் மற்றும் அப்போது இருந்த தலைவர்கள் அனைவரும் சோசியலிசத்தையும் பேசினார்கள். இதை குறையாக கூறவில்லை. ஆனால், அவர்கள் சமத்துவம் என்ற சோசியலிசத்தை நாடு சுதந்திரம் அடைந்த பின்னால் கொண்டு வருவோம் எனக் கூறினார்கள். தற்போது வரை மக்களின் வாழ்க்கைத் தரம் உயரவில்லை.
இதையும் படிங்க: "ஆட்சியில் பங்கு" விஜயின் அரசியல் அணுகுண்டு : வேலை செய்யுமா?
ஆனால் தற்போது, புதுமை பெண் திட்டம் மற்றும் தமிழ் புதல்வன் திட்டம் என பல திட்டங்கள் மூலம் 2 கோடி பேர் பயன் அடைகின்றனர். இதன் மூலம் மக்களின் பொருளாதாரம், வாழ்க்கைத் தரம் உயர்கிறது. கிராமப் பொருளாதாரமும் உயர்ந்துள்ளது. இதற்கு அடித்தளம் தமிழ்நாட்டின் முதலமைச்சர் தான். ஆகவே, திராவிட மாடல் ஆட்சிக்கு முழு உருவம் கொடுத்தவர் இன்றைய முதலமைச்சர் தான்" என்று தெரிவித்தார்.
இதன் தொடர்ச்சியாக, கூட்டணியில் பங்கீடு குறித்து விஜய் பேசியதற்கு விசிக ஆதரவு தெரிவித்துள்ளது பற்றிய செய்தியாளர்களின் கேள்விக்கு, "எங்களது கொள்கைகளை ஏற்றுக் கொண்டவர்கள் கூட்டணியில் ஒற்றைக் கொள்கையுடன் இருக்கிறார்கள். பதவி என்பதை கூட்டணியில் இருப்பவர்கள் விரும்பவில்லை என்பதே எனது கருத்து.
தனித்து தான் திமுக ஆட்சிக்கு வந்துள்ளது. தமிழ்நாட்டில் இதுவரை 7 முறை ஆட்சி அமைத்துள்ளோம். ஆனால், ஒருபோதும் கூட்டணி ஆட்சி என்று இருந்ததில்லை. ஆனால் வருங்காலங்களில் எங்களது கட்சியின் தலைவர் கொள்கை திட்டங்களை அறிவிப்பார். அதற்கு ஏற்றார் போல் தேர்தல் களம் அமையும்" என்று பதிலளித்தார்.
ஈடிவி பாரத் வாட்ஸ்அப் சேனலில் இணைய இங்கே கிளிக் செய்யவும்
