சென்னை: வங்கதேசத்தில் இடஒதுக்கீடு தொடர்பாக போராட்டம் மற்றும் கலவரம் நடந்து வருகிறது. இதனால், உயர் கல்விக்காக வங்கதேசம் சென்றிருந்த, தமிழ்நாட்டைச் சேர்ந்த மாணவ மாணவிகள் அங்கு சிக்கித் தவிக்கும் நிலை ஏற்பட்டுள்ளது. இதையடுத்து தமிழ்நாடு முதலமைச்சர் மு.க.ஸ்டாலின் உத்தரவின் பெயரில், தமிழர் நலன் மற்றும் அயல் நாடுகளில் வாழும் தமிழர்களின் மறுவாழ்வு ஆணையரகம், வங்கதேசத்தில் உள்ள இந்திய தூதரகத்துடன் இணைந்து மீட்புப் பணியில் ஈடுபட்டது.
அதன்படி, இந்திய எல்லை அருகே உள்ள நகரங்களில் படிக்கும் மாணவ-மாணவிகள் தூதரக அதிகாரிகள் முலம் இந்திய எல்லைக்கு அழைத்து வரப்படுகின்றனர். பின்னர் அங்கிருந்து அவர்களின் சொந்த மாநிலங்களுக்கு அனுப்பி வைக்கப்படுகின்றனர்.
இதற்காக சிறப்பு வாட்ஸ் அப் குழு ஒன்று உருவாக்கப்பட்டு அந்த குழுக்கள் மூலம், வங்கதேசத்தில் சிக்கித் தவிக்கும் தமிழ்நாடு மாணவ மாணவிகளை ஒருங்கிணைத்து, முதற்கட்டமாக நேற்று 49 மாணவ மாணவிகள் வங்கதேசத்தில் இருந்து பத்திரமாக மீட்கப்பட்டனர்.
இந்நிலையில், இரண்டாவது நாளாக, கிருஷ்ணகிரி, கடலூர், தர்மபுரி, தஞ்சாவூர், சேலம், வேலூர், ராணிப்பேட்டை, மதுரை, விருதுநகர், ஈரோடு, விழுப்புரம், தென்காசி, திருவண்ணாமலை, தூத்துக்குடி, மயிலாடுதுறை, திருவள்ளூர், காஞ்சிபுரம், சென்னை ஆகிய மாவட்டத்தை சேர்ந்த 82 மாணவர்கள் கொல்கத்தா, கவுகாத்தி, அகர்தலா ஆகிய பகுதிகளின் விமான நிலையங்களில் இருந்து தமிழ்நாடு அரசு செலவில் விமானம் முலம் சென்னை வந்தனர்.
சென்னை விமான நிலையம் வந்த மாணவர்களை சிறுபான்மையினர் நலன் மற்றும் வெளிநாடு வாழ் தமிழர் நலத்துறை அமைச்சர் செஞ்சி மஸ்தான், அயலகத் தமிழர் நலத்துறை கமிஷனர் கிருஷ்ணமூர்த்தி, துணை கமிஷனர் ரமேஷ் ஆகியோர் வரவேற்றனர். பின்னர் அனைவரையும் அவர்களது சொந்த ஊர்களுக்கு வாகனங்கள் முலம் அனுப்பி வைக்கப்பட்டனர்.
முன்னதாக செய்தியாளரைச் சந்தித்து பேசிய அமைச்சர் செஞ்சி மஸ்தான், “வங்கதேசத்தில் பதற்றமான சூல்நிலை நிலவி வருவதால், தமிழ்நாட்டில் இருந்து வங்கதேசம் சென்ற மாணவர்களை தமிழ்நாடு முதலமைச்சர் உத்தரவின் பேரில் மீட்கும் பணி நடந்து வருகிறது. அவர்கள் கல்வி தடைப்பட்டு வரவில்லை. போராட்டம் காரணமாக வந்துள்ளனர். வங்கதேசத்தில் இயல்புநிலை திரும்பியதும் மீண்டும் அவர்கள் படிக்க செல்லக்கூடும். மாணவர்களை பாதுகாப்பாக வைத்து கொள்ள வேண்டும் என தூதரகம் மூலம் கல்லூரிகளுக்கு தகவல் தரப்பட்டு உள்ளது” என்றார்.
சென்னை திரும்பிய விழுப்புரம் மாவட்டம் செஞ்சி மாணவர் நிதிஷ் கண்ணா கூறுகையில், “வங்கதேசத்தில் இருந்து எல்லை கடந்து வந்துள்ளோம். விமான கட்டணங்கள் அதிகமாக இருந்ததால் எப்படி சென்னை வருவது என தெரியாமல் இருந்தோம். தமிழக அரசின் உதவி மையத்திற்கு தொடர்பு கொண்டதும் விமான டிக்கெட் வழங்கினார்கள். உணவு உள்ளிட்ட அனைத்து வசதிகளையும் தமிழக அரசு வழங்கியுள்ளது” என்றார்.
சேலத்தை சேர்ந்த மாணவி ஜனனி பிரியா கூறுகையில், "வங்கதேசத்தில் 2ஆம் ஆண்டு மருத்துவ மாணவியாக படித்து வருகிறோம். எங்கள் கல்லூரிக்குள் எந்தவித பிரச்சனையும் இல்லை. ஆனால், கல்லூரியை சுற்றி போராட்டங்கள் நடந்தது. கல்லூரி விடுதியில் பாதுகாப்பாக இருந்தோம். எல்லையை கடந்த பின்னர் தான் இணையதள வசதி கிடைத்தது. உணவு, டிக்கெட் வசதி செய்து தந்த தமிழக அரசுக்கு நன்றியை தெரிவித்து கொள்கிறோம்” என்றார்.
ஈடிவி பாரத் தமிழ் வாட்ஸ்ஆப் சேனலில் இணைய இங்கே கிளிக் செய்யவும்
இதையும் படிங்க: வங்கதேச கலவரத்தில் சிக்கித் தவித்த தமிழக மாணவர்கள் 49 பேர் மீட்பு- அமைச்சர் செஞ்சி மஸ்தான்!
