ஹைதராபாத்: ரசிகர்களால் கொண்டாடப்பட்டு வரும் ஐபிஎல் தொடரின் 17வது சீசன் தற்போது கடைசி கட்டத்தை எட்டியுள்ளது. இத்தொடரின் பிளே ஆஃப் சுற்று நாளை மறுநாள் (செவ்வாய்கிழமை) அகமதாபாத் நரேந்திர மோடி மைதானத்தில் நடைபெறுகிறது. இதற்கு கொல்கத்தா, ராஜஸ்தான், ஹைதராபாத், பெங்களூரு அணிகள் தகுதி பெற்றுள்ளன.
இந்த நிலையில், இன்றுடன் இத்தொடரின் லீக் ஆட்டங்கள் நிறைவடையும் பட்சத்தில், இன்று மாலை ஹைதராபாத் ராஜீவ் காந்தி மைதானத்தில் நடைபெற்று வரும் போட்டியில் சன்ரைசர்ஸ் ஹைதராபாத் அணியும், பஞ்சாப் கிங்ஸ் அணியும் மோதி வருகின்றன.
இப்போட்டியில் டாஸ் வென்ற பஞ்சாப் அணியே முதலில் பேட்டிங் செய்தது. அந்த அணியின் தொடக்க வீரர்களாக பிரப்சிம்ரன் சிங் மற்றும் அதர்வ தைடே களம் இறங்கினர். எளிதில் இந்த கூட்டணியை வீழ்த்திவிடலாம் என நினைத்த ஹைதராபாத் அணிக்கு ஏமாற்றமே மிஞ்சியது.
ஹைதராபாத்தின் பந்து வீச்சை இந்த கூட்டணி விளாசியது. குறிப்பாக, 97 ரன்கள் அடித்த பின்பே முதல் விக்கெட்டை விட்டுக் கொடுத்தது இந்த கூட்டணி. இருவரும் சிறப்பாக விளையாடினர். தைடே 46 ரன்களில் நடராஜன் பந்து வீச்சில் ஆட்டமிழந்தார். அதனைத் தொடர்ந்து, அரைசதம் விளாசிய பிரப்சிம்ரன் சிங் 71 ரன்களுடன் ஆட்டமிழந்தார்.
அதன்பின் ரிலீ ரோசோவ் உடன் கைகோர்த்த சசாங் சிங், எதிர்பாராத விதமாக ரன் அவுட் ஆனார். அவர் 4 பந்துகளில் 2 ரன்கள் எடுத்த நிலையில், நிதீஷ் ரெட்டி பீல்டிங்கில் ரன் அவுட் ஆனார். பின்னர் நல்ல ஆட்டத்தை வெளிப்படுத்தி வந்த ரோசோவ் 49 ரன்களில் அவுட் ஆனார்.
தொடர்ந்து விளையாடிய பஞ்சாப் கிங்ஸ் அணி 20 ஓவர்கள் முடிவில் 5 விக்கெட்கள் இழப்பிற்கு 214 ரன்கள் குவித்துள்ளது. சன்ரைசர்ஸ் ஹைதராபாத் அணி சார்பில் நடராஜன் 2 விக்கெட்களும், பேட் கம்மின்ஸ் மற்றும் விஜயகாந்த் வியாஸ்காந்த் ஆகியோர் தலா 1 விக்கெட்டை கைப்பற்றினர்.
இதனைத் தொடர்ந்து, சன்ரைசர்ஸ் ஹைதராபாத் அணி 215 ரன்கள் எடுத்தால் வெற்றி என்ற இலக்குடன் விளையாடி வருகிறது. மேலும், இப்போட்டியில் ஹைதராபாத் அணி வெற்றி பெறும்பட்சத்தில், இரண்டாவது இடத்திற்கு முன்னேறும் வாய்ப்பு உள்ளது. ஒருவேளை தோல்வி அடைந்தால், தற்போது உள்ள அதே 3வது இடத்தில் இருக்கும். அதனைத் தொடர்ந்து, எலிமினேட்டரில் பெங்களூரு அணியை எதிர்கொள்ளும்.
இதையும் படிங்க: ஐபிஎல் அணிகளுக்கு வருமானம் எப்படி வருகிறது? - Ipl Money Making
