அயோத்தி : உத்தர பிரதேசம் மாநிலம் அயோத்தியில் பிரம்மாண்ட பொருட்செலவில் கட்டப்பட்டு வரும் ராமர் கோயிலின் கும்பாபிஷேகம் கடந்த ஜன.22ஆம் தேதி நடைபெற்றது. இதனையடுத்து கர்நாடக சிற்பி வடிவமைத்த ராம் லாலா எனப்படும் குழந்தை வடிவ ராமர் சிலை கோயில் கருவறையில் நிறுவப்பட்டது. இதற்காக நடைபெற்ற சிறப்பு பூஜையில் பிரதமர் மோடி கலந்து கொண்டு சாமி தரிசனம் செய்தார்.
இந்நிலையில் ராமர் சிலையில் தலை தொடங்கி பாதம் வரை அணிவிக்கப்பட்டு இருந்த நகைகள் பக்தர்களை வெகுவாக கவர்ந்தது. குறிப்பாக ராமரின் தலையில் அணிவிக்கப்பட்டு இருந்த தங்க கீரிடம், காந்தா என்று அழைக்கப்படும் கழுத்தணி, மோதிரங்கள், வெள்ளி சிவப்பு திலகம் என அணியப்பட்டு இருந்த அனைத்து ஆபரணங்களும் பக்தர்களின் கவனத்தை ஈர்த்தன.
இந்த நிலையில், அயோத்தி ராமர் கோயிலுக்கு பலரும் நன்கொடை அளித்து வரும் நிலையில், குஜராத் மாநிலம் சூரத்தைச் சேர்ந்த வைர வியாபாரி முகேஷ் படேல், 11 கோடி ரூபாய் மதிப்புள்ள கிரீடத்தை காணிக்கையாக அளித்துள்ளார். இந்த கிரீடம் 6 கிலோ எடை கொண்டதாகும், இந்த கிரீடம் நான்கரை கிலோ தங்கத்தை பயன்படுத்தித் தயாரிக்கப்பட்டுள்ளது.
மேலும் வைரம், முத்து, மாணிக்கம், நீலமணி போன்ற பெரிய கற்கள் இந்த கிரீடத்தில் பதிக்கப்பட்டு உள்ளன. இந்த கிரீடத்தை உருவாக்க, அந்நிறுவன ஊழியர்கள் இருவர் குஜராத்தில் இருந்து சிறப்பு விமானம் மூலம் அயோத்தியை வந்தடைந்தனர். பின்னர் ராம் லாலா சிலையின் அளவீடுகள் குறித்து தகவல்களை சேகரித்த பின்னர் மீண்டும் சூரத் சென்று இந்த கீரிடத்தை தயாரித்து உள்ளனர்.
இது குறித்து குஜராத் மாநிலத்தை சேர்ந்த வைர வியாபாரி முகேஷ் படேல் கூறுகையில் "இத்தனை ஆண்டுகளாக ராமர் தனக்கு தேவையான செல்வத்தைக் கொடுத்தார். அவருக்காக ஏதேனும் செய்ய வேண்டும் என்று பல நாள்கள் காத்து இருந்தேன் அதற்கான நேரம் தற்போது வந்துவிட்டது. அயோத்தியில் கட்டப்பட்டுள்ள ராமர் கோயிலுக்கு சென்று சாமி தரிசனம் செய்தேன். அது ஒரு அற்புதமான தருணம்" என்று தெரிவித்தார்.
இதையும் படிங்க: "தீய சக்தியை அழிக்கும் குறிக்கோளோடு வேலை செய்கிறேன் - விஜய் உட்பட யாரும் அரசியலுக்கு வரலாம்" - அண்ணாமலை!
