நாம் அன்றாடம் பயன்படுத்தும் மஞ்சள், அதன் கிருமி நாசினி பண்பிற்காக இயற்கை மற்றும் ஆயுர்வேத மருத்துவத்தில் முக்கிய பங்கு வகிக்கிறது. ஆனால், தற்போது சந்தைகளில் விற்கப்படும் மஞ்சள் தூள் மற்றும் விரலி மஞ்சள் கிழங்கில் ’லெட் குரோமேட்’ ரசாயனம் கலக்கப்படுவதாக தகவல் வெளியாகியுள்ளது.
மஞ்சளின் ஆரோக்கிய நன்மைக்காக அனைவரும் அதிகளவில் பயன்படுத்தி வரும் நிலையில் இந்த செய்தி மக்களை அச்சத்தில ஆழ்த்தியுள்ளது. இந்நிலையில், சுத்தமான மஞ்சள் கிழங்கு வாங்கி எப்படி வீட்டிலேயே மஞ்சள் தூள் அரைப்பது என்பதை தெரிந்து கொள்ளலாம்..
மஞ்சள் தூள் அரைப்பது எப்படி?:
- கடையில் இருந்து வாங்கி வந்த விரலி மஞ்சள் கிழங்குகளை ஒரு பாத்திரத்திற்கு மாற்றி அதில் உள்ள குச்சி, தூசி போன்றவற்றை நீக்கி கொள்ளுங்கள்.
- பின்னர், மஞ்சள் கிழங்கு மூழ்கிற அளவிற்கு தண்ணீர் ஊற்றி, கிழங்கை சுற்றியுள்ள மஞ்சள் தூளை கழுவி, வடிகட்டி எடுத்துக்கொள்ளுங்கள்.
- இப்போது, தாம்பூலம் அல்லது ஒரு துணியில், நாம் கழுவி வைத்த மஞ்சள் கிழங்குகளை பரப்பி வெயிலில் காயவைக்கவும். வெயில் இல்லையென்றால், ஃபேனிற்கு கீழ் இரண்டு நாட்களுக்கு வைக்கவும்.
- கிழங்குகள் நன்கு காய்ந்ததும், மாவு மில்லில் கொடுத்து அரைக்கவும். சிறிய அளவில் இருந்தால் மிக்ஸி ஜாரில் கொஞ்சம் கொஞ்சமாக சேர்த்து நைசாக அரைக்கவும்.
- இப்போது, நாம் அரைத்து வைத்துள்ள மஞ்சளை சல்லடையில் சலித்து காயவைக்கவும். மஞ்சள் தூள் நன்கு காய்ந்த பின்னர், காற்று புகாத டப்பாவில் போட்டு வைத்தால் மணமணக்கும் மஞ்சள் தூள் தயார்.
டிப்ஸ்:
- மஞ்சளை சூரிய ஒளியில் காய வைக்கும் போது, கிழங்கு நன்றாக காய்வதோடு நீண்ட மாதங்களுக்கு கெடாமலும், அதே தன்மையுடனும் இருக்கும்.
- கடையில் இருந்து மஞ்சள் கிழங்குகளை வாங்கும் போது, அதில் பூஞ்சை இருக்கிறதா என்பதை நன்கு ஆராய்ந்து, பார்த்து வாங்குங்கள்.
- இயற்கையான மஞ்சள் தூள் அல்லது விரலி மஞ்சள் கிழங்குகள் பளீர் என மின்னாது. அப்படி இருந்தால், அவை கலப்படம் செய்யப்பட்டவையாக இருக்கும்.
இதையும் படிங்க: மஞ்சள் தூள்,கொம்பு மஞ்சளில் கலப்படம்? சந்தேகம் இருந்தால் ஒரு கிளாஸ் தண்ணீர் போதும்!
பொறுப்புத் துறப்பு: இங்கு, உங்களுக்கு வழங்கப்படும் அனைத்து தகவல்களும், பரிந்துரைகளும் உங்கள் புரிதலுக்காக மட்டுமே. அறிவியல் ஆராய்ச்சி, ஆய்வுகள், மருத்துவம் மற்றும் சுகாதார நிபுணத்துவ ஆலோசனைகளின் அடிப்படையில் இந்தத் தகவலை நாங்கள் வழங்குகிறோம். இவற்றைப் பின்பற்றும் முன் உங்கள் தனிப்பட்ட மருத்துவரின் ஆலோசனையைப் பெறுவது நல்லது என்பதை குறிப்பிடுகிறோம்.
ஈடிவி பாரத் தமிழ் வாட்ஸ்ஆப் சேனலில் இணைய இங்கே கிளிக் செய்யவும்
