பெங்களூரு: கன்னட நடிகர் சிவராஜ்குமாருக்கு அமெரிக்காவில் அறுவை சிகிச்சை வெற்றிகரமாக நடந்து முடிந்ததாக தகவல் வெளியாகியுள்ளது. பிரபல கன்னட சூப்பர்ஸ்டார் சிவராஜ்குமாருக்கு சிறுநீரக புற்றுநோய் ஏற்பட்டுள்ளதாக தகவல் வெளியானது. இதனைத்தொடர்ந்து சிவராஜ்குமார் சிகிச்சை மேற்கொள்ள அமெரிக்காவிற்கு கடந்த டிசம்பர் 18ஆம் தேதி புறப்பட்டு சென்றார்.
அமெரிக்காவில் மியாமி மாகாணத்தில் உள்ள புற்றுநோய் மருத்துவமனையில் சிவராஜ்குமார் அனுமதிக்கப்பட்டார். மருத்துவர் முருகேஷ் மனோகர் மேற்பார்வையில் சிவராஜ்குமாருக்கு புற்றுநோய் அறுவை சிகிச்சை நடைபெற்றது. இதனைத்தொடர்ந்து சிவராஜ்குமாருக்கு அளிக்கப்பட்ட சிகிச்சை குறித்து பேட்டி அளித்த மருத்துவர் முருகேஷ் மனோகர் பேசுகையில், “சிவராஜ்குமாருக்கு புற்றுநோயால் பாதிக்கப்பட்டிருந்த சிறுநீரகம் அகற்றப்பட்டுள்ளது. சிவராஜ்குமாருக்கு செயற்கை சிறுநீரகப்பை பொருத்தப்பட்டுள்ளது. அவர் சிகிச்சைக்கு பிறகு நன்றாக உள்ளார்.
சிவராஜ்குமார் விரைவில் குணமடைந்து, சில வாரங்களில் தனது அன்றாட வேலைகளில் ஈடுபடுவார் என எதிர்பார்க்கிறேன்” என கூறியுள்ளார். இதனைத்தொடர்ந்து சிவராஜ்குமார் புற்றுநோய் சிகிச்சைக்கு பிறகு நலமாக இருப்பதாக அவரது மனைவி கீதா மகிழ்ச்சியுடன் தெரிவித்துள்ளார். மேலும் இன்னும் நான்கு அல்லது ஐந்து நாட்களில் தனது ரசிகர்களிடம் வீடியோ மூலம் பேசுவார் என கூறியுள்ளார்.
முன்னதாக அமெரிக்காவிற்கு செல்வதற்கு முன் செய்தியாளர்களிடம் பேசிய சிவராஜ்குமார், “நான் நம்பிக்கையுடன் இருக்கிறேன். வரும் 24ஆம் தேதி எனக்கு அறுவை சிகிச்சை நடைபெறவுள்ளது. அதனைத்தொடர்ந்து ஒரு மாதத்தில் ஜனவரி 26ஆம் தேதி இந்தியா திரும்புகிறேன்” என கூறியுள்ளார்.
இதையும் படிங்க: ”என் வாழ்க்கை இனி அர்த்தமில்லை”... மகன் உயிரிழப்பால் மனமுடைந்த த்ரிஷா! - TRISHA SON ZORRO PASSED AWAY
நடிகர் சிவராஜ்குமார் விரைவில் உடல்நலம் பெற வேண்டும் என அவரது ரசிகர்கள் தங்களது சமூக வலைதள பக்கத்தில் பதிவிட்டு வருகின்றனர். சிவராஜ்குமார் குமார் நடிப்பில் சமீபத்தில் திரையரங்குகளில் வெளியான ’பைரதி ரணகல்’ (Bhairathi ranagal) ரசிகர்கள் மத்தியில் நல்ல வரவேற்பை பெற்று 17 கோடி வசூல் செய்தது. பைரதி ரணகல் சிவராஜ்குமார் நடித்த மஃப்தி படத்தின் முன்கதை ஆகும். ’பைரதி ரணகல்’ திரைப்படம் இன்று அமேசான் ஓடிடியில் வெளியாகியுள்ளது.
