சென்னை: தீபாவளியை முன்னிட்டு வெளியாகியுள்ள அமரன் திரைப்படம் ரசிகர்கள் மத்தியில் நல்ல விமர்சனங்களைப் பெற்று வருகிறது. இந்தநிலையில், சென்னை ராயப்பேட்டையில் உள்ள சத்யம் திரையரங்கிற்கு தனது குடும்பத்தினரோடு வந்த நடிகர் சிவகார்த்திகேயன், ரசிகர்களோடு சேர்ந்து அமரன் திரைப்படம் பார்த்தார்.
திரைப்படம் முடிந்த பிறகு திரையரங்குக்கு வெளியே செய்தியாளர்களைச் சந்தித்த சிவகார்த்திகேயன், சின்ன தளபதி என ரசிகைகள் கூச்சலிட பிளீஸ் வேண்டாம் என கையசைத்துக் கேட்டுக் கொண்டார். தொடர்ந்து செய்தியாளர்களிடம் பேசிய அவர், "தமிழக முதலமைச்சர் எங்களுக்காக நேரம் ஒதுக்கி படம் பார்த்து வாழ்த்தியது மகிழ்ச்சி.
மேலும், தமிழகத்திலிருந்து இப்படி ஒரு வீரர் மகத்தான விஷயம் செய்ததை படமாக எடுத்து உள்ளீர்கள், அதை பார்க்க வேண்டும் என நினைத்ததாக முதலமைச்சர் தெரிவித்தார். நல்ல கதையை சிறப்பாக படமாக்கி உள்ளதாகவும், ஒவ்வொருவரின் உழைப்பும் திரையில் தெரிந்ததாகவும் எங்களை வாழ்த்தினார்.
இது வெறும் கதை அல்ல, இரண்டு பேரின் வாழ்க்கை. இந்தக் கதையை நாங்கள் சரியாக பதிவு செய்திருக்கிறோம் என்று நினைக்கிறேன். நிறைய இடங்களில் கைத்தட்டல்கள் வந்தது. நிறைய பேருக்கு ஊக்கமளிக்கும் வகையில் இந்தப் படம் இருக்கும். ராணுவத்தில் இருப்பவர்கள், அவரின் குடும்பத்தினர் மட்டுமல்லாமல், பல்வேறு முன்களப் பணியாளர்களுக்கும் இந்தப் படம் சமர்ப்பணமாக இருக்கும்.
இதையும் படிங்க: "தவெக மாநாட்டை வெற்றிகரமாக நடத்தி முடித்துவிட்டார்" - விஜய்க்கு வாழ்த்து கூறிய நடிகர் ரஜினி!
இந்தப் படத்தை குழந்தைகள் கண்டிப்பாக பார்க்க வேண்டும். குழந்தைகளுக்கு சூப்பர் ஹீரோ கதை எல்லாம் சொல்கிறோம், ஆனால் அதெல்லாம் கற்பனை. நிஜமான ஒரு சூப்பர் ஹீரோ கதை அவர்களுக்குச் சொல்ல வேண்டும். இதை குழந்தைகள் பார்த்தால் அவர்களுக்கு ஒரு தாக்கத்தை ஏற்படுத்தும் என்று நம்புகிறேன். பெற்றோர், கண்டிப்பாகக் குழந்தைகளை இந்தப் படத்திற்கு அழைத்துச் செல்ல வேண்டும். அனைவருக்கும் தீபாவளி வாழ்த்துக்கள்" என தெரிவித்தார்.
தொடர்ந்து, படத்தின் இயக்குநர் ராஜ்குமார் பெரியசாமி கூறுகையில், “படத்தைப் பார்த்து புகழ்ந்து அனைவரும் பாராட்டுகிறார்கள். மிகவும் சந்தோஷமாக இருக்கிறது. இந்தப் படத்தை அனைவரும் விரும்புவார்கள் என்று நம்புகிறேன். முதல்வர் படம் பார்த்தார். அப்போது "முதல் பகுதி விறுவிறுப்பாக இருக்கிறது. இடைவெளி மிரட்டலாக இருக்கிறது என கூறினார்.
இரண்டாவது பாகம் முடிந்த பிறகு அவரின் கண்கள் கலங்கி இருந்தது. படம் உணர்வுப்பூர்வமாக இருப்பதாக" கூறினார். அப்போது, மிகவும் எமோஷனலாக இருப்பதாக உதயநிதி ஸ்டாலின் தெரிவித்தார். முதல்வருக்கு இருக்கும் வேலைகளுக்கு இடையே நேரம் ஒதுக்கி இந்த படத்தைப் பார்த்து பாராட்டியது மிகவும் மகிழ்ச்சியாக உள்ளது" என தெரிவித்தார்.
