டெல்லி: 18வது நாடாளுமன்ற மழைக்கால கூட்டத் தொடர் நேற்று (ஜூலை 22) தொடங்கி ஆகஸ்ட் 12ஆம் தேதி வரை நடைபெறுகிறது. இந்த நிலையில், மத்திய நிதி அமைச்சர் நிர்மலா சீதாராமன், 2024-25 நிதி ஆண்டுக்கான பட்ஜெட்டை நாடாளுமன்றத்தில் இன்று (ஜூலை 23) தாக்கல் செய்தார்.
அமிர்த காலத்தின் தொடக்கமாக பட்ஜெட்டில் பல்வேறு அறிவிப்புகள் இருக்கும் என பிரதமர் மோடி தெரிவித்திருந்த நிலையில், ஏழைகள், பெண்கள், இளைஞர்கள் மற்றும் விவசாயம் ஆகியவற்றை உள்ளடக்கி பட்ஜெட் தயாரிக்கப்பட்டுள்ளதாக மத்திய நிதி அமைச்சர் நிர்மலா சீதாராமன் தனது உரையில் தெரிவித்துள்ளார்.
இந்த நிலையில், 2024-2025 நிதி ஆண்டுக்கான பட்ஜெட்டில் ஆந்திர மாநிலத்திற்கு சிறப்புத் திட்டங்கள் அறிவிக்கப்பட்டுள்ளது. அந்தவகையில், சந்திரபாபு நாயுடுவின் கனவுத் திட்டமான பொலாவரம் நீர்ப்பாசன திட்டத்திற்கு நிதி வழங்குவதில் மத்திய அரசு உறுதியாக உள்ளதாக பட்ஜெட் உரையில் நிதியமைச்சர் நிர்மலா சீதாராமன் அறிவித்துள்ளார்.
மேலும் நிதி அமைச்சர் நிர்மலா சீதாராமனின் உரையில், "ஆந்திராவின் அமராவதி நகர வளர்ச்சி கட்டமைப்புக்கு ரூ.15,000 கோடி சிறப்பு நிதி ஒதுக்கீடு செய்யப்பட்டுள்ளது என்றும் ஆந்திராவில் மின்சாரம், சாலை, ரயில்வே உள்ளிட்ட பல்வேறு மேம்பாட்டுத் திட்டங்கள் கொண்டுவரப்படும்" என்றும் அறிவித்துள்ளார்.
அதேபோல, பீகார் மாநிலத்திற்கு சிறப்புத் திட்டங்களாக, புதிய விமான நிலையம் மற்றும் மருத்துவக் கல்லூரிகள் மற்றும் சாலைகள் அமைக்கப்படும் என்று கூறி பீகாருக்கு ரூ.26,000 கோடி சிறப்பு நிதியை ஒதுக்கீடு செய்துள்ளதாக மத்திய நிதி அமைச்சர் நிர்மலா சீதாராமன் தெரிவித்துள்ளார்.
இதையும் படிங்க: முதல் மாசம் டபுள் சம்பளம்; இளைஞர்களுக்கு பட்ஜெட்டில் குட் நியூஸ்!
