டெல்லி: உச்ச நீதிமன்ற தலைமை நீதிபதி சந்திரசூட் தலைமையிலான மூன்று நீதிபதிகள் கொண்ட அமர்வு இன்று முக்கியமான தீர்ப்பு ஒன்றை வழங்கி உள்ளது. இந்த அமர்வில் நீதிபதிகள் ஜேபி பர்திவாலா, மனோஜ் மிஸ்ரா ஆகியோர் இடம்பெற்றிருந்தனர். அதாவது ஒரு வழக்கில் காவலில் இருப்பதால், அதற்கு தொடர்பில்லாத மற்றொரு குற்றத்திற்காக முன் ஜாமீன் (முன் பிணை) பெற ஒருவருக்கு உரிமை உண்டு என்று தலைமை நீதிபதி தலைமையிலான அமர்வு கூறியுள்ளது.
வழக்கு தொடர்பான தீர்ப்பை வாசித்த நீதிபதி பர்திவாலா, விரிவான தீர்ப்பு இன்றைய தினமே வெளியிடப்படும் என்று தெரிவித்தார். வேறு ஒரு குற்றத்திற்காக காவலில் இருக்கும் ஒரு குற்றவாளிக்கு உயர் நீதிமன்றமோ, மாவட்ட குற்றவியல் நீதிமன்றமோ முன் ஜாமீன் வழங்குவதை தடுக்க, வெளிப்படையான அல்லது மறைமுகமாக எந்த சட்ட விதிகளும் இல்லை என உச்ச நீதிமன்றம் தனது தீர்ப்பில் தெளிவுபடுத்தியது.
இதுதொடர்பாக வழக்காடிய வழக்கறிஞரின் வாதத்தை ஏற்றுக்கொண்ட உச்ச நீதிமன்றம், இதுபோன்ற வழக்குகளில் அரசியலமைப்புச் சட்டம் உத்தரவாதம் அளித்துள்ள வாழ்வுரிமை, சுதந்திரம் மற்றும் நியாயமான விசாரணை ஆகிய அடிப்படைக் கொள்கைகளை கடைபிடிக்க வேண்டும் என்று தெரிவித்துள்ளது.
அதேபோல, ஒவ்வொரு வழக்கும் சுயாதீனமானது என்று நீதிபதிகள் தெரிவித்தனர். பழைய குற்றங்களின் காரணங்களைக் வைத்து, ஒன்றுக்கொன்று தொடர்பில்லாமல் புதிய குற்றத்துடன் வரும் குற்றம்சாட்டப்பட்டவரின் உரிமைகள் எந்த விதத்திலும் பாதிக்கப்படக்கூடாது எனவும் தீர்ப்பு வலியுறுத்துகிறது.
இந்தத் தீர்ப்பு சட்ட அமலாக்கத்திற்கும், தனிப்பட்ட உரிமைகளுக்கும் இடையிலான சமநிலையை எடுத்துரைக்கிறது. இதனால் ஒரு குற்றத்திற்காக காவலில் இருக்கும்போது, மற்றொரு வழக்கின் சட்டப் பாதுகாப்புக்கான அணுகலை அது கட்டுப்படுத்தாது என்பதை உறுதி செய்வதாக உள்ளது.
இதையும் படிங்க: 30 வருஷத்தில் இப்படி ஒரு வழக்கை சந்தித்ததே இல்லை
