ਲੁਧਿਆਣਾ: ਸਥਾਨਕ ਪੁਲਿਸ ਹੁਣ ਤੱਕ ਕੋਰੋਨਾ ਕਾਲ ਦੌਰਾਨ 56,098 ਲੋਕਾਂ ਦੇ 2.60 ਕਰੋੜ ਰੁਪਏ ਦੇ ਚਲਾਨ ਕੱਟ ਚੁੱਕੀ ਹੈ। ਲੁਧਿਆਣਾ ਦੇ ਟ੍ਰੈਫਿਕ ਪੁਲਿਸ ਦੇ ਇੰਚਾਰਜ ਡੀਸੀਪੀ ਸੁਖਪਾਲ ਸਿੰਘ ਬਰਾੜ ਨੇ ਦੱਸਿਆ ਕਿ ਜੂਨ ਮਹੀਨੇ ਵਿੱਚ ਕੋਰੋਨਾ ਨਿਯਮਾਂ ਦੀ ਉਲੰਘਣਾ ਕਰਨ ਵਾਲੇ 12 ਹਜ਼ਾਰ ਲੋਕਾਂ ਦੇ ਚਲਾਨ ਕੀਤੇ ਗਏ, ਜਦੋਂ ਕਿ ਜੁਲਾਈ ਮਹੀਨੇ 'ਚ 17 ਹਜ਼ਾਰ ਲੋਕਾਂ ਦੇ ਚਲਾਨ ਕੱਟੇ ਜਾ ਚੁੱਕੇ ਹਨ।
ਸੁਖਪਾਲ ਸਿੰਘ ਬਰਾੜ ਨੇ ਕਿਹਾ ਕਿ ਜੇਕਰ ਸਾਨੂੰ ਕੋਰੋਨਾ ਵਾਇਰਸ 'ਤੇ ਕਾਬੂ ਪਾਉਣਾ ਹੈ ਤਾਂ ਸਖ਼ਤੀ ਵਰਤਣੀ ਹੀ ਪਵੇਗੀ। ਉਨ੍ਹਾਂ ਕਿਹਾ ਕਿ ਲੋਕਾਂ ਨੂੰ ਇਸ ਸਬੰਧੀ ਜਾਗਰੂਕ ਵੀ ਕੀਤਾ ਜਾ ਰਿਹਾ ਹੈ।
ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਲੁਧਿਆਣਾ ਟ੍ਰੈਫਿਕ ਪੁਲਿਸ ਦੇ ਡੀਸੀਪੀ ਸੁਖਪਾਲ ਸਿੰਘ ਬਰਾੜ ਨੇ ਕਿਹਾ ਕਿ ਲੁਧਿਆਣਾ ਵਿੱਚ ਲਗਾਤਾਰ ਮਹਾਂਮਾਰੀ ਨਾਲ ਸਬੰਧਤ ਕੇਸ ਵਧਦੇ ਜਾ ਰਹੇ ਹਨ ਤੇ ਲੋਕ ਹਾਲੇ ਵੀ ਨਿਯਮਾਂ ਦੀ ਪਾਲਣਾ ਨਹੀਂ ਕਰ ਰਹੇ, ਖ਼ਾਸ ਕਰਕੇ ਮਾਸਕ ਨਹੀਂ ਲਾਉਂਦੇ।
ਇਸ ਕਰਕੇ ਮਜਬੂਰਨ ਟ੍ਰੈਫਿਕ ਪੁਲਿਸ ਨੂੰ ਨਾ ਸਿਰਫ ਲੋਕਾਂ ਨੂੰ ਜਾਗਰੂਕ ਕਰਨਾ ਪੈ ਰਿਹਾ ਹੈ ਸਗੋਂ ਚਲਾਨ ਵੀ ਕਰਨੇ ਪੈ ਰਹੇ ਹਨ। ਉਨ੍ਹਾਂ ਕਿਹਾ ਕਿ ਇਸ ਕਰਕੇ ਸਖ਼ਤੀ ਵਰਤੀ ਜਾ ਰਹੀ ਹੈ। ਉਨ੍ਹਾਂ ਕਿਹਾ ਕਿ ਇਹ ਕੋਈ ਸਾਡਾ ਟੀਚਾ ਨਹੀਂ ਹੈ ਸਗੋਂ ਲੋਕਾਂ ਵਿੱਚ ਵੱਧ ਤੋਂ ਵੱਧ ਜਾਗਰੂਕਤਾ ਫੈਲਾਉਣੀ ਅਤੇ ਸਖ਼ਤੀ ਕਰਨੀ ਹੈ। ਉਨ੍ਹਾਂ ਕਿਹਾ ਕਿ ਲੋਕਾਂ ਨੂੰ ਵੀ ਇਸ ਸਬੰਧੀ ਜਾਣਕਾਰੀ ਹੈ ਕਿ ਜੇਕਰ ਉਹ ਨਿਯਮਾਂ ਦੀ ਪਾਲਣਾ ਨਹੀਂ ਕਰਨਗੇ ਤਾਂ ਉਨ੍ਹਾਂ ਦੇ ਚਲਾਨ ਹੋਣਗੇ।
ਜ਼ਿਕਰਯੋਗ ਹੈ ਕਿ ਲੁਧਿਆਣਾ ਚ 53,605 ਲੋਕਾਂ ਦੇ ਮਾਸਕ ਨਾ ਪਾਉਣ ਕਰਕੇ ਹੁਣ ਤੱਕ 2.52 ਕਰੋੜ ਦੇ ਚਲਾਨ ਜਦੋਂ ਕੇ 370 ਲੋਕਾਂ ਨੂੰ ਹਿਰਾਸਤ 'ਚ ਲਿਆ ਜਾ ਚੁੱਕਾ ਹੈ। 2196 ਲੋਕਾਂ ਦੇ ਪਬਲਿਕ ਥਾਵਾਂ 'ਤੇ ਥੁੱਕਣ ਦੇ 2.26 ਲੱਖ ਰੁਪਏ ਦੇ ਚਲਾਨ ਵੀ ਕੱਟੇ ਜਾ ਚੁੱਕੇ ਹਨ। 256 ਲੋਕਾਂ ਦੇ ਆਪਸੀ ਦਾਇਰਾ ਨਾ ਬਣਾਉਣ ਕਰਕੇ 4.96 ਲੱਖ ਦੇ ਚਲਾਨ ਕਟੇ ਗਏ ਨੇ ਜਦੋਂ ਕਿ 191 ਕ੍ਰਿਮਿਨਲ ਮਾਮਲੇ ਦਰਜ ਕਰਕੇ 250 ਲੋਕਾਂ ਨੂੰ ਗ੍ਰਿਫ਼ਤਾਰ ਵੀ ਕੀਤਾ ਜਾ ਚੁੱਕਾ ਹੈ।
2 ਲੋਕਾਂ ਨੂੰ ਹੋਮ ਕੁਆਰੰਟਾਈਨ ਨਿਯਮਾਂ ਦੀ ਉਲੰਘਨਾਂ ਕਰਨ ਦੇ ਚਲਾਨ ਜਦੋਂ ਕੇ 417 ਕ੍ਰਿਮਿਨਲ ਕੇਸ ਰਾਤ ਦਾ ਕਰਫਿਊ ਤੋੜਨ ਦੇ ਮਾਮਲੇ 'ਚ 471 ਲੋਕਾਂ ਨੂੰ ਗ੍ਰਿਫਤਾਰ ਕੀਤਾ ਗਿਆ ਜਦੋਂ ਕੇ 23 ਮਾਮਲੇ ਸਿਆਸੀ ਪਾਰਟੀਆਂ ਤੇ ਧਰਨੇ ਲਾਉਣ ਸਬੰਧੀ ਵੀ ਦਰਜ ਕੀਤੇ ਗਏ ਹਨ।
