ਬਠਿੰਡਾ: ਸਿਨੇਮਾਘਰ ਕਿਸੇ ਸਮੇਂ ਮਨੋਰੰਜਨ ਦਾ ਇਕੋ ਇਕ ਸਾਧਨ ਸਨ ਹਰ ਕਿਸੇ ਨੂੰ ਸਿਨੇਮਾਘਰ ਵਿੱਚ ਜਾ ਕੇ ਫਿਲਮ ਦੇਖਣ ਦਾ ਬਹੁਤ ਸੌਂਕ ਹੁੰਦਾ ਸੀ। ਪਰ ਸਮਾਂ ਆਪਣੀ ਚਾਲ ਚੱਲਦਾ ਗਿਆ। ਅੱਜ ਦੇ ਮਸ਼ੀਨੀ ਯੁੱਗ ਵਿੱਚ ਵੱਡੀ ਪੱਧਰ ਉੱਪਰ ਸ਼ਹਿਰਾਂ ਵਿੱਚ ਖੁੱਲ੍ਹੇ ਮਲਟੀਪਲੈਕਸ ਨੇ ਸਿਨੇਮਾਘਰਾਂ ਦੀ ਹੋਂਦ ਨੂੰ ਖ਼ਤਮ ਕਰ ਦਿੱਤਾ ਹੈ। ਜ਼ਿਆਦਾਤਰ ਸਿਨੇਮਾ ਘਰ ਬੰਦ ਪਏ ਹਨ।
ਬਠਿੰਡਾ ਦੇ ਇਕ ਸਿਨੇਮਾਘਰ ਵਿਚ ਬਤੌਰ ਅਪਰੇਟਰ ਕੰਮ ਕਰ ਰਹੇ ਸ਼ਿਵਮ ਕੁਮਾਰ ਨੇ ਦੱਸਿਆ ਕਿ ਮਲਟੀਪਲੈਕਸ ਦੇ ਆਉਣ ਤੋਂ ਪਹਿਲਾਂ ਸਿਨੇਮਾਘਰ ਮਨੋਰੰਜਨ ਦਾ ਇੱਕੋ ਇੱਕ ਸਾਧਨ ਮੰਨੇ ਜਾਂਦੇ ਸਨ ਅਤੇ ਲੋਕ ਫਿਲਮਾਂ ਦੇਖਣ ਲਈ ਕਈ ਕਈ ਘੰਟੇ ਇੰਤਜ਼ਾਰ ਕਰਦੇ ਸਨ। ਨਵੀਂ ਫ਼ਿਲਮ ਰਿਲੀਜ਼ ਹੋਣ ਤੋ ਪਹਿਲਾ ਸ਼ੋਅ ਵੇਖਣ ਦੀ ਦਰਸ਼ਕਾਂ ਵਿਚ ਦੌੜ ਹੁੰਦੀ ਸੀ।
ਉਨ੍ਹਾਂ ਸਿਨੇਮਾਘਰ ਵਿਚ ਲੱਗੀ ਹੋਈ ਫਿਲਮ ਚਲਾਉਣ ਵਾਲੀ ਮਸ਼ੀਨ ਸਬੰਧੀ ਜਾਣਕਾਰੀ ਦਿੰਦੇ ਹੋਏ ਦੱਸਿਆ ਕਿ ਇਹ ਮਸ਼ੀਨ ਉਸ ਸਮੇਂ 25 ਤੋਂ 30 ਲੱਖ ਰੁਪਏ ਦੀ ਸੀ ਅਤੇ ਇਕ ਫ਼ਿਲਮ ਦੀਆਂ ਅੱਠ ਰੀਲਾਂ ਬਣਦੀਆਂ ਸਨ ਜਿਨ੍ਹਾਂ ਨੂੰ ਦੋ ਮਸ਼ੀਨਾਂ ਰਾਹੀਂ ਚਲਾਇਆ ਜਾਂਦਾ ਸੀ ਚਾਰ ਵਿਅਕਤੀ ਇਨ੍ਹਾਂ ਮਸ਼ੀਨਾਂ ਨੂੰ ਚਲਾਉਂਦੇ ਸਨ।
ਉਨ੍ਹਾਂ ਕਿਹਾ ਕਿ ਮਨੋਰੰਜਨ ਦਾ ਇਕੋ ਇਕ ਸਾਧਨ ਮੰਨੇ ਜਾਂਦੇ ਸਿਨੇਮਾਘਰਾਂ ਵਿਚ ਫਿਲਮ ਵੇਖਣ ਲਈ ਲੋਕਾਂ ਵਿੱਚ ਉਸ ਸਮੇਂ ਵੱਡਾ ਉਤਸ਼ਾਹ ਹੁੰਦਾ ਸੀ ਅਤੇ ਲੋਕ ਵੱਡੀ ਗਿਣਤੀ ਵਿੱਚ ਸਿਨੇਮਾਘਰਾਂ ਵਿੱਚ ਫ਼ਿਲਮ ਦੇਖਣ ਲਈ ਆਉਂਦੇ ਸਨ ਉਨ੍ਹਾਂ ਦੱਸਿਆ ਕਿ ਕਈ ਫਿਲਮਾਂ ਜੋ ਸੁਪਰ ਡੁਪਰ ਹਿੱਟ ਰਹੀਆਂ ਉਹ ਇਕ ਸਿਨੇਮਾ ਘਰ ਵਿੱਚ ਕਈ ਕਈ ਮਹੀਨੇ ਲੱਗੀਆਂ ਰਹੀਆਂ ਜਿਸ ਕਾਰਨ ਫਿਲਮ ਪ੍ਰੋਡਿਊਸਰਾਂ ਵੱਲੋਂ ਠੇਕੇਦਾਰਾਂ ਨੂੰ ਵੱਡੀ ਪੱਧਰ ਉੱਪਰ ਇਨਾਮ ਵੀ ਦਿੱਤੇ ਗਏ।
ਪਰ ਅੱਜ ਦੇ ਮਲਟੀਪਲੈਕਸ ਯੁੱਗ ਨੇ ਸਿਨੇਮਾਘਰਾਂ ਦੀ ਹੋਂਦ ਨੂੰ ਖ਼ਤਰੇ ਵਿੱਚ ਪਾ ਦਿੱਤਾ ਹੈ ਜਿਸ ਕਾਰਨ ਹੁਣ ਕੋਈ ਟਾਵਾਂ ਟੱਲਾ ਹੀ ਸਿਨੇਮਾ ਘਰ ਫਿਲਮਾਂ ਦਿਖਾ ਰਿਹਾ ਹੈ ਕਿਉਂਕਿ ਵੱਡੀ ਪੱਧਰ ਉੱਪਰ ਸਿਨੇਮਾ ਘਰਾਂ ਦੇ ਖਰਚੇ ਨਹੀਂ ਪੂਰੇ ਹੋ ਰਹੇ ਅਤੇ ਲੋਕਾਂ ਵੱਲੋਂ ਵੀ ਸਿਨੇਮਾਘਰਾਂ ਪ੍ਰਤੀ ਕੋਈ ਬਹੁਤਾ ਉਤਸ਼ਾਹ ਨਹੀਂ ਵਿਖਾਇਆ ਜਾ ਰਿਹਾ।
ਉਨ੍ਹਾਂ ਕਿਹਾ ਕਿ ਸਿਨੇਮਾ ਘਰਾਂ ਦੀ ਹਿੰਦੀ ਫ਼ਿਲਮਾਂ ਦੀ ਟਿਕਟ ਦੋ ਰੁਪਏ ਅਤੇ ਪੰਜਾਬੀ ਫ਼ਿਲਮਾਂ ਜਿਸ ਨੂੰ ਪੰਜਾਬ ਸਰਕਾਰ ਵੱਲੋਂ ਟੈਕਸ ਮਾਫ਼ ਕੀਤਾ ਜਾਂਦਾ ਉਸ ਦੀ ਇਕ ਰੁਪਿਆ ਟਿਕਟ ਹੁੰਦੀ ਸੀ ਅਤੇ ਫ਼ਿਲਮ ਸੁਪਰ ਡੁਪਰ ਹਿੱਟ ਹੋਣ ਤੇ ਸਿਨੇਮਾਘਰਾਂ ਦੀਆਂ ਟਿਕਟਾਂ ਬਲੈਕ ਵਿੱਚ ਵਿਕਦੀਆਂ ਸਨ ਉਨ੍ਹਾਂ ਕਿਹਾ ਕਿ ਲੱਖਾਂ ਰੁਪਏ ਲਗਾ ਕੇ ਇਹ ਲਗਾਈਆਂ ਗਈਆਂ ਮਸ਼ੀਨਾਂ ਹੁਣ ਕਬਾੜ ਹਨ ਕਿਉਂਕਿ ਮਲਟੀਪਲੈਕਸ ਨੇ ਉਨ੍ਹਾਂ ਦੇ ਕੰਮ ਨੂੰ ਬੁਰੀ ਤਰ੍ਹਾਂ ਪ੍ਰਭਾਵਿਤ ਕੀਤਾ ਹੈ। ਜੇ ਸਰਕਾਰ ਚਾਹੇ ਤਾਂ ਇਨ੍ਹਾਂ ਸਿਨਮਾਘਰਾਂ ਦੀ ਹੋਂਦ ਬਚਾ ਸਕਦੀ ਹੈ।
ਇਹ ਵੀ ਪੜ੍ਹੋ:- PM MODI BIRTHDAY: ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੇ ਜਨਮ ਦਿਨ ਉੱਤੇ ਖ਼ਾਸ
