ਅੰਮ੍ਰਿਤਸਰ: ਰਾਜਾਸਾਂਸੀ ਇਲਾਕੇ 'ਚ 18 ਸਾਲਾ ਕੁੜੀ ਨੂੰ ਕੁੱਝ ਮੁੰਡਿਆਂ ਵੱਲੋਂ ਬਲੈਰੋ ਗੱਡੀ 'ਚ ਅਗਵਾ ਕਰਨ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਪੀੜਤ ਕੁੜੀ ਬਿਹਾਰ ਦੇ ਸ਼ਹਿਰ ਕਟਹਲ ਦੇ ਪਿੰਡ ਬਨਵਾਡੀ ਦੀ ਰਹਿਣ ਵਾਲੀ ਹੈ।
ਪੀੜਿਤ ਲੜਕੀ ਨੇ ਦੱਸਿਆ ਕਿ ਕੁਝ ਦਿਨ ਪਹਿਲਾਂ ਉਹ ਘਰ ਤੋਂ ਬਾਹਰ ਘਾਹ ਲੈਣ ਗਈ ਸੀ। ਉਥੇ ਚਿੱਟੇ ਰੰਗ ਦੀ ਬਲੈਰੋ ਗੱਡੀ 'ਚ ਸਵਾਰ ਚਾਰ ਮੁੰਡੇ ਆਏ ਅਤੇ ਉਸ ਨੂੰ ਚੁੱਕ ਕੇ ਲੈ ਗਏ। ਮੁੰਡਿਆਂ ਨੇ ਉਸ ਨੂੰ ਨਸ਼ੇ ਦਾ ਟੀਕਾ ਲਗਾਇਆ ਅਤੇ ਉਸ ਤੋਂ ਬਾਅਦ ਉਸ ਨੂੰ ਕੁੱਝ ਨਹੀਂ ਪਤਾ ਕਿ ਉਹ ਰਾਜਾਸਾਂਸੀ ਕਿਵੇਂ ਪੁੱਜੀ। ਉਸ ਨੇ ਦੱਸਿਆ ਕਿ ਉਨ੍ਹਾਂ ਮੁੰਡਿਆਂ ਵਲੋਂ ਉਸਦੇ ਹੱਥ ਪੈਰ ਵੀ ਬੰਨ੍ਹੇ ਹੋਏ ਸੀ। ਬੀਤੀ ਰਾਤ ਉਹ ਚਾਰੋਂ ਮੁੰਡੇ ਨਸ਼ੇ ਦੀ ਹਾਲਤ 'ਚ ਸੁੱਤੇ ਪਏ ਸੀ ਤੇ ਉਸ ਨੇ ਆਪਣੇ ਦੰਦਾਂ ਦੇ ਨਾਲ ਹੱਥ ਪੈਰ ਖੋਲ੍ਹੇ ਅਤੇ ਉਥੋਂ ਭੱਜ ਗਈ ।
ਇਸ ਸਬੰਧੀ ਅਦਲੀਵਾਲ ਪਿੰਡ ਦੇ ਸਰਪੰਚ ਹਰਕੰਵਲਜੀਤ ਸਿੰਘ ਨੇ ਦੱਸਿਆ ਕਿ ਸਵੇਰੇ ਕੁੜੀ ਪਿੰਡ ਦੇ ਸਵਿੰਦਰ ਸਿੰਘ ਦੇ ਡੇਰੇ ਤੇ ਆਈ ਅਤੇ ਘਰ ਵਾਲਿਆਂ ਤੋਂ ਮਦਦ ਮੰਗੀ। ਕੁੜੀ ਨੇ ਦੱਸਿਆ ਕਿ ਕੁੱਝ ਮੁੰਡੇ ਉਸ ਨੂੰ ਚੁੱਕ ਕੇ ਲੈ ਆਏ ਸੀ ਤੇ ਹੁਣ ਉਹ ਉੱਥੋਂ ਭੱਜ ਆਈ ਹੈ। ਇਸ ਤੋਂ ਬਾਅਦ ਡੇਰੇ ਵਾਲਿਆਂ ਵਲੋਂ ਪੁਲਿਸ ਨੂੰ ਸੂਚਨਾ ਦਿੱਤੀ ਗਈ ਅਤੇ ਕੁੜੀ ਨੂੰ ਪੁਲਿਸ ਹਵਾਲੇ ਕਰ ਦਿੱਤਾ ਗਿਆ।
ਇਸ ਸਬੰਧੀ ਅਜਨਾਲਾ ਦੇ ਡੀਐੱਸਪੀ ਹਰਪ੍ਰੀਤ ਸਿੰਘ ਨੇ ਦੱਸਿਆ ਕਿ ਪਿੰਡ ਵਾਲਿਆਂ ਵੱਲੋਂ ਕੁੜੀ ਨੂੰ ਪੁਲਿਸ ਹਵਾਲੇ ਕਰ ਦਿੱਤਾ ਗਿਆ ਹੈ। ਇਸ ਸਬੰਧੀ ਕੁੜੀ ਦਾ ਮੈਡੀਕਲ ਕਰਵਾ ਕੇ ਜਾਂਚ ਕੀਤੀ ਜਾ ਰਹੀ ਹੈ ਜੋ ਵੀ ਰਿਪੋਰਟ ਆਵੇਗੀ ਉਸ ਆਧਾਰ 'ਤੇ ਕਾਰਵਾਈ ਕੀਤੀ ਜਾਵੇਗੀ।
