ਨਵੀਂ ਦਿੱਲੀ: ਭਾਰਤ ਦੀ ਸਟਾਰ ਮੁੱਕੇਬਾਜ਼ ਨਿਖਤ ਜ਼ਰੀਨ ਨੇ ਇਤਿਹਾਸ ਰਚ ਦਿੱਤਾ ਹੈ। ਲਾਈਟ ਫਲਾਈਵੇਟ (48-50 ਕਿਲੋਗ੍ਰਾਮ) ਵਰਗ ਵਿੱਚ ਖੇਡਦੇ ਹੋਏ ਨਿਖਤ ਨੇ ਦੋ ਵਾਰ ਦੇ ਏਸ਼ਿਆਈ ਚੈਂਪੀਅਨ ਵੀਅਤਨਾਮ ਦੇ ਨਗੁਏਨ ਥੀ ਟਾਮ ਨੂੰ 5-0 ਨਾਲ ਹਰਾ ਕੇ ਵਿਸ਼ਵ ਚੈਂਪੀਅਨ ਵਜੋਂ ਆਪਣਾ ਤਾਜ ਬਰਕਰਾਰ ਰੱਖਿਆ। ਨਿਖਤ ਨੇ ਐਤਵਾਰ ਨੂੰ ਨਵੀਂ ਦਿੱਲੀ ਦੇ ਇੰਦਰਾ ਗਾਂਧੀ ਸਪੋਰਟਸ ਕੰਪਲੈਕਸ ਵਿੱਚ ਖੇਡੇ ਗਏ ਮਹਿਲਾ ਵਿਸ਼ਵ ਕੱਪ ਦੇ ਫਾਈਨਲ ਮੈਚ ਵਿੱਚ ਜਿੱਤ ਦਰਜ ਕਰਕੇ ਸੋਨ ਤਗ਼ਮਾ ਜਿੱਤਿਆ।
ਨਿਖਤ ਨੇ ਮੈਚ ਦੀ ਸ਼ੁਰੂਆਤ ਤੋਂ ਹੀ ਹਮਲਾਵਰ ਰੂਪ ਦਿਖਾਇਆ ਅਤੇ ਪੂਰੇ ਮੈਚ ਦੌਰਾਨ ਉਹ ਆਪਣੇ ਵਿਰੋਧੀ 'ਤੇ ਭਾਰੀ ਨਜ਼ਰ ਆਈ। ਸ਼ਾਨਦਾਰ ਲੈਅ 'ਚ ਚੱਲ ਰਹੀ ਨਿਖਤ ਜ਼ਰੀਨ ਨੇ ਆਪਣੇ ਨਾਂ ਮੁਤਾਬਕ ਪ੍ਰਦਰਸ਼ਨ ਕਰਦੇ ਹੋਏ ਮਹਿਲਾ ਵਿਸ਼ਵ ਮੁੱਕੇਬਾਜ਼ੀ ਚੈਂਪੀਅਨਸ਼ਿਪ 2023 ਦਾ ਤੀਜਾ ਸੋਨ ਤਮਗਾ ਭਾਰਤ ਦੇ ਝੋਲੇ 'ਚ ਪਾ ਦਿੱਤਾ। ਦੱਸ ਦੇਈਏ ਕਿ ਨਿਖਤ ਲਗਾਤਾਰ ਦੂਜੀ ਵਾਰ ਵਿਸ਼ਵ ਚੈਂਪੀਅਨ ਬਣੀ ਹੈ। ਸਾਲ 2022 ਵਿੱਚ, ਭਾਰਤੀ ਮੁੱਕੇਬਾਜ਼ ਨਿਖਤ ਜ਼ਰੀਨ ਇਸਤਾਂਬੁਲ ਵਿੱਚ ਹੋਈ ਮਹਿਲਾ ਵਿਸ਼ਵ ਚੈਂਪੀਅਨਸ਼ਿਪ ਦੇ ਫਲਾਈਵੇਟ (52 ਕਿਲੋ) ਵਰਗ ਦੇ ਇੱਕਤਰਫਾ ਫਾਈਨਲ ਮੁਕਾਬਲੇ ਵਿੱਚ ਥਾਈਲੈਂਡ ਦੀ ਜਿਤਪੋਂਗ ਜੁਟਾਮਾਸ ਨੂੰ 5-0 ਨਾਲ ਹਰਾ ਕੇ ਵਿਸ਼ਵ ਚੈਂਪੀਅਨ ਬਣੀ।
ਦੱਸ ਦੇਈਏ ਕਿ ਨਿਖਤ ਜ਼ਰੀਨ ਦਾ ਜਨਮ 14 ਜੂਨ 1996 ਨੂੰ ਤੇਲੰਗਾਨਾ ਦੇ ਨਿਜ਼ਾਮਾਬਾਦ ਵਿੱਚ ਹੋਇਆ ਸੀ। ਨਿਖਤ ਦੇ ਪਿਤਾ ਦਾ ਨਾਮ ਮੁਹੰਮਦ ਜਮੀਲ ਅਹਿਮਦ ਅਤੇ ਮਾਂ ਦਾ ਨਾਮ ਪਰਵੀਨ ਸੁਲਤਾਨਾ ਹੈ। ਨਿਖਤ ਦੇ ਪਿਤਾ ਸੇਲਜ਼ਮੈਨ ਹਨ ਅਤੇ ਮਾਂ ਘਰੇਲੂ ਔਰਤ ਹੈ। ਚਾਰ ਭੈਣਾਂ ਵਿੱਚੋਂ ਨਿਖਤ ਦੂਜੇ ਨੰਬਰ ’ਤੇ ਹੈ। ਉਸਦਾ ਚਾਚਾ ਸ਼ਮਸ਼ਾਮੁਦੀਨ ਇੱਕ ਮੁੱਕੇਬਾਜ਼ੀ ਕੋਚ ਹੈ, ਉਸਨੇ ਨਿਖਤ ਨੂੰ ਮੁੱਕੇਬਾਜ਼ੀ ਦੀ ਦੁਨੀਆ ਨਾਲ ਜਾਣੂ ਕਰਵਾਇਆ ਅਤੇ ਨਿਖਤ ਨੂੰ ਸ਼ੁਰੂਆਤੀ ਸਿਖਲਾਈ ਦਿੱਤੀ। ਨਿਖਤ ਨੇ 13 ਸਾਲ ਦੀ ਉਮਰ ਤੋਂ ਮੁੱਕੇਬਾਜ਼ੀ ਦੀ ਸਿਖਲਾਈ ਲੈਣੀ ਸ਼ੁਰੂ ਕਰ ਦਿੱਤੀ ਸੀ ਅਤੇ ਹੁਣ ਉਹ ਵਿਸ਼ਵ ਚੈਂਪੀਅਨ ਹੈ।
ਨਿਖਤ ਨੇ ਐਤਵਾਰ ਨੂੰ ਮਹਿਲਾ ਪ੍ਰੀਮੀਅਰ ਲੀਗ 2023 ਦਾ ਤੀਜਾ ਸੋਨ ਤਮਗਾ ਭਾਰਤ ਦੇ ਝੋਲੇ 'ਚ ਪਾ ਦਿੱਤਾ ਹੈ। ਇਸ ਤੋਂ ਪਹਿਲਾਂ ਸ਼ਨੀਵਾਰ ਨੂੰ 45-48 ਭਾਰ ਵਰਗ 'ਚ ਖੇਡ ਰਹੀ ਨੌਜਵਾਨ ਮੁੱਕੇਬਾਜ਼ ਨੀਤੂ ਘੰਘਾਸ ਨੇ ਫਾਈਨਲ ਮੁਕਾਬਲੇ 'ਚ ਮੰਗੋਲੀਆ ਦੀ ਲੁਤਸੇਖਾਨ ਐਟਲਾਂਟਸਸੇਗ ਨੂੰ 5-0 ਨਾਲ ਹਰਾ ਕੇ ਸੋਨ ਤਮਗਾ ਜਿੱਤਿਆ। ਭਾਰਤ ਦੀ ਅਨੁਭਵੀ ਮੁੱਕੇਬਾਜ਼ ਸਵੀਟੀ ਬੂਰਾ ਨੇ ਵੀ 81 ਕਿਲੋਗ੍ਰਾਮ ਵਰਗ ਦੇ ਫਾਈਨਲ ਮੁਕਾਬਲੇ ਵਿੱਚ ਚੀਨ ਦੀ ਵਾਂਗ ਲੀਨਾ ਨੂੰ 3-2 ਨਾਲ ਹਰਾ ਕੇ ਸੋਨ ਤਗ਼ਮਾ ਜਿੱਤਿਆ।
ਭਾਰਤ ਨੂੰ ਟੂਰਨਾਮੈਂਟ 'ਚ 3 ਸੋਨ ਤਗਮੇ ਮਿਲੇ ਹਨ। ਭਾਰਤ ਅਜੇ ਵੀ ਇੱਕ ਹੋਰ ਗੋਲਡ ਮੈਡਲ ਹਾਸਲ ਕਰ ਸਕਦਾ ਹੈ। ਭਾਰਤ ਦੀ ਸਟਾਰ ਮੁੱਕੇਬਾਜ਼ ਅਤੇ ਓਲੰਪਿਕ ਕਾਂਸੀ ਤਮਗਾ ਜੇਤੂ ਲਵਲੀਨਾ ਬੋਰਗੋਹੇਨ ਵੀ ਐਤਵਾਰ ਨੂੰ ਹੋਣ ਵਾਲੇ ਇਕ ਹੋਰ ਫਾਈਨਲ ਮੁਕਾਬਲੇ 'ਚ ਆਪਣਾ ਆਖਰੀ ਮੁਕਾਬਲਾ ਖੇਡੇਗੀ। ਲਵਲੀਨਾ ਦਾ ਮੈਚ ਭਾਰਤੀ ਸਮੇਂ ਅਨੁਸਾਰ ਰਾਤ 8:45 ਵਜੇ ਸ਼ੁਰੂ ਹੋਣ ਦੀ ਉਮੀਦ ਹੈ।
ਇਹ ਵੀ ਪੜੋ:- IPL Top Five Bowlers : ਇਨ੍ਹਾਂ ਚੋਟੀ ਦੇ 5 ਗੇਂਦਬਾਜ਼ਾਂ 'ਤੇ ਸਭ ਦੀ ਰਹੇਗੀ ਨਜ਼ਰ, ਜਾਣੋ ਕਿਹੜੇ ਨੇ ਇਹ ਗੇਂਦਬਾਜ਼ ?
