ਨਵੀਂ ਦਿੱਲੀ: ਵਨਡੇ ਕ੍ਰਿਕਟ ਦੇ ਇਤਿਹਾਸ ਵਿੱਚ ਅੱਜ ਯਾਨੀ 12 ਮਾਰਚ ਦਾ ਦਿਨ ਸੁਨਹਿਰੀ ਅੱਖਰਾਂ ਵਿੱਚ ਲਿਖਿਆ ਜਾਂਦਾ ਹੈ। ਕਿਉਂਕਿ ਅੱਜ ਦੇ ਦਿਨ 12 ਮਾਰਚ 2006 ਨੂੰ ਵਨਡੇ ਕ੍ਰਿਕਟ ਦਾ ਅਜਿਹਾ ਮੈਚ ਖੇਡਿਆ ਗਿਆ ਜਿਸ ਨੂੰ ਸ਼ਾਇਦ ਹੀ ਕੋਈ ਕ੍ਰਿਕਟ ਪ੍ਰੇਮੀ ਭੁੱਲ ਸਕੇ। ਜੋਹਾਨਸਬਰਗ 'ਚ ਦੱਖਣੀ ਅਫਰੀਕਾ ਅਤੇ ਆਸਟ੍ਰੇਲੀਆ ਵਿਚਾਲੇ ਪੰਜਵਾਂ ਵਨਡੇ ਮੈਚ ਖੇਡਿਆ ਗਿਆ।
ਮੈਚ ਤੋਂ ਪਹਿਲਾਂ ਆਸਟ੍ਰੇਲੀਆਈ ਕਪਤਾਨ ਰਿਕੀ ਪੋਂਟਿੰਗ ਨੇ ਟਾਸ ਜਿੱਤ ਕੇ ਪਹਿਲਾਂ ਬੱਲੇਬਾਜ਼ੀ ਕਰਨ ਦਾ ਫੈਸਲਾ ਕੀਤਾ ਅਤੇ ਕੰਗਾਰੂ ਟੀਮ ਨੇ ਪਹਿਲਾਂ ਬੱਲੇਬਾਜ਼ੀ ਕਰਦੇ ਹੋਏ 434 ਦੌੜਾਂ ਦਾ ਸਕੋਰ ਬੋਰਡ 'ਤੇ ਖੜ੍ਹਾ ਕਰ ਦਿੱਤਾ। ਫਿਰ ਜੋ ਹੋਇਆ ਉਹ ਕਿਸੇ ਚਮਤਕਾਰ ਤੋਂ ਘੱਟ ਨਹੀਂ ਸੀ। ਦੱਖਣੀ ਅਫਰੀਕਾ ਦੀ ਟੀਮ ਨੇ ਆਸਟਰੇਲੀਆ ਵੱਲੋਂ ਦਿੱਤੇ 434 ਦੌੜਾਂ ਦੇ ਟੀਚੇ ਦੇ ਸਾਹਮਣੇ 49.5 ਓਵਰਾਂ ਵਿੱਚ 9 ਵਿਕਟਾਂ ਦੇ ਨੁਕਸਾਨ ’ਤੇ 438 ਦੌੜਾਂ ਬਣਾ ਕੇ ਰਿਕਾਰਡ ਜਿੱਤ ਹਾਸਲ ਕੀਤੀ।
ਮੈਚ ਕਿਵੇਂ ਦਾ ਸੀ:- ਪਹਿਲਾਂ ਬੱਲੇਬਾਜ਼ੀ ਕਰਦੇ ਹੋਏ ਆਸਟ੍ਰੇਲੀਆ ਦੀ ਟੀਮ ਨੇ 4 ਵਿਕਟਾਂ ਦੇ ਨੁਕਸਾਨ 'ਤੇ 434 ਦੌੜਾਂ ਬਣਾਈਆਂ। ਆਸਟ੍ਰੇਲੀਆ ਲਈ ਕਪਤਾਨ ਰਿਕੀ ਪੋਂਟਿੰਗ ਨੇ 105 ਗੇਂਦਾਂ 'ਤੇ 164 ਦੌੜਾਂ ਦੀ ਪਾਰੀ ਖੇਡੀ। ਇਸ ਦੇ ਨਾਲ ਹੀ ਮਾਈਕਲ ਹਸੀ ਨੇ 51 ਗੇਂਦਾਂ ਵਿੱਚ 81 ਦੌੜਾਂ ਬਣਾਈਆਂ। ਇਸ ਪਹਾੜ ਵਰਗੇ ਟੀਚੇ ਨੂੰ ਹਾਸਲ ਕਰਨਾ ਦੱਖਣੀ ਅਫਰੀਕਾ ਲਈ ਆਸਾਨ ਨਹੀਂ ਸੀ। ਪਰ ਅਫਰੀਕੀ ਬੱਲੇਬਾਜ਼ਾਂ ਨੇ ਆਖਰੀ ਓਵਰ ਤੱਕ ਹਿੰਮਤ ਨਹੀਂ ਹਾਰੀ ਅਤੇ ਸ਼ਾਨਦਾਰ ਬੱਲੇਬਾਜ਼ੀ ਕਰਦੇ ਹੋਏ ਵਨਡੇ ਇਤਿਹਾਸ 'ਚ ਸਭ ਤੋਂ ਵੱਡੇ ਦੌੜਾਂ ਦਾ ਟੀਚਾ ਹਾਸਲ ਕਰ ਲਿਆ।
ਦੱਖਣੀ ਅਫਰੀਕਾ ਲਈ ਹਰਸ਼ੇਲ ਗਿਬਸ ਨੇ ਸਭ ਤੋਂ ਵੱਧ ਦੌੜਾਂ ਬਣਾਈਆਂ। ਗਿਬਸ ਨੇ 111 ਗੇਂਦਾਂ ਦਾ ਸਾਹਮਣਾ ਕਰਦੇ ਹੋਏ 175 ਦੌੜਾਂ ਦੀ ਤੂਫਾਨੀ ਪਾਰੀ ਖੇਡੀ। ਆਪਣੀ ਪਾਰੀ ਵਿੱਚ ਗਿਬਸ ਨੇ 21 ਚੌਕੇ ਅਤੇ 7 ਛੱਕੇ ਲਗਾਏ। ਕਪਤਾਨ ਗ੍ਰੀਮ ਸਮਿਥ ਨੇ ਵੀ 90 ਦੌੜਾਂ ਦੀ ਪਾਰੀ ਖੇਡੀ ਅਤੇ ਫਿਰ ਆਖਰੀ ਓਵਰ 'ਚ ਅਫਰੀਕਾ ਦੇ ਮਹਾਨ ਵਿਕਟਕੀਪਰ ਬੱਲੇਬਾਜ਼ ਮਾਰਕ ਬਾਊਚਰ ਨੇ ਚੌਕਾ ਜੜ ਕੇ ਆਪਣੀ ਟੀਮ ਨੂੰ ਇਕ ਗੇਂਦ ਬਾਕੀ ਰਹਿੰਦਿਆਂ ਇਤਿਹਾਸਕ ਜਿੱਤ ਦਿਵਾਈ। ਬਾਊਚਰ ਇਸ ਮੈਚ 'ਚ 50 ਦੌੜਾਂ ਬਣਾ ਕੇ ਅਜੇਤੂ ਰਹੇ।
ਪੂਰੇ ਮੈਚ ਵਿੱਚ ਬਣਾਈਆਂ 872 ਦੌੜਾਂ :- ਦੱਖਣੀ ਅਫਰੀਕਾ ਅਤੇ ਆਸਟ੍ਰੇਲੀਆ ਵਿਚਾਲੇ ਖੇਡੇ ਗਏ ਇਸ ਇਤਿਹਾਸਕ ਮੈਚ 'ਚ ਕਈ ਰਿਕਾਰਡ ਬਣੇ। ਇਸ ਮੈਚ 'ਚ ਆਸਟ੍ਰੇਲੀਆ ਨੇ ਪਹਿਲਾਂ ਬੱਲੇਬਾਜ਼ੀ ਕਰਦੇ ਹੋਏ 434 ਦੌੜਾਂ ਬਣਾਈਆਂ, ਫਿਰ ਦੱਖਣੀ ਅਫਰੀਕਾ ਨੇ ਦੌੜਾਂ ਦਾ ਸਫਲ ਪਿੱਛਾ ਕਰਦੇ ਹੋਏ 438 ਦੌੜਾਂ ਬਣਾਈਆਂ। ਇਸ ਤਰ੍ਹਾਂ ਇਸ ਪੂਰੇ ਮੈਚ 'ਚ ਕੁੱਲ 872 ਦੌੜਾਂ ਬਣਾਈਆਂ ਗਈਆਂ, ਜੋ ਇਕ ਰੋਜ਼ਾ 'ਚ ਸਭ ਤੋਂ ਜ਼ਿਆਦਾ ਦੌੜਾਂ ਬਣਾਉਣ ਦਾ ਰਿਕਾਰਡ ਹੈ। ਇਸ ਦੇ ਨਾਲ ਹੀ ਦੱਖਣੀ ਅਫਰੀਕਾ ਵੱਲੋਂ ਹਾਸਲ ਕੀਤਾ 434 ਦੌੜਾਂ ਦਾ ਟੀਚਾ ਵੀ ਵਨਡੇ ਕ੍ਰਿਕਟ 'ਚ ਸਭ ਤੋਂ ਸਫਲ ਦੌੜਾਂ ਦਾ ਪਿੱਛਾ ਕਰਨਾ ਹੈ। ਇਸ ਮੈਚ ਦੀ ਇਕ ਹੋਰ ਖਾਸ ਗੱਲ ਇਹ ਰਹੀ ਕਿ ਇਸ ਮੈਚ 'ਚ ਰਿਕੀ ਪੋਂਟਿੰਗ ਅਤੇ ਹਰਸ਼ੇਲ ਗਿਬਸ ਸਾਂਝੇ ਤੌਰ 'ਤੇ ਪਲੇਅਰ ਆਫ ਦਿ ਮੈਚ ਬਣੇ।
ਇਹ ਵੀ ਪੜੋ:- Usman Khan Fastest Century: ਉਸਮਾਨ ਖਾਨ ਨੇ PSL 'ਚ ਰਚਿਆ ਇਤਿਹਾਸ, ਜੜਿਆ ਸਭ ਤੋਂ ਤੇਜ਼ ਸੈਂਕੜਾ
