ਲੀਡਜ਼: ਇੰਗਲੈਂਡ ਨੇ ਸ਼ਨੀਵਾਰ ਨੂੰ ਇੱਥੇ ਹੈਡਿੰਗਲੇ ਵਿਖੇ ਤੀਜੇ ਟੈਸਟ ਦੇ ਚੌਥੇ ਦਿਨ ਭਾਰਤ ਨੂੰ ਇੱਕ ਪਾਰੀ ਅਤੇ 76 ਦੌੜਾਂ ਨਾਲ ਹਰਾ ਕੇ ਪੰਜ ਮੈਚਾਂ ਦੀ ਟੈਸਟ ਲੜੀ 1-1 ਨਾਲ ਬਰਾਬਰ ਕਰ ਦਿੱਤੀ ਹੈ।
ਭਾਰਤ ਦੀ ਪਹਿਲੀ ਪਾਰੀ 78 ਦੌੜਾਂ 'ਤੇ ਢੇਰ ਹੋ ਗਈ, ਜਦੋਂ ਕਿ ਇੰਗਲੈਂਡ ਨੇ ਪਹਿਲੀ ਪਾਰੀ 'ਚ 432 ਦੌੜਾਂ ਬਣਾਉਣ ਤੋਂ ਬਾਅਦ 354 ਦੌੜਾਂ ਦੀ ਲੀਡ ਲੈ ਲਈ। ਪਰ ਭਾਰਤੀ ਟੀਮ ਦੂਜੀ ਪਾਰੀ ਵਿੱਚ 278 ਦੌੜਾਂ 'ਤੇ ਆਲ ਆਟ ਹੋ ਗਈ ਅਤੇ ਪਾਰੀ ਦੀ ਹਾਰ ਦੀ ਨਮੋਸ਼ੀ ਦਾ ਸਾਹਮਣਾ ਕਰਨਾ ਪਿਆ। ਭਾਰਤ ਲਈ ਚੇਤੇਸ਼ਵਰ ਪੁਜਾਰਾ ਨੇ 189 ਗੇਂਦਾਂ ਵਿੱਚ 15 ਚੌਕਿਆਂ ਦੀ ਮਦਦ ਨਾਲ ਸਭ ਤੋਂ ਵੱਧ 91 ਦੌੜਾਂ ਬਣਾਈਆਂ।
ਇੰਗਲੈਂਡ ਲਈ ਓਲੀ ਰੌਬਿਨਸਨ ਨੇ ਪੰਜ ਅਤੇ ਕ੍ਰੇਗ ਓਵਰਟਨ ਨੇ ਤਿੰਨ ਵਿਕਟਾਂ ਲਈਆਂ, ਜਦੋਂ ਕਿ ਜੇਮਜ਼ ਐਂਡਰਸਨ ਅਤੇ ਮੋਈਨ ਅਲੀ ਨੂੰ ਇੱਕ -ਇੱਕ ਵਿਕਟ ਮਿਲੀ।
ਭਾਰਤ ਨੇ ਅੱਜ ਪਾਰੀ ਦੀ ਸ਼ੁਰੂਆਤ 2 ਵਿਕਟਾਂ 'ਤੇ 215 ਦੌੜਾਂ ਤੋਂ ਅੱਗੇ ਕਰਦਿਆਂ ਪੁਜਾਰਾ ਨੇ ਪਾਰੀ 91 ਅਤੇ ਕਪਤਾਨ ਵਿਰਾਟ ਕੋਹਲੀ ਨੇ 45 ਦੌੜਾਂ ਨਾਲ ਅੱਗੇ ਕੀਤੀ। ਪਰ ਇਹ ਦੋਵੇਂ ਬੱਲੇਬਾਜ਼ ਅੱਜ ਬਹੁਤਾ ਕਰਿਸ਼ਮਾ ਨਹੀਂ ਦਿਖਾ ਸਕੇ ਅਤੇ ਉਨ੍ਹਾਂ ਦੇ ਆਊਟ ਹੋਣ ਨਾਲ ਭਾਰਤੀ ਪਾਰੀ ਤਾਸ਼ ਦੇ ਪੱਤਿਆਂ ਵਾਂਗ ਢੇਰ ਹੋ ਗਈ।
ਭਾਰਤ ਦੀ ਦੂਜੀ ਪਾਰੀ ਵਿੱਚ ਕੋਹਲੀ ਨੇ 55, ਰੋਹਿਤ ਸ਼ਰਮਾ ਨੇ 59, ਲੋਕੇਸ਼ ਰਾਹੁਲ ਨੇ ਅੱਠ, ਅਜਿੰਕਯ ਰਹਾਣੇ ਨੇ 10, ਰਿਸ਼ਭ ਪੰਤ ਨੇ ਇੱਕ, ਮੁਹੰਮਦ ਸ਼ਮੀ ਨੇ ਛੇ, ਇਸ਼ਾਂਤ ਸ਼ਰਮਾ ਨੇ ਦੋ, ਰਵਿੰਦਰ ਜਡੇਜਾ ਨੇ 30 ਅਤੇ ਮੁਹੰਮਦ ਸਿਰਾਜ ਖਾਤਾ ਖੋਲ੍ਹੇ ਬਿਨਾਂ ਹੀ ਆਊਟ ਹੋ ਗਏ, ਜਦੋਂ ਕਿ ਜਸਪ੍ਰੀਤ ਬੁਮਰਾਹ ਇੱਕ ਦੌੜ ਬਣਾ ਕੇ ਨਾਬਾਦ ਰਹੇ।
ਇਹ ਵੀ ਪੜ੍ਹੋ:ਟੋਕੀਓ ਪੈਰਾਲੰਪਿਕਸ:ਭਾਵਿਨਾ ਪਟੇਲ ਨੂੰ ਇਤਿਹਾਸ ਸਿਰਜਣ ‘ਤੇ ਕੈਪਟਨ ਵੱਲੋਂ ਵਧਾਈ
