ਲੰਡਨ: ਇੰਗਲੈਂਡ ਦੇ ਸਾਬਕਾ ਹਰਫ਼ਨਮੌਲਾ ਖਿਡਾਰੀ ਐਂਡਰਿਊ ਫਲਿਨਟਾਫ ਨੂੰ ਲੱਗਦਾ ਹੈ ਕਿ 2018 ਵਿੱਚ ਵਿਸ਼ਵ ਕ੍ਰਿਕਟ ਨੂੰ ਝਟਕਾ ਦੇਣ ਵਾਲੇ ਗੇਂਦ ਨਾਲ ਛੇੜਛਾੜ ਦੇ ਪੂਰੇ ਮਾਮਲੇ ਵਿੱਚ ਪੂਰੀ ਆਸਟ੍ਰੇਲੀਆਈ ਟੀਮ ਸ਼ਾਮਲ ਸੀ ਪਰ ਕਪਤਾਨ ਸਟੀਵ ਸਮਿਥ ਨੇ ਆਪਣੀ ਟੀਮ ਨੂੰ ਬਚਾਉਣ ਦੇ ਲਈ ਦੋਸ਼ ਆਪਣੇ ਉੱਤੇ ਲੈ ਲਏ।
ਕੇਪਟਾਊਨ ਵਿੱਚ ਦੱਖਣੀ ਅਫ਼ਰੀਕਾ ਵਿਰੁੱਧ ਟੈਸਟ ਮੈਚ ਦੌਰਾਨ ਇਸ ਗੇਂਦ ਉੱਤੇ ਸੈਂਡਪੇਪਰ-ਗੇਟ ਦੇ ਮਾਮਲੇ ਤੋਂ ਬਾਅਦ ਸਮਿਥ ਅਤੇ ਡੇਵਿਡ ਵਾਰਨਰ ਉੱਤੇ 1-1 ਸਾਲ ਦੀ ਰੋਕ ਲੱਗੀ ਸੀ। ਇਨ੍ਹਾਂ ਦੋਵਾਂ ਤੋਂ ਇਲਾਵਾ ਸਲਾਮੀ ਬੱਲੇਬਾਜ਼ ਕੈਮਰੂਨ ਬੈਨਕ੍ਰਾਫਟ ਨੂੰ 9 ਮਹੀਨਿਆਂ ਦੇ ਲਈ ਰੋਕ ਦਾ ਸਾਹਮਣਾ ਕਰਨਾ ਪਿਆ ਸੀ।
ਫਲਿਨਟਾਫ ਨੇ ਇੱਕ ਇੰਟਰਵਿਊ ਵਿੱਚ ਕਿਹਾ ਕਿ ਮੈਂ ਇਸ ਗੱਲ ਉੱਤੇ ਵਿਸ਼ਵਾਸ ਨਹੀਂ ਕਰਦਾ ਹਾਂ ਕਿ ਇਸ ਵਿੱਚ ਪੂਰੀ ਟੀਮ ਸ਼ਾਮਲ ਨਹੀਂ ਸੀ। ਇੱਕ ਗੇਂਦਬਾਜ਼ ਦੇ ਤੌਰ ਉੱਤੇ ਕੋਈ ਮੈਨੂੰ ਅਜਿਹੀ ਗੇਂਦ ਦਿੰਦਾ ਜਿਸ ਨਾਲ ਛੇੜਛਾੜ ਹੁੰਦੀ ਹੈ ਤਾਂ ਮੈਨੂੰ ਪਤਾ ਚੱਲੇਗਾ। ਸਮਿਥ ਨੇ ਇੱਕ ਕੰਮ ਕੀਤਾ, ਉਨ੍ਹਾਂ ਨੇ ਪੂਰੀ ਟੀਮ ਦੇ ਦੋਸ਼ਾਂ ਨੂੰ ਆਪਣੇ ਸਿਰ ਲੈ ਲਿਆ।
ਉਨ੍ਹਾਂ ਨੇ ਕਿਹਾ ਕਿ ਬਾਲ ਟੈਂਪਰਿੰਗ ਵਰਗੀ ਚੀਜ਼ ਕਾਫ਼ੀ ਲੰਬੇ ਸਮੇਂ ਚੱਲੀ ਆ ਰਹੀ ਹੈ ਅਤੇ ਮੈਨੂੰ ਲੱਗਦਾ ਹੈ ਕਿ ਇੱਕ ਹੱਦ ਤੱਕ ਤੁਸੀਂ ਇਸ ਨੂੰ ਲੈ ਕੇ ਜਾ ਸਕਦੇ ਹੋ। ਸਾਡੇ ਉੱਤੇ ਦੋਸ਼ ਲੱਗੇ ਸਨ ਕਿ ਅਸੀਂ ਗੇਂਦ ਉੱਤੇ ਕੁੱਝ ਮਿੱਠਾ ਲਾਇਆ ਹੈ। ਲੋਕ ਗੇਂਦ ਉੱਤੇ ਸੰਨਸਕ੍ਰੀਨ ਕ੍ਰੀਮ ਲਾਉਂਦੇ ਹਨ ਅਤੇ ਜੋ ਵੀ ਉਹ ਕਰ ਸਕਦੇ ਹਨ ਕਰਦੇ ਹਨ।
ਉਨ੍ਹਾਂ ਨੇ ਕਿਹਾ ਕਿ ਸੈਂਡਪੇਪਰ ਗਲਤ ਸੀ ਪਰ ਇਹ ਮੰਨ ਲੈਣਾ ਕਿ ਇਸ ਵਿੱਚ ਪੂਰੀ ਟੀਮ ਦਾ ਹਰ ਖਿਡਾਰੀ ਸ਼ਾਮਲ ਨਹੀਂ ਸੀ ਇਹ ਬੇਵਕੂਫ਼ੀ ਹੋਵੇਗੀ।
ਸਮਿਥ ਉੱਤੇ 2 ਸਾਲ ਦੇ ਲਈ ਕਪਤਾਨੀ ਤੋਂ ਵੀ ਰੋਕ ਲਾ ਦਿੱਤੀ ਗਈ ਸੀ। ਉਨ੍ਹਾਂ ਨੇ ਕਿਹਾ ਕਿ ਇਹ ਮੰਨਣਾ ਮੁਸ਼ਕਿਲ ਹੈ ਕਿ ਟੀਮ ਦੇ ਹੋਰ ਮੈਂਬਰਾਂ ਨੂੰ ਇਸ ਬਾਰੇ ਵਿੱਚ ਨਹੀਂ ਪਤਾ ਸੀ ਕਿ ਇਹ ਕਿਉਂ ਹੋ ਰਿਹਾ ਹੈ।
ਐਂਡਰਿਊ ਫਲਿਨਟਾਫ ਨੇ ਕਿਹਾ ਕਿ ਸੈਂਡਪੇਪਰ ਗਲਤ ਹੈ, ਪਰ ਇਹ ਕਿਸੇ ਹੋਰ ਚੀਜ਼ ਤੋਂ ਜ਼ਿਆਦਾ ਬੇਵਕੂਫ਼ਾਨਾ ਹੈ। ਪਰ ਮੈਂ ਇਸ ਗੱਲ ਨਾਲ ਸਹਿਮਤ ਨਹੀਂ ਹਾਂ ਕਿ ਟੀਮ ਦੇ ਹੋਰ ਮੈਂਬਰ ਕਿਸੇ ਨਾ ਕਿਸੇ ਤਰੀਕੇ ਇਸ ਵਿੱਚ ਸ਼ਾਮਲ ਨਹੀਂ ਸਨ।
