Gym Roof Collapses in China: ਚੀਨ 'ਚ ਸਕੂਲ ਜਿੰਮ ਦੀ ਛੱਤ ਡਿੱਗਣ ਕਾਰਨ 10 ਦੀ ਮੌਤ

Gym Roof Collapses in China: ਚੀਨ ਵਿੱਚ ਸਕੂਲ ਜਿੰਮ ਦੀ ਛੱਤ ਡਿੱਗਣ ਕਾਰਨ 10 ਲੋਕਾਂ ਦੀ ਮੌਤ ਹੋ ਗਈ। ਮੁਢਲੀ ਜਾਂਚ ਤੋਂ ਪਤਾ ਲੱਗਾ ਹੈ ਕਿ ਉਸਾਰੀ ਕਾਮਿਆਂ ਨੇ ਸਕੂਲ ਦੇ ਜਿਮਨੇਜ਼ੀਅਮ ਦੀ ਛੱਤ 'ਤੇ ਗੈਰ-ਕਾਨੂੰਨੀ ਤੌਰ 'ਤੇ ਪਰਲਾਈਟ ਰੱਖੀ ਸੀ, ਜੋ ਕਿ ਬਾਰਿਸ਼ ਦੇ ਪ੍ਰਭਾਵ ਹੇਠ, ਪਾਣੀ ਵਿੱਚ ਭਿੱਜ ਗਈ ਸੀ ਅਤੇ ਭਾਰ ਵਧ ਗਿਆ ਸੀ, ਨਤੀਜੇ ਵਜੋਂ ਛੱਤ ਡਿੱਗ ਗਈ।

ਬੀਜਿੰਗ/ਹਾਰਬਿਨ (ਚੀਨ): ਉੱਤਰ-ਪੂਰਬੀ ਚੀਨ ਦੇ ਹੀਲੋਂਗਜਿਆਂਗ ਸੂਬੇ ਦੇ ਕਿਕੀਹਾਰ ਸ਼ਹਿਰ ਵਿੱਚ ਇੱਕ ਸਕੂਲ ਜਿਮਨੇਜ਼ੀਅਮ ਦੀ ਛੱਤ ਡਿੱਗਣ ਕਾਰਨ 10 ਲੋਕਾਂ ਦੀ ਮੌਤ ਹੋ ਗਈ ਹੈ। ਦੱਸ ਦਈਏ ਕਿ ਮਲਬੇ ਹੇਠਾਂ ਹੋਰ ਵੀ ਲੋਕਾਂ ਦੇ ਫਸੇ ਹੋਣ ਦਾ ਖਦਸ਼ਾ ਹੈ, ਜਿਹਨਾਂ ਨੂੰ ਕੱਢਣ ਲਈ ਬਚਾਅ ਕਾਰਨ ਜਾਰੀ ਹਨ। ਲੋਂਗਸ਼ਾ ਜ਼ਿਲ੍ਹੇ ਦੇ 34 ਮਿਡਲ ਸਕੂਲ ਵਿੱਚ ਜਦੋਂ ਇਹ ਹਾਦਸਾ ਵਾਪਰਿਆ, ਉਸ ਸਮੇਂ 1200 ਵਰਗ ਮੀਟਰ ਦੇ ਜਿਮਨੇਜ਼ੀਅਮ ਵਿੱਚ 19 ਲੋਕ ਸਨ।

10 ਲੋਕਾਂ ਦੀ ਹੋਈ ਮੌਤ: ਮਿਊਂਸੀਪਲ ਖੋਜ ਅਤੇ ਬਚਾਅ ਹੈੱਡਕੁਆਰਟਰ ਨੇ ਦੱਸਿਆ ਕਿ ਇਸ ਹਾਦਸੇ ਤੋਂ ਬਾਅਦ 4 ਲੋਕ ਬਾਹਰ ਨਿਕਲ ਗਏ ਸਨ ਤੇ 15 ਫਸ ਗਏ ਸਨ। ਸਰਕਾਰੀ ਸਿਨਹੂਆ ਨਿਊਜ਼ ਏਜੰਸੀ ਨੇ ਸੋਮਵਾਰ ਨੂੰ ਦੱਸਿਆ ਕਿ ਹਾਦਸੇ ਤੋਂ ਤੁਰੰਤ ਬਾਅਦ 13 ਲੋਕਾਂ ਨੂੰ ਬਾਹਰ ਕੱਢਿਆ ਗਿਆ, ਜਿਹਨਾਂ ਵਿੱਚ 10 ਦੀ ਮੌਤ ਹੋ ਗਈ ਹੈ ਤੇ ਬਚਾਅ ਕਾਰਜ ਅਜੇ ਵੀ ਜਾਰੀ ਹਨ। ਇਸ ਭਿਆਨਕ ਘਟਨਾ ਨੇ ਉਥੋਂ ਦੇ ਵਾਸੀਆਂ ਨੂੰ ਝੰਜੋੜ ਕੇ ਰੱਖ ਦਿੱਤਾ ਹੈ। ਭਾਰੀ ਜਾਨੀ ਨੁਕਸਾਨ ਤੋਂ ਬਾਅਦ ਇਲਾਕੇ 'ਚ ਸੋਗ ਦੀ ਲਹਿਰ ਹੈ।

ਛੱਤ ਡਿੱਗਣ ਦਾ ਇਹ ਰਿਹਾ ਕਾਰਨ: ਮੁਢਲੀ ਜਾਂਚ ਤੋਂ ਪਤਾ ਲੱਗਾ ਹੈ ਕਿ ਜਿਮਨੇਜ਼ੀਅਮ ਦੇ ਨਾਲ ਲਗਦੀ ਇੱਕ ਹੋਰ ਟੀਚਿੰਗ ਬਿਲਡਿੰਗ ਦੀ ਉਸਾਰੀ ਕਰਦੇ ਸਮੇਂ ਉਸਾਰੀ ਕਾਮਿਆਂ ਨੇ ਛੱਤ 'ਤੇ ਗੈਰ-ਕਾਨੂੰਨੀ ਤੌਰ 'ਤੇ ਪਰਲਾਈਟ ਰੱਖਿਆ ਸੀ। ਬਾਰਸ਼ ਦੇ ਪ੍ਰਭਾਵ ਅਧੀਨ, ਪਰਲਾਈਟ ਪਾਣੀ ਵਿੱਚ ਭਿੱਜ ਗਈ ਅਤੇ ਭਾਰ ਵਧ ਗਿਆ, ਜਿਸ ਦੇ ਨਤੀਜੇ ਵਜੋਂ ਛੱਤ ਡਿੱਗ ਗਈ। ਸਥਾਨਕ ਅਧਿਕਾਰੀਆਂ ਦੇ ਅਨੁਸਾਰ, ਜਿਮਨੇਜ਼ੀਅਮ ਦੀਆਂ ਕੰਧਾਂ ਵਿੱਚ ਗਰਿੱਡ ਬਣਤਰ ਹੈ, ਅਤੇ ਛੱਤ ਕੰਕਰੀਟ ਦੀਆਂ ਸਲੈਬਾਂ ਦੀ ਬਣੀ ਹੋਈ ਹੈ। ਅਧਿਕਾਰੀਆਂ ਨੇ ਕਿਹਾ ਕਿ ਡੂੰਘਾਈ ਨਾਲ ਜਾਂਚ ਜਾਰੀ ਹੈ। ਸਿਨਹੂਆ ਸਮਾਚਾਰ ਏਜੰਸੀ ਦੀ ਰਿਪੋਰਟ ਵਿੱਚ ਕਿਹਾ ਗਿਆ ਹੈ ਕਿ ਨਿਰਮਾਣ ਕੰਪਨੀ ਦੇ ਇੰਚਾਰਜਾਂ ਨੂੰ ਪੁਲਿਸ ਹਿਰਾਸਤ ਵਿੱਚ ਲੈ ਲਿਆ ਗਿਆ ਹੈ। (ਪੀਟੀਆਈ)