ਨਵੀਂ ਦਿੱਲੀ: ਦੁਨੀਆ ਦੀਆਂ 20 ਵੱਡੀਆਂ ਅਰਥਵਿਵਸਥਾਵਾਂ ਦੇ ਸਮੂਹ ਜੀ20 ਦੇ ਮੌਜੂਦਾ ਚੇਅਰਮੈਨ ਸਾਊਦੀ ਅਰਬ ਨੇ ਐਤਵਾਰ ਨੂੰ ਕਿਹਾ ਕਿ ਸਮੂਹ ਦਾ ਆਗਾਮੀ ਸੰਮੇਲਨ ਇੱਕ ਮੀਲ ਪੱਥਰ ਸਾਬਤ ਹੋਵੇਗਾ। ਇਹ ਕਾਨਫਰੰਸ 21-22 ਨਵੰਬਰ ਨੂੰ ਵਰਚੁਅਲ ਤਰੀਕੇ ਨਾਲ ਆਯੋਜਿਤ ਹੋਣ ਵਾਲੀ ਹੈ।
ਸਾਊਦੀ ਅਰਬ ਨੇ ਇਹ ਟਿੱਪਣੀ ਅਜਿਹੇ ਸਮੇਂ 'ਚ ਕੀਤੀ ਜਦੋਂ ਕੋਰੋਨਾ ਵਾਇਰਸ ਮਹਾਂਮਾਰੀ ਨਾਲ ਪ੍ਰਭਾਵਿਤ ਵਿਸ਼ਵਵਿਆਪੀ ਆਰਥਿਕਤਾ ਨੂੰ ਉਭਾਰਣ 'ਚ ਮਦਦ ਕਰਨ ਲਈ ਜੀ20 ਨਾਲ ਵਿੱਤੀ ਸਹਾਇਤਾ, ਕਰਜ਼ੇ ਵਿੱਚ ਕਟੌਤੀ ਅਤੇ ਹੋਰ ਵਿੱਤੀ ਉਪਾਵਾਂ ਦੀ ਉਮੀਦ ਕੀਤੀ ਜਾ ਰਹੀ ਹੈ।
ਭਾਰਤ ਵਿੱਚ ਸਾਊਦੀ ਅਰਬ ਦੇ ਰਾਜਦੂਤ ਸਾਊਦ ਬਿਨ ਮੁਹੰਮਦ ਅਲ ਸਤੀ ਨੇ ਕਿਹਾ ਕਿ ਸੰਮੇਲਨ ਵਿੱਚ ਵੱਡੇ ਪੱਧਰ ‘ਤੇ ਕੋਰਨਾ ਮਹਾਂਮਾਰੀ ਨਾਲ ਪ੍ਰਭਾਵਤ, ਭਵਿੱਖ ਵਿੱਚ ਸਿਹਤ ਸੁਰੱਖਿਆ ਦੀਆਂ ਯੋਜਨਾਵਾਂ ਅਤੇ ਵਿਸ਼ਵਵਿਆਪੀ ਅਰਥਚਾਰੇ ਨੂੰ ਮੁੜ ਸੁਰਜੀਤ ਕਰਨ ਦੇ ਕਦਮਾਂ ਉੱਤੇ ਕੇਂਦਰਤ ਕੀਤਾ ਜਾਵੇਗਾ।
ਅਲ ਸਤੀ ਨੇ ਕਿਹਾ ਕਿ ਸਾਊਦੀ ਅਰਬ ਉਸ ਗਿਆਨ ਅਤੇ ਤਜਰਬੇ ਦੀ ਕਦਰ ਕਰਦਾ ਹੈ ਜੋ ਭਾਰਤ ਨੇ ਜੀ -20 ਨੂੰ ਦਿੱਤਾ ਹੈ। ਇਸ ਦੇ ਨਾਲ ਹੀ ਸਾਊਦੀ ਅਰਬ ਮਹਾਂਮਾਰੀ ਨਾਲ ਲੜ੍ਹਨ ਲਈ ਵਿਸ਼ਵ ਦੇ ਕਈ ਦੇਸ਼ਾਂ ਵਿੱਚ ਮੈਡੀਕਲ ਸਮਾਨ ਅਤੇ ਸਪਲਾਈ ਵਧਾਉਣ ਦੇ ਭਾਰਤ ਦੇ ਮਹੱਤਵਪੂਰਣ ਯਤਨਾਂ ਨੂੰ ਵੀ ਅਹਿਮ ਸਮਝਦਾ ਹੈ।
