ਪੇਸ਼ਾਵਰ: ਪਾਕਿਸਤਾਨੀ(Pakistani) ਅਤੇ ਇਤਾਲਵੀ ਪੁਰਾਤੱਤਵ ਵਿਗਿਆਨੀਆਂ ਦੀ ਸਾਂਝੀ ਟੀਮ ਨੇ ਉੱਤਰ-ਪੱਛਮੀ ਪਾਕਿਸਤਾਨ ਵਿੱਚ 2300 ਸਾਲ ਪੁਰਾਣੇ ਬੋਧੀ ਮੰਦਰ(BUDDHIST TEMPLE) ਦੀ ਖੋਜ ਕੀਤੀ ਹੈ। ਇਸ ਦੇ ਨਾਲ ਹੀ ਖੁਦਾਈ ਦੌਰਾਨ ਕੁਝ ਹੋਰ ਕੀਮਤੀ ਵਸਤੂਆਂ ਵੀ ਮਿਲੀਆਂ ਹਨ।
ਇਹ ਮੰਦਰ ਖ਼ੈਬਰ ਪਖਤੂਨਖਵਾ (Khyber Pakhtunkhwa) ਸੂਬੇ ਦੇ ਸਵਾਤ ਜ਼ਿਲ੍ਹੇ ਦੀ ਬਾਰੀਕੋਟ ਤਹਿਸੀਲ ਦੇ ਬੋਧੀ ਕਾਲ ਦੇ ਬਾਜੀਰਾ ਸ਼ਹਿਰ ਵਿੱਚ ਮਿਲਿਆ ਹੈ। ਇਸ ਮੰਦਰ ਨੂੰ ਪਾਕਿਸਤਾਨ ਵਿੱਚ ਬੋਧੀ ਕਾਲ ਦਾ ਸਭ ਤੋਂ ਪੁਰਾਣਾ ਮੰਦਰ ਦੱਸਿਆ ਗਿਆ ਹੈ।
ਇਸ ਸਬੰਧ ਵਿਚ ਇਕ ਸੀਨੀਅਰ ਅਧਿਕਾਰੀ ਨੇ ਕਿਹਾ, "ਪਾਕਿਸਤਾਨ ਅਤੇ ਇਤਾਲਵੀ ਪੁਰਾਤੱਤਵ ਵਿਗਿਆਨੀਆਂ ਨੇ ਉੱਤਰ-ਪੱਛਮੀ ਪਾਕਿਸਤਾਨ ਵਿਚ ਇਕ ਇਤਿਹਾਸਕ ਸਥਾਨ 'ਤੇ ਸਾਂਝੀ ਖੁਦਾਈ ਦੌਰਾਨ ਬੋਧੀ ਕਾਲ ਤੋਂ ਪੁਰਾਣਾ ਇਕ ਮੰਦਰ ਲੱਭਿਆ ਹੈ, 2,300 ਸਾਲ ਪੁਰਾਣਾ ਅਤੇ ਹੋਰ ਕੀਮਤੀ ਵਸਤੂਆਂ ਵੀ ਬਰਾਮਦ ਕੀਤੀਆਂ ਹਨ।" ਸਵਾਤ ਵਿੱਚ ਪਾਇਆ ਗਿਆ ਇਹ ਮੰਦਰ ਪਾਕਿਸਤਾਨ ਦੇ ਟੈਕਸਲਾ ਵਿੱਚ ਪਾਏ ਗਏ ਮੰਦਰਾਂ ਨਾਲੋਂ ਪੁਰਾਣਾ ਹੈ।
ਮੰਦਰ ਤੋਂ ਇਲਾਵਾ ਪੁਰਾਤੱਤਵ-ਵਿਗਿਆਨੀਆਂ ਨੇ 2,700 ਤੋਂ ਵੱਧ ਹੋਰ ਬੋਧੀ ਕਲਾਕ੍ਰਿਤੀਆਂ ਵੀ ਬਰਾਮਦ ਕੀਤੀਆਂ ਹਨ, ਜਿਨ੍ਹਾਂ ਵਿੱਚ ਸਿੱਕੇ, ਮੁੰਦਰੀਆਂ, ਬਰਤਨ ਅਤੇ ਗ੍ਰੀਸ ਦੇ ਰਾਜਾ ਮੀਨੰਦਰ ਦੇ ਸਮੇਂ ਤੋਂ ਖਰੋਸ਼ਥੀ ਭਾਸ਼ਾ ਵਿੱਚ ਲਿਖੀ ਸਮੱਗਰੀ ਸ਼ਾਮਲ ਹੈ।
ਇਟਲੀ ਦੇ ਮਾਹਿਰਾਂ ਨੇ ਭਰੋਸਾ ਪ੍ਰਗਟਾਇਆ ਹੈ ਕਿ ਸਵਾਤ ਜ਼ਿਲ੍ਹੇ ਦੇ ਇਤਿਹਾਸਕ ਸ਼ਹਿਰ ਬਾਜੀਰਾ ਵਿੱਚ ਖੁਦਾਈ ਦੌਰਾਨ ਹੋਰ ਪੁਰਾਤੱਤਵ ਸਥਾਨ ਮਿਲ ਸਕਦੇ ਹਨ। ਪਾਕਿਸਤਾਨ ਵਿੱਚ ਇਟਲੀ ਦੇ ਰਾਜਦੂਤ ਆਂਦਰੇ ਫਰਾਰਿਸ ਨੇ ਪੱਤਰਕਾਰਾਂ ਨੂੰ ਦੱਸਿਆ ਕਿ ਪਾਕਿਸਤਾਨ ਵਿੱਚ ਪੁਰਾਤੱਤਵ ਸਥਾਨ ਦੁਨੀਆਂ ਦੇ ਵੱਖ-ਵੱਖ ਧਰਮਾਂ ਲਈ ਬਹੁਤ ਮਹੱਤਵਪੂਰਨ ਹਨ।
ਇਹ ਵੀ ਪੜ੍ਹੋ:ਤਰਨਤਾਰਨ ਸਰਹੱਦ ’ਤੇ ਬਰਾਮਦ ਡਰੋਨ ਨੂੰ ਲੈ ਕੇ BSF ਵੱਲੋਂ ਵੱਡੇ ਖੁਲਾਸੇ
