ਚੰਡੀਗੜ੍ਹ: ਭਾਵੇਂ ਕਿ ਬਾਲੀਵੁੱਡ ਦੇ ਦਿੱਗਜ ਗੀਤਕਾਰ ਦੇਵ ਕੋਹਲੀ ਅੱਜ ਸਾਡੇ ਵਿੱਚ ਨਹੀਂ ਹਨ, ਪਰ ਉਹਨਾਂ ਦੁਆਰਾ ਰਚੇ ਗੀਤ ਸਦਾ ਲੋਕਾਂ ਦੀ ਜ਼ੁਬਾਨ 'ਤੇ ਰਹਿਣਗੇ। ਗੀਤਕਾਰ ਨੇ ਬਹੁਤ ਸਾਰੀਆਂ ਸੁਪਰਹਿੱਟ ਫਿਲਮਾਂ ਨੂੰ ਲਾਜਵਾਬ ਗੀਤ ਦਿੱਤੇ ਹਨ ਅਤੇ ਬਹੁਤ ਸਾਰੇ ਹਿੱਟ ਸੰਗੀਤ ਨਿਰਦੇਸ਼ਕਾਂ ਦੇ ਨਾਲ ਕੰਮ ਵੀ ਕੀਤਾ ਹੈ। ਇਸ ਸਭ ਕੁੱਝ ਨੂੰ ਜਾਣਨ ਤੋਂ ਬਾਅਦ ਯਕੀਨਨ ਤੁਹਾਡੇ ਦਿਮਾਗ ਵਿੱਚ ਇਹ ਗੱਲ ਆਉਂਦੀ ਹੋਣੀ ਹੈ ਕਿ ਇਸ ਦਿੱਗਜ ਗੀਤਕਾਰ ਨੂੰ ਪਹਿਲਾਂ ਬ੍ਰੇਕ ਕਦੋਂ ਅਤੇ ਕਿਵੇਂ ਮਿਲਿਆ ?
ਕਿਵੇਂ ਸ਼ੁਰੂ ਹੋਇਆ ਲਿਖਣ ਦਾ ਸਿਲਸਿਲਾ: ਇੱਕ ਨਿੱਜੀ ਚੈਨਲ ਨੂੰ ਇੰਟਰਵਿਊ ਦਿੰਦੇ ਹੋਏ ਗੀਤਕਾਰ ਦੱਸਦੇ ਸਨ ਕਿ ਉਹਨਾਂ ਨੂੰ ਲਿਖਣ ਦਾ ਸ਼ੌਂਕ ਉਹਨਾਂ ਦੇ ਗੁਆਂਢ ਵਿੱਚ ਰਹਿੰਦੇ ਇੱਕ 16 ਸਾਲਾਂ ਦੇ ਨੌਜਵਾਨ ਤੋਂ ਪਿਆ। ਉਹ ਦੱਸਦੇ ਸਨ ਕਿ ਉਸ ਸਮੇਂ ਉਹਨਾਂ ਦੀ ਉਮਰ ਸਿਰਫ਼ 10-12 ਸਾਲ ਸੀ ਅਤੇ ਉਹਨਾਂ ਦੇ ਗੁਆਂਢ ਵਿੱਚ ਰਹਿੰਦਾ ਨੌਜਵਾਨ ਉਸ ਨੂੰ ਸ਼ੇਅਰ ਸੁਣਾਇਆ ਕਰਦਾ ਸੀ। ਉਸ ਨੌਜਵਾਨ ਨੂੰ ਸੁਣ ਕੇ ਗੀਤਕਾਰ ਨੂੰ ਵੀ ਲੱਗਿਆ ਕਿ ਇਹ ਕੰਮ ਤਾਂ ਉਹ ਵੀ ਕਰ ਸਕਦੇ ਹਨ। ਬਸ ਫਿਰ ਕੀ ਸੀ, ਗੀਤਕਾਰ ਨੇ ਸ਼ੇਅਰ ਰਚਨੇ ਸ਼ੁਰੂ ਕਰ ਦਿੱਤੇ। ਪਰ ਦਿਲਚਸਪ ਗੱਲ ਇਹ ਸੀ ਕਿ ਗੀਤਕਾਰ ਆਪਣੇ ਸ਼ੇਅਰ ਲਿਖਣ ਬਾਰੇ ਕਿਸੇ ਨੂੰ ਵੀ ਦੱਸਿਆ ਨਹੀਂ ਕਰਦੇ ਸਨ। ਫਿਰ 16-17 ਸਾਲ ਦੀ ਉਮਰ ਤੱਕ ਗੀਤਕਾਰ ਕਾਫੀ ਸੋਹਣਾ ਲਿਖਣ ਲੱਗ ਪਏ। ਜਦੋਂ ਵੀ ਉਹ ਲੋਕਾਂ ਨੂੰ ਕੁੱਝ ਸੁਣਾਉਂਦੇ ਤਾਂ ਲੋਕ ਉਸਦੀ ਰਚਨਾ ਦੀ ਤਾਰੀਫ਼ ਕਰਦੇ। ਫਿਰ ਜਦੋਂ ਗੀਤਕਾਰ ਨੇ ਲੋਕਾਂ ਤੋਂ ਸਲਾਹ ਲੈਣੀ ਸ਼ੁਰੂ ਕੀਤੀ ਤਾਂ ਉਹਨਾਂ ਨੂੰ ਮਹਿਸੂਸ ਹੋਇਆ ਕਿ ਉਹ ਫਿਲਮਾਂ ਵਿੱਚ ਵੀ ਆਪਣੇ ਗੀਤ ਦੇ ਸਕਦੇ ਹਨ।
- Dev Kohli Death News: ਗੀਤਕਾਰ ਦੇਵ ਕੋਹਲੀ ਦਾ 81 ਸਾਲ ਦੀ ਉਮਰ 'ਚ ਹੋਇਆ ਦੇਹਾਂਤ, 100 ਤੋਂ ਵੱਧ ਫਿਲਮਾਂ ਲਈ ਲਿਖੇ ਸਨ ਗੀਤ
- Mastaney Box Office Collection: ਲੋਕਾਂ ਨੂੰ ਖੁਸ਼ ਕਰਨ 'ਚ ਸਫ਼ਲ ਰਹੀ ਫਿਲਮ 'ਮਸਤਾਨੇ', ਪਹਿਲੇ ਦਿਨ ਕੀਤੀ ਇੰਨੀ ਕਮਾਈ
- White Punjab First Look: ਪੰਜਾਬੀ ਫਿਲਮ ‘ਵਾਈਟ ਪੰਜਾਬ’ ਦਾ ਪਹਿਲਾਂ ਲੁੱਕ ਹੋਇਆ ਰਿਲੀਜ਼, ਗਾਇਕ ਕਾਕਾ ਕਰੇਗਾ ਸਿਲਵਰ ਸਕਰੀਨ 'ਤੇ ਸ਼ਾਨਦਾਰ ਡੈਬਿਊ
ਗੀਤਕਾਰ ਨੂੰ ਇੰਝ ਮਿਲਿਆ ਸੀ ਪਹਿਲਾਂ ਮੌਕਾ: 22 ਸਾਲ ਦੀ ਉਮਰ ਵਿੱਚ ਜਦੋਂ ਗੀਤਕਾਰ ਦੇਹਰਾਦੂਨ ਤੋਂ ਮੁੰਬਈ ਆਏ ਤਾਂ ਉਹਨਾਂ ਨੇ ਇਥੇ ਆ ਕੇ ਜਦੋ-ਜਹਿਦ ਕਰਨੀ ਸ਼ੁਰੂ ਕਰ ਦਿੱਤੀ। ਫਿਲਮ ਜਗਤ ਦੇ ਲੋਕਾਂ ਨਾਲ ਸੰਬੰਧ ਬਣਾਉਣੇ ਸ਼ੁਰੂ ਕਰ ਦਿੱਤੇ। ਉਹਨਾਂ ਨਾਲ ਮਿਲਦੇ ਰਹਿੰਦੇ। ਫਿਰ ਉਹਨਾਂ ਨੂੰ ਪਹਿਲਾਂ ਮੌਕਾ ਸ਼ੰਕਰ ਜੈਕਿਸ਼ਨ ਨੇ ਦਿੱਤਾ। ਸ਼ੰਕਰ ਜੈਕਿਸ਼ਨ ਉਸ ਸਮੇਂ ਦੇ ਸੰਗੀਤ ਜਗਤ ਦੀ ਸਰਬੋਤਮ ਜੋੜੀ ਮੰਨੀ ਜਾਂਦੀ ਸੀ। ਉਹਨਾਂ ਨੇ ਜਦੋਂ ਗੀਤਕਾਰ ਨੂੰ ਪਹਿਲੀ ਵਾਰ ਸੁਣਿਆ ਤਾਂ ਉਹਨਾਂ ਨੇ ਗੀਤਕਾਰ ਨੂੰ ਪਹਿਲਾਂ ਮੌਕਾ ਦੇ ਦਿੱਤਾ।
ਗੀਤਕਾਰ ਦਾ ਪਹਿਲਾਂ ਗੀਤ: ਦੇਵ ਕੋਹਲੀ ਦਾ ਪਹਿਲਾਂ ਗੀਤ ਫਿਲਮ 'ਲਾਲ ਪੱਥਰ' ਦਾ 'ਗੀਤ ਗਾਤਾ ਹੂੰ ਮੈਂ' ਸੀ। ਗੀਤ ਨੂੰ ਕਾਫੀ ਪਸੰਦ ਕੀਤਾ ਗਿਆ ਸੀ, ਭਾਵੇਂ ਕਿ ਗੀਤ ਕਾਫੀ ਹਿੱਟ ਹੋਇਆ ਸੀ ਪਰ ਗੀਤਕਾਰ ਜਿਆਦਾ ਮਸ਼ਹੂਰ ਨਾ ਹੋ ਸਕਿਆ, ਕਿਉਂਕਿ ਗੀਤ ਨੂੰ ਸਭ ਜਾਣਦੇ ਸਨ ਪਰ ਇਸ ਨੂੰ ਲਿਖਿਆ ਕਿਸ ਨੇ ਇਸ ਬਾਰੇ ਜਿਆਦਾ ਲੋਕ ਨਹੀਂ ਜਾਣਦੇ ਸਨ। ਫਿਰ ਗੀਤਕਾਰ ਨੇ 10 ਸਾਲ ਸੰਘਰਸ਼ ਕੀਤਾ ਅਤੇ 1989 ਵਿੱਚ ਫਿਲਮ 'ਮੈਂਨੇ ਪਿਆਰ ਕੀਆ' ਤੋਂ ਬਾਅਦ ਗੀਤਕਾਰ ਕੋਹਲੀ ਨੂੰ ਇੱਕ ਪਹਿਚਾਣ ਮਿਲੀ।
