ਲੁਧਿਆਣਾ: ਪੰਜਾਬ ਵਿੱਚ ਕੋਰੋਨਾ ਦਾ ਸਕੰਟ ਦਿਨੋਂ ਦਿਨ ਡੂੰਘਾ ਹੀ ਹੁੰਦਾ ਜਾ ਰਿਹਾ ਹੈ । ਇਸੇ ਨੂੰ ਲੈ ਕੇ ਸਰਕਾਰ ਵੀ ਇੱਕ ਵਾਰ ਮੁੜ ਹਰਕਤ ਵਿੱਚ ਆਈ ਵਿਖਾਈ ਦਿੰਦੀ ਹੈ। ਪੰਜਾਬ ਸਰਕਾਰ ਨੇ ਜਿੱਥੇ ਕਰਫਿਊ ਤੋਂ ਬਾਅਦ ਆਮ ਲੋਕਾਂ ਲਈ ਕਈ ਤਰ੍ਹਾਂ ਢਿੱਲਾਂ ਦਿੱਤੀਆਂ ਸਨ, ਉਨ੍ਹਾਂ ਢਿੱਲਾਂ ਵਿੱਚ ਮੁੜ ਕਟੌਤੀ ਕੀਤੀ ਹੈ। ਪੰਜਾਬ ਸਰਕਾਰ ਨੇ ਇਸ ਨਾਲ ਹੀ ਵਿਆਹ ਸਮਾਗਮਾਂ ਵਿੱਚ 30 ਲੋਕਾਂ ਦੇ ਸ਼ਾਮਲ ਹੋਣ ਦੀ ਹੀ ਆਗਿਆ ਦਿੱਤੀ ਹੈ। ਇਸ ਨਾਲ ਜਿੱਥੇ ਪਹਿਲਾਂ ਤੋਂ ਆਰਥਿਕ ਮੰਦੀ ਨਾਲ ਜੂਝ ਰਹੀ ਹੋਟਲ ਸਨਅਤ 'ਤੇ ਮੁੜ ਮੰਦੀ ਦੇ ਕਾਲੇ ਬੱਦਲ ਛਾਅ ਗਏ ਹਨ। ਹੋਟਲ ਸਨਅਨਤਕਾਰਾਂ ਦਾ ਕਹਿਣਾ ਹੈ ਕਿ ਉਨ੍ਹਾਂ ਦਾ ਕੰਮ ਥੋੜ੍ਹਾ ਜਿਹਾ ਚੱਲਿਆ ਸੀ ਪਰ ਸਰਕਾਰ ਦੇ ਇਸ ਫੈਸਲੇ ਨਾਲ ਇੱਕ ਵਾਰ ਮੁੱੜ ਉਨ੍ਹਾਂ ਦੀਆਂ ਉਮੀਦਾਂ 'ਤੇ ਪਾਣੀ ਫੇਰ ਦਿੱਤਾ ਹੈ। ਹੋਟਲ ਮਾਲਕਾਂ ਦਾ ਕਹਿਣਾ ਹੈ ਕਿ ਸਰਕਾਰ ਦੇ ਇਸ ਫੈਸਲੇ ਤੋਂ ਬਾਅਦ ਜਿੰਨ੍ਹਾਂ ਲੋਕਾਂ ਨੇ ਬੁਕਿੰਗਾਂ ਕਰਵਾਈਆਂ ਸਨ ਹੁਣ ਉਹ ਕੈਂਸਲ ਕਰਵਾ ਰਹੇ ਹਨ।
ਲੁਧਿਆਣਾ ਦੇ ਇੱਕ ਮਸ਼ਹੂਰ ਨਿੱਜੀ ਹੋਟਲ ਦੇ ਐੱਮਡੀ ਗੁਰਦੀਪ ਸਿੰਘ ਨੇ ਦੱਸਿਆ ਕਿ ਪਹਿਲਾਂ ਜਦੋਂ ਸਰਕਾਰ ਨੇ 50 ਲੋਕਾਂ ਨੂੰ ਵਿਆਹ 'ਚ ਇਕੱਠੇ ਹੋਣ ਦੀ ਇਜਾਜ਼ਤ ਦਿੱਤੀ ਸੀ ਤਾਂ ਉਹ ਛੋਟੇ ਪ੍ਰੋਗਰਾਮ ਕਰਵਾਉਣ ਲੱਗ ਗਏ ਸਨ। ਹੁਣ ਇਸ ਵਿੱਚ ਕਟੌਤੀ ਕਰਕੇ 30 ਕਰ ਦਿੱਤੀ ਗਈ ਹੈ ਅਤੇ ਘੱਟ ਲੋਕਾਂ 'ਚ ਪ੍ਰੋਗਰਾਮ ਕਰਵਾਉਣੇ ਸੰਭਵ ਨਹੀਂ। ਇਸ ਨਾਲ ਨਾ ਤਾਂ ਹੋਟਲ ਦਾ ਖਰਚਾ ਪੂਰਾ ਹੋਵੇਗਾ ਅਤੇ ਨਾ ਹੀ ਵਿਆਹ ਕਰਵਾਉਣ ਵਾਲੇ ਹੋਟਲ ਬੁੱਕ ਕਰਵਾਉਣਗੇ।
ਉਨ੍ਹਾਂ ਕਿਹਾ ਕਿ ਸਟਾਫ਼ ਪੂਰਾ ਆ ਰਿਹਾ ਹੈ ਪਰ ਹੁਣ ਲੱਗਦਾ ਹੈ ਕਿ ਕਟੌਤੀ ਕਰਨੀ ਹੋਵੇਗੀ। ਗੁਰਦੀਪ ਸਿੰਘ ਨੇ ਕਿਹਾ ਕਿ ਡਾਇਨਇੰਗ ਦੀ ਸੇਵਾ ਤੋਂ ਵੀ ਲੋਕ ਡਰੇ ਹੋਏ ਨੇ ਬਹੁਤ ਲੋਕ ਇਸ ਵਿੱਚ ਰੁਚੀ ਨਹੀਂ ਦਿਖਾ ਰਹੇ ਅਤੇ ਉਨ੍ਹਾਂ ਦੇ ਖਰਚੇ ਵੀ ਪੂਰੇ ਨਹੀਂ ਹੁੰਦੇ। ਉਨ੍ਹਾਂ ਕਿਹਾ ਕਿ ਕੋਰੋਨਾ ਸਕੰਟ ਦੇ ਕਾਰਨ ਹੋਟਲ ਕਾਰੋਬਾਰ ਇੱਕ ਸਾਲ ਪਿੱਛੇ ਚਲਾ ਗਿਆ ਹੈ। ਉਨ੍ਹਾਂ ਕਿਹਾ ਹੋਟਲ ਸਨਅਤ ਵਿੱਚ ਵੱਡੇ ਪੱਧਰ 'ਤੇ ਕਰਜ਼ੇ 'ਤੇ ਕੰਮ ਚੱਲਦਾ ਹੈ। ਜੇਕਰ ਅਜਿਹਾ ਹਾਲ ਰਿਹਾ ਤਾਂ ਹੋਟਲ ਬੰਦ ਕਰਨੇ ਪੈਣਗੇ ਕਿਉਂਕਿ ਉਨ੍ਹਾਂ 'ਤੇ ਵੱਡੇ ਕਰਜ਼ੇ ਨੇ ਜਿਨ੍ਹਾਂ ਨੂੰ ਚੁਕਾਉਣਾ ਮੁਮਕਿਨ ਨਹੀਂ। ਉਨ੍ਹਾਂ ਕਿਹਾ ਕਿ ਸਰਕਾਰ ਨੂੰ ਇਸ ਦਾ ਕੋਈ ਹੱਲ ਕਰਨਾ ਚਾਹੀਦਾ ਹੈ ਹੋਟਲ ਐਸੋਸੀਏਸ਼ਨ ਨਾਲ ਬੈਠਕਾਂ ਕਰਕੇ ਮੰਦੀ ਦੇ ਦੌਰ 'ਚੋਂ ਲੰਘ ਰਹੇ ਹੋਟਲ ਕਾਰੋਬਾਰ ਨੂੰ ਕੱਢਣ ਲਈ ਉਪਰਾਲੇ ਕਰਨ ਦੀ ਲੋੜ ਹੈ।
ਕੋਰੋਨਾ ਸਕੰਟ ਨੇ ਸਾਰੀ ਹੀ ਆਰਥਿਕਤਾ ਨੂੰ ਵੱਡੀ ਸੱਟ ਮਾਰੀ ਹੈ। ਇਸੇ ਦਾ ਸ਼ਿਕਾਰ ਹੋਟਲ ਸਨਅਤ ਵੀ ਹੋਈ ਹੈ। ਹੁਣ ਵੇਖਣਾ ਇਹ ਹੋਵੇਗਾ ਕਿ ਸੂਬਾ ਸਰਕਾਰ ਇਸ ਡੁੱਬ ਦੀ ਹੋਈ ਸਨਅਤ ਨੂੰ ਬਚਾਉਣ ਲਈ ਕੋਈ ਕਦਮ ਚੁੱਕੀ ਹੈ ਜਾਂ ਨਹੀਂ। ਜੇਕਰ ਸਰਕਾਰ ਨੇ ਇਸ ਸਨਅਤ ਦੀ ਬਾਹ ਨਾ ਫੜ੍ਹੀ ਤਾਂ ਇਸ ਸਨਅਤ ਨੂੰ ਇਸ ਕੋੋਰੋਨਾ ਸਕੰਟ ਵਿੱਚੋਂ ਬਾਹਰ ਕੱਢਣਾ ਮੁਸ਼ਕਲ ਹੋ ਜਾਵੇਗਾ।
