ਚੰਡੀਗੜ੍ਹ : ਕੋਰੋਨਾ ਦੇ ਮਾਮਲਿਆਂ (cases of Corona) ਨੇ ਪੰਜਾਬ 'ਚ ਇੱਕ ਵਾਰ ਮੁੜ ਤੋਂ ਤੇਜ਼ੀ ਫੜੀ ਹੈ। ਦਸੰਬਰ ਮਹੀਨੇ ਦੀ ਗੱਲ ਕੀਤੀ ਜਾਵੇ ਤਾਂ ਪਿਛਲੇ ਤਿੰਨ ਦਿਨਾਂ 'ਚ ਕੋਰੋਨਾ ਦੇ ਮਾਮਲੇ ਰੋਜ਼ਾਨਾ ਸੈਂਕੜਾ ਪਾਰ ਕਰ ਰਹੇ ਹਨ। ਇਸ ਤੋਂ ਪਹਿਲਾਂ ਰੋਜ਼ਾਨਾ 24 ਘੰਟਿਆਂ 'ਚ ਕੋਰੋਨਾ ਦੇ ਕੇਸ ਲੱਗਭਗ ਦਿਹਾਈ ਦੇ ਅੰਕੜੇ 'ਚ ਰਹਿੰਦੇ ਸਨ। ਇਸ ਦੇ ਬਾਵਜੂਦ ਸਿਆਸੀ ਪਾਰਟੀਆਂ ਵਲੋਂ ਆਪਣੇ ਪ੍ਰਚਾਰ (Their propaganda by political parties) 'ਚ ਹਨੇਰੀ ਲਿਆਉਂਦੀ ਜਾ ਰਹੀ ਹੈ।
ਪਿਛਲੇ 48 ਘੰਟਿਆਂ 'ਚ 267 ਮਾਮਲੇ
ਸੂਬੇ 'ਚ ਕੋਰੋਨਾ ਮਾਮਲੇ ਦੀ ਗੱਲ ਕੀਤੀ ਜਾਵੇ ਤਾਂ ਪਿਛਲੇ 48 ਘੰਟਿਆਂ 'ਚ 267 ਨਵੇਂ ਮਾਮਲੇ ਸਾਹਮਣੇ ਆਏ ਹਨ। ਇਸ 'ਚ 29 ਦਸੰਬਰ ਨੂੰ 100 ਮਾਮਲੇ ਕੋਰੋਨਾ ਦੇ ਸਾਹਮਣੇ ਆਏ ਸਨ, ਜਦਕਿ 30 ਦਸੰਬਰ ਨੂੰ ਕੋਰੋਨਾ ਮਾਮਲੇ ਦੀ ਗਿਣਤੀ ਵੱਧ ਗਈ ਅਤੇ 167 ਕੋਰੋਨਾ ਦੇ ਮਾਮਲੇ ਨਵੇਂ ਸਾਹਮਣੇ ਆਏ ਸਨ। ਜਦਕਿ ਇਸ ਤੋਂ ਪਹਿਲਾਂ ਰੋਜ਼ਾਨਾ ਕੋਰੋਨਾ ਕੇਸਾਂ ਦਾ ਅੰਕੜਾ 50 ਦੀ ਗਿਣਤੀ ਨਹੀਂ ਲੰਘਦਾ ਸੀ।
ਓਮੀਕਰੋਨ ਦਾ ਆਇਆ ਸੀ ਕੇਸ
ਪੰਜਾਬ ਦੇ ਜ਼ਿਲ੍ਹਾ ਨਵਾਂਸ਼ਹਿਰ ਦੇ ਮੁਕੰਦਪੁਰ ਬਲਾਕ ਦੇ ਪਿੰਡ ਚੱਕ ਰਾਮੂ 'ਚ ਪਿਛਲੇ ਦਿਨੀਂ ਓਮੀਕਰੋਨ ਦਾ ਪਹਿਲਾ ਮਾਮਲਾ ਵੀ ਸਾਹਮਣੇ ਆਇਆ ਸੀ। ਉਕਤ ਮਰੀਜ਼ ਸਪੇਨ ਤੋਂ ਭਾਰਤ ਆਇਆ ਸੀ, ਜਿਸ ਦੀ ਕੋਰੋਨਾ ਰਿਪੋਰਟ ਪੌਜ਼ੀਟਿਵ ਆਈ ਸੀ ਅਤੇ ਓਮੀਕਰੋਨ ਦਾ ਸੈਂਪਲ ਪਟਿਆਲਾ ਦੀ ਕੋਵਿਡ ਜੇਨਿਮ ਸੀਕਵੈਂਸੀ ਲੈਬ 'ਚ ਭੇਜਿਆ ਗਿਆ ਸੀ ਤਾਂ ਉਹ ਵੀ ਪੌਜ਼ੀਟਵ ਪਾਇਆ ਗਿਆ ਸੀ। ਪਰ ਨਾਲ ਹੀ ਰਾਹਤ ਦੀ ਖ਼ਬਰ ਸੀ ਕਿ ਮਰੀਜ਼ ਦਾ ਦੂਜਾ ਸੈਂਪਲ ਜਦੋਂ ਲਿਆ ਗਿਆ ਤਾਂ ਉਹ ਨੈਗੇਟਿਵ ਆਇਆ ਸੀ।
ਪਠਾਨਕੋਟ ਅਤੇ ਪਟਿਆਲਾ ਵੱਧ ਪ੍ਰਭਾਵਿਤ
ਪਿਛਲੇ ਕੁਝ ਦਿਨਾਂ ਤੋਂ ਸੂਬੇ 'ਚ ਵੱਧ ਰਹੇ ਕੇਸਾਂ 'ਚ ਸਭ ਤੋਂ ਵੱਧ ਮਾਮਲੇ ਪਠਾਨਕੋਟ ਤੋਂ ਸਾਹਮਣੇ ਆ ਰਹੇ ਹਨ। ਉਸ ਤੋਂ ਬਾਅਦ ਦੂਜੇ ਨੰਬਰ 'ਤੇ ਪਟਿਆਲਾ ਜਿਥੋਂ ਕੋਰੋਨਾ ਦੇ ਮਾਮਲੇ ਤੇਜ਼ੀ ਨਾਲ ਆ ਰਹੇ ਹਨ। ਪਠਾਨਕੋਟ 'ਚ 29 ਦਸੰਬਰ ਨੂੰ 26 ਕੇਸ ਜਦ ਕਿ 30 ਦਸੰਬਰ ਨੂੰ 46 ਕੇਸ ਸਾਹਮਣੇ ਆਏ ਹਨ। ਇਸ ਦੇ ਨਾਲ ਹੀ ਪਟਿਆਲਾ 'ਚ 29 ਦਸੰਬਰ ਨੂੰ 18 ਕੇਸ ਜਦ ਕਿ 30 ਦਸੰਬਰ ਨੂੰ 39 ਕੇਸ ਸਾਹਮਣੇ ਆਏ ਹਨ।
ਪੰਜਾਬ 'ਚ ਚੋਣ ਰੈਲੀਆਂ
ਇਸ ਦੇ ਨਾਲ ਹੀ ਪੰਜਾਬ 'ਚ ਅਗਾਮੀ ਵਿਧਾਨਸਭਾ ਚੋਣਾਂ ਕਾਰਨ ਹਰ ਇੱਕ ਪਾਰਟੀ ਵਲੋਂ ਪੂਰਾ ਜ਼ੋਰ ਲਗਾਇਆ ਜਾ ਰਿਹਾ ਹੈ। ਜਿਸ ਦੇ ਤਹਿਤ ਵੱਖ-ਵੱਖ ਸਿਆਸੀ ਪਾਰਟੀਆਂ ਵਲੋਂ ਵੱਡੇ-ਵੱਡੇ ਇਕੱਠ ਨਾਲ ਚੋਣ ਰੈਲੀਆਂ ਕੀਤੀਆਂ ਜਾ ਰਹੀਆਂ ਹਨ। ਇਸ 'ਚ ਕਾਂਗਰਸ ਵਲੋਂ ਜਿਥੇ ਵੱਡੇ-ਵੱਡੇ ਇਕੱਠ ਕੀਤੇ ਜਾ ਰਹੇ ਹਨ ਤਾਂ ਸ਼੍ਰੋਮਣੀ ਅਕਾਲੀ ਦਲ ਅਤੇ ਆਮ ਆਦਮੀ ਪਾਰਟੀ ਵਲੋਂ ਰੋਡ ਰੈਲੀਆਂ ਕੀਤੀਆਂ ਜਾ ਰਹੀਆਂ ਹਨ।
ਇਹ ਵੀ ਪੜ੍ਹੋ : ਅਲਵਿਦਾ-2021:ਪੂਰਾ ਸਾਲ ਗਰਮ ਰਹੀ ਪੰਜਾਬ ਦੀ ਸਿਆਸਤ
'ਦਿੱਲੀ 'ਚ ਪਾਬੰਦੀਆਂ ਤੇ ਨਾਈਟ ਕਰਫਿਊ'
ਕੋਰਨਾ ਅਤੇ ਓਮੀਕਰੋਨ ਦੇ ਖ਼ਤਰੇ ਦੇ ਮੱਦੇਨਜ਼ਰ ਦਿੱਲੀ ਸਰਕਾਰ ਵਲੋਂ ਨਵੇਂ ਸਾਲ ਦੀ ਆਮਦ ਮੌਕੇ ਜਿਥੇ ਦਿੱਲੀ 'ਚ ਰੈਸਟਰੈਂਟ , ਸਿਨੇਮਾ , ਪਾਰਕ, ਸਮਾਗਮ ਆਦਿ 'ਤੇ ਪਾਬੰਦੀਆਂ ਲਗਾਈਆਂ ਗਈਆਂ ਹਨ, ਉਥੇ ਹੀ ਦਿੱਲੀ 'ਚ ਨਾਈਟ ਕਰਫਿਊ ਵੀ ਲਗਾਇਆ ਗਿਆ ਹੈ। ਇਸ ਦੇ ਨਾਲ ਹੀ ਖਾਸ ਗੱਲ ਇਹ ਹੈ ਕਿ ਅਰਵਿੰਦ ਕੇਜਰੀਵਾਲ ਵਲੋਂ ਦਿੱਲੀ 'ਚ ਸਖ਼ਤੀ ਕਰਕੇ ਪੰਜਾਬ 'ਚ ਵੱਡੇ-ਵੱਡੇ ਚੋਣ ਪ੍ਰਚਾਰ ਅਤੇ ਰੈਲੀਆਂ ਕੀਤੀਆਂ ਜਾ ਰਹੀਆਂ ਹਨ।
'ਪੰਜਾਬ 'ਚ ਹਾਲੇ ਨਾਈਟ ਕਰਫਿਊਂ ਨਹੀਂ'
ਪੰਜਾਬ 'ਚ ਭਾਵੇਂ ਕਿ ਪਿਛਲੇ ਕੁਝ ਦਿਨਾਂ ਤੋਂ ਕੋਰੋਨਾ ਦੇ ਅੰਕੜੇ ਸੈਂਕੜਾ ਪਾਰ ਕਰ ਰਹੇ ਹਨ ਅਤੇ ਪੰਜਾਬ ਨਾਲ ਲੱਗਦੇ ਸੂਬੇ ਹਰਿਆਣਾ ਵਲੋਂ ਵੀ ਨਾਈਟ ਕਰਫਿਊ ਲਗਾ ਦਿੱਤਾ ਗਿਆ ਹੈ ਪਰ ਇਸ ਦੇ ਨਾਲ ਹੀ ਪੰਜਾਬ ਦੇ ਉਪ ਮੁੱਖ ਮੰਤਰੀ ਅਤੇ ਸਿਹਤ ਮੰਤਰੀ ਓ.ਪੀ ਸੋਨੀ ਵਲੋਂ ਪਿਛਲੇ ਦਿਨੀਂ ਬਿਆਨ ਦਿੱਤਾ ਸੀ ਕਿ ਪੰਜਾਬ 'ਚ ਹਾਲੇ ਨਾਈਟ ਕਰਫਿਊ ਦੀ ਜ਼ਰੂਰਤ ਨਹੀਂ ਹੈ।
'15 ਜਨਵਰੀ ਤੋਂ ਪੰਜਾਬ 'ਚ ਪਾਬੰਦੀਆਂ'
ਇਸ ਦੇ ਨਾਲ ਹੀ ਪੰਜਾਬ ਸਰਕਾਰ ਵਲੋਂ ਕੋਰੋਨਾ ਹਦਾਇਤਾਂ ਦਿੱਤੀਆਂ ਹਨ, ਜੋ 15 ਜਨਵਰੀ ਤੋਂ ਸੂਬੇ 'ਚ ਲਾਗੂ ਹੋਣਗੀਆਂ। ਕੋਰੋਨਾ ਅਤੇ ਓਮੀਕਰੋਨ ਦੇ ਚੱਲਦਿਆਂ ਸਰਕਾਰ ਨੇ ਹਦਾਇਤ ਕੀਤੀ ਕਿ ਜਿਸ ਨੇ ਵੈਕਸੀਨ ਨਹੀਂ ਲਗਵਾਈ ਉਸ ਨੂੰ ਜਨਤਕ ਥਾਵਾਂ, ਵਿਆਹ ਸਮਾਗਮ, ਧਾਰਮਿਕ ਸਮਾਗਮ ਅਤੇ ਪਬਲਿਕ ਟਰਾਂਸਪੋਰਟ 'ਚ ਸਫ਼ਰ ਕਰਨ 'ਤੇ ਪਾਬੰਦੀ ਹੋਵੇਗੀ।
ਜਿੱਥੇ ਜ਼ਿਆਦਾ ਭੀੜ ਹੈ ਖਾਸ ਕਰਕੇ ਸਬਜ਼ੀ ਮੰਡੀ, ਅਨਾਜ ਮੰਡੀ, ਜਨਤਕ ਟਰਾਂਸਪੋਰਟ, ਮਾਲ, ਸ਼ਾਪਿੰਗ ਕੰਪਲੈਕਸ, ਸਥਾਨਕ ਬਾਜ਼ਾਰ ਅਤੇ ਜਿੱਥੇ ਜ਼ਿਆਦਾ ਲੋਕ ਹਨ 15 ਜਨਵਰੀ ਤੋਂ ਸਿਰਫ਼ ਉਨ੍ਹਾਂ ਲੋਕਾਂ ਨੂੰ ਹੀ ਇਜਾਜ਼ਤ ਦਿੱਤੀ ਜਾਵੇਗੀ ਜਿਨ੍ਹਾਂ ਨੇ ਟੀਕਾਕਰਨ ਦੀਆਂ ਦੋਵੇਂ ਖੁਰਾਕਾਂ ਲਈਆਂ ਹੋਣ। ਇਸ ਤੋਂ ਇਲਾਵਾ ਪੰਜਾਬ ਦੇ ਸਾਰੇ ਸਰਕਾਰੀ ਦਫ਼ਤਰਾਂ 'ਚ ਵੀ ਉਨ੍ਹਾਂ ਲੋਕਾਂ ਨੂੰ ਜਾਣ ਦੀ ਇਜਾਜ਼ਤ ਦਿੱਤੀ ਜਾਵੇਗੀ, ਜਿਨ੍ਹਾਂ ਨੇ ਕੋਵਿਡ ਦੀਆਂ ਦੋਵੇਂ ਡੋਜ਼ ਲਗਵਾ ਲਈਆਂ ਹੋਣ।
ਇਹ ਵੀ ਪੜ੍ਹੋ : ਹੁਣ ਪਰਫਿਊਮ ਕਾਰੋਬਾਰੀ ਪੁੁਸ਼ਪਰਾਜ ਜੈਨ ਦੇ ਘਰ ਛਾਪੇਮਾਰੀ, ਸਪਾ ਬੁਖਲਾਈ
