ਨਵੀਂ ਦਿੱਲੀ : ਦੂਰਸੰਚਾਰ ਕੰਪਨੀ ਭਾਰਤੀ ਏਅਰਟੈੱਲ ਨੇ ਹਰਿਆਣਾ ਵਿੱਚ ਆਪਣਾ 3ਜੀ ਨੈਟਵਰਕ ਬੰਦ ਕਰ ਦਿੱਤਾ ਹੈ। 3ਜੀ ਨੈੱਟਵਰਕ ਦੇ ਗਾਹਕਾਂ ਨੂੰ ਕੰਪਨੀ ਨੇ 4ਜੀ ਵਿੱਚ ਤਬਦੀਲ ਕਰ ਦਿੱਤਾ ਹੈ। ਕੰਪਨੀ ਦਾ ਟੀਚਾ ਹੋਲੀ-ਹੋਲੀ ਦੇਸ਼ ਵਿੱਚੋਂ 3ਜੀ ਨੈੱਟਵਰਕ ਨੂੰ ਬੰਦ ਕਰਨ ਦਾ ਹੈ। ਇਸੇ ਦੇ ਅਧੀਨ ਇਹ ਕਦਮ ਚੁੱਕਿਆ ਗਿਆ ਹੈ।
ਏਅਰਟੈੱਲ ਨੇ ਬਿਆਨ ਵਿੱਚ ਕਿਹਾ ਹੈ ਕਿ ਹਰਿਆਣਾ ਵਿੱਚ ਗਾਹਕਾਂ ਨੂੰ ਹੁਣ ਏਅਰਟੈੱਲ ਮੋਬਾਈਲ ਬ੍ਰਾਡਬੈਂਡ ਸੇਵਾਵਾਂ ਤੇਜ਼ ਗਤੀ ਦੇ 4ਜੀ ਨੈੱਟਵਰਕ ਉੱਤੇ ਐੱਚਡੀ ਗੁਣਵੱਤਾ ਵਾਲੀ ਵੋਲਟ ਕਾਲਿੰਗ ਦੇ ਨਾਲ ਉਪਲੱਬਧ ਹੋਵੇਗੀ। ਕੋਲਕਾਤਾ ਤੋਂ ਬਾਅਦ ਹਰਿਆਣਾ ਦੂਸਰਾ ਸੂਬਾ ਹੈ, ਜਿਥੇ ਏਅਰਟੈੱਲ ਨੇ 3ਜੀ ਸੇਵਾਵਾਂ ਨੂੰ ਬੰਦ ਕਰ ਦਿੱਤਾ ਹੈ।
ਕੰਪਨੀ ਨੇ ਕਿਹਾ ਕਿ ਏਅਰਟੈੱਲ 3ਜੀ ਦੇ ਗਾਹਕਾਂ ਨੂੰ ਇਸ ਦੀ ਸੂਚਨਾ ਦਿੱਤੀ ਗਈ ਹੈ ਅਤੇ ਉਨ੍ਹਾਂ ਨੂੰ ਆਪਣੇ ਮੋਬਾਈਲਾਂ ਅਤੇ ਸਿਮਾਂ ਨੂੰ 4ਜੀ ਲਈ ਅਪਡੇਟ ਕਰਵਾਉਣ ਲਈ ਕਿਹਾ ਗਿਆ ਹੈ।
ਹਾਲਾਂਕਿ, ਫ਼ੀਚਰ ਫ਼ੋਨ ਦੇ ਗਾਹਕਾਂ ਦੀ ਸੰਪਰਕ ਦੀ ਜ਼ਰੂਰਤ ਦੇ ਮੱਦੇਨਜ਼ਰ ਏਅਰਟੈੱਲ ਨੇ ਹਰਿਆਣਾ ਵਿੱਚ 2ਜੀ ਸੇਵਾਵਾਂ ਨੂੰ ਜਾਰੀ ਕਰਨ ਦਾ ਫ਼ੈਸਲਾ ਕੀਤਾ ਹੈ।
ਇਹ ਵੀ ਪੜ੍ਹੋ : ਹੁਣ ਜਿਓ ਤੋਂ ਹੋਰ ਨੈਟਵਰਕ ਉੱਤੇ ਕਾਲ ਕਰਨ ਲਈ ਲਗਣਗੇ 6 ਪੈਸੇ ਪ੍ਰਤੀ ਮਿੰਟ
