ਨਵੀਂ ਦਿੱਲੀ: ਦੇਸ਼ ਦੀ ਅਰਥ-ਵਿਵਸਥਾ ਨੂੰ ਪੱਟੜੀ ਉੱਤੇ ਵਾਪਸ ਲਿਆਉਣ ਦੇ ਮੱਦੇਨਜ਼ਰ ਕੋਰੋਨਾ ਵਾਇਰਸ ਮਹਾਂਮਾਰੀ ਦੀ ਰੋਕਥਾਮ ਦੇ ਲਈ ਲਾਗੂ ਕੀਤੇ ਗਏ ਦੇਸ਼ਵਿਆਪੀ ਲੌਕਡਾਊਨ ਦੇ ਵਿਚਕਾਰ ਕੁੱਝ ਇਲਾਕਿਆਂ ਵਿੱਚ ਢਿੱਲ ਦਿੱਤੀ ਗਈ ਹੈ, ਅਜਿਹੇ ਵਿੱਚ ਕੇਂਦਰ ਨੇ ਲੌਕਡਾਊਨ ਤੋਂ ਬਾਅਦ ਉਤਪਾਦਨ ਉਦਯੋਗ ਨੂੰ ਦੁਬਾਰਾ ਸ਼ੁਰੂ ਕਰਨ ਨੂੰ ਲੈ ਕੇ ਨਵੀਆਂ ਹਦਾਇਤਾਂ ਜਾਰੀ ਕੀਤੀਆਂ ਹਨ।
ਕੇਂਦਰ ਸਰਕਾਰ ਨੇ ਨਿਰਮਾਣ ਇਕਾਈਆਂ (ਉਤਪਾਦਨ ਰਿੰਗ ਯੂਨਿਟਾਂ) ਨੂੰ ਪੋਸਟ ਲੌਕਡਾਊਨ ਦੇ ਲਈ ਦਿਸ਼ਾ-ਨਿਰਦੇਸ਼ ਜਾਰੀ ਕਰਦੇ ਹੋਏ ਕਿਹਾ ਕਿ ਉਹ ਉੱਚ ਉਤਪਾਦਨ ਟੀਚਾ ਹਾਸਲ ਕਰਨ ਦੀ ਕੋਸ਼ਿਸ਼ ਨਾ ਕਰਨ।
ਸਰਕਾਰ ਵੱਲੋਂ ਜਾਰੀ ਕੀਤੀ ਗਈਆਂ ਹਦਾਇਤਾਂ ਵਿੱਚ ਕਿਹਾ ਗਿਆ ਹੈ ਕਿ ਜੋਖ਼ਿਮ ਨੂੰ ਘੱਟ ਕਰਨ ਅਤੇ ਇੰਡਸਟ੍ਰੀਅਲ ਯੂਨਿਟਾਂ (ਉਦਯੋਗਿਕ ਇਕਾਈਆਂ) ਨੂੰ ਦੁਬਾਰਾ ਤੋਂ ਸ਼ੁਰੂ ਕਰਨ ਦੇ ਮੱਦੇਨਜ਼ਰ ਉਦਯੋਗਾਂ ਨੂੰ ਸਲਾਹ ਦਿੱਤੀ ਜਾਂਦੀ ਹੈ ਕਿ ਇਕਾਈਆਂ ਨੂੰ ਸ਼ੁਰੂ ਕਰਦੇ ਸਮੇਂ ਪਹਿਲੇ ਹਫ਼ਤੇ ਨੂੰ ਇੱਕ ਟ੍ਰਾਇਲ ਦੀ ਤਰ੍ਹਾਂ ਲੈਣ ਅਤੇ ਸਾਰੇ ਸੁਰੱਖਿਆ ਪ੍ਰੋਟੋਕਲ ਨਿਸ਼ਚਿਤ ਕਰਨ।
ਕੋਰੋਨਾ ਵਾਇਰਸ ਸੰਕਰਮਣ ਦੀ ਰੋਕਥਾਮ ਦੇ ਮੱਦੇਨਜ਼ਰ ਦੇਸ਼ ਵਿੱਚ 14 ਦਿਨਾਂ ਦਾ ਲੌਕਡਾਊਨ 3.0 ਚਾਲੂ ਹੈ ਅਤੇ ਇਹ 17 ਮਈ ਨੂੰ ਖ਼ਤਮ ਹੋਵੇਗਾ। ਅਜਿਹੇ ਵਿੱਚ ਸਾਰੇ ਮੁੱਖ ਸਕੱਤਰਾਂ ਅਤੇ ਕੇਂਦਰ ਸ਼ਾਸਿਤ ਸੂਬਿਆਂ (ਯੂ.ਟੀ) ਦੇ ਪ੍ਰਸ਼ਾਸਕਾਂ ਨੂੰ ਸ਼ਨਿਚਰਵਾਰ ਨੂੰ ਦਿਸ਼ਾ-ਨਿਰਦੇਸ਼ ਜਾਰੀ ਕੀਤੇ ਗਏ।
