ਅਜਮੇਰ : ਅਜਮੇਰ ਰੇਲਵੇ ਸਟੇਸ਼ਨ 'ਤੇ RPF ਮਹਿਲਾ ਕਾਂਸਟੇਬਲਾਂ ਨੇ ਇਨਸਾਨੀਅਤ ਦਿਖਾਉਂਦੇ ਹੋਏ ਸਵੇਰੇ ਪਲੇਟਫਾਰਮ 'ਤੇ ਹੀ ਮਹਿਲਾ ਸਵੀਪਰ ਦਾ ਜਣੇਪਾ ਕਰਵਾ ਦਿੱਤਾ। ਰੇਲਵੇ ਸਟੇਸ਼ਨ ’ਤੇ ਠੇਕੇਦਾਰ ਦੀ ਕਰਮਚਾਰੀ ਦੇ ਰੂਪ ਵਿੱਚ ਕੰਮ ਕਰਦੀ ਸਫਾਈ ਕਰਮਚਾਰੀ ਪੂਜਾ ਨੂੰ ਸਵੇਰੇ ਅਚਾਨਕ ਜਣੇਪੇ ਦਾ ਦਰਦ ਹੋਇਆ ਅਤੇ ਉਸ ਨੂੰ ਹਸਪਤਾਲ ਲਿਜਾਣ ਲਈ ਜ਼ਿਆਦਾ ਸਮਾਂ ਨਹੀਂ ਸੀ। ਅਜਿਹੇ 'ਚ ਮਹਿਲਾ ਕਾਂਸਟੇਬਲ ਨੇ ਸਵੀਪਰ ਪੂਜਾ ਨੂੰ ਪਲੇਟਫਾਰਮ 'ਤੇ ਹੀ ਚਾਦਰ ਵਿਛਾ ਕੇ ਡਿਲੀਵਰੀ ਕਰਵਾ ਦਿੱਤੀ। ਨਵਜੰਮੀ ਬੱਚੀ ਅਤੇ ਪੂਜਾ ਦੋਵੇਂ ਸਿਹਤਮੰਦ ਹਨ, ਉਨ੍ਹਾਂ ਨੂੰ ਅਜਮੇਰ ਦੇ ਸੈਟੇਲਾਈਟ ਹਸਪਤਾਲ 'ਚ ਭਰਤੀ ਕਰਵਾਇਆ ਗਿਆ ਹੈ।
ਜਣੇਪੇ ਦਰਦ ਕਾਰਨ ਕੁਰਲਾ ਰਹੀ ਸੀ ਪੂਜਾ : ਅਜਮੇਰ ਰੇਲਵੇ ਸਟੇਸ਼ਨ 'ਤੇ ਸਵੇਰੇ ਸਫ਼ਾਈ ਦਾ ਕੰਮ ਕਰ ਰਹੀ ਮਹਿਲਾ ਸਵੀਪਰ ਨੂੰ ਅਚਾਨਕ ਜਣੇਪੇ ਦਾ ਦਰਦ ਸ਼ੁਰੂ ਹੋ ਗਿਆ। ਸਫ਼ਾਈ ਕਰਮਚਾਰੀ ਪੂਜਾ ਜਣੇਪੇ ਦੇ ਦਰਦ ਨਾਲ ਚੀਕ ਰਹੀ ਸੀ। ਇਸ ਦੌਰਾਨ ਸਟੇਸ਼ਨ 'ਤੇ ਡਿਊਟੀ 'ਤੇ ਮੌਜੂਦ ਆਰਪੀਐੱਫ ਕਾਂਸਟੇਬਲ ਵਰਿੰਦਰ ਸਿੰਘ ਨੇ ਉਸ ਨੂੰ ਦੇਖਿਆ। ਅਸਹਿ ਦਰਦ ਕਾਰਨ ਪੂਜਾ ਕੁਝ ਵੀ ਬੋਲ ਨਹੀਂ ਪਾ ਰਹੀ ਸੀ। ਪਰ ਕਾਂਸਟੇਬਲ ਵਰਿੰਦਰ ਸਿੰਘ ਨੂੰ ਉਸਦੀ ਹਾਲਤ ਸਮਝਣ ਵਿੱਚ ਦੇਰ ਨਾ ਲੱਗੀ ਅਤੇ ਉਸਨੇ ਤੁਰੰਤ ਸਹਾਇਕ ਸਬ-ਇੰਸਪੈਕਟਰ ਪ੍ਰੇਮਰਾਮ ਨੂੰ ਫੋਨ 'ਤੇ ਸੂਚਨਾ ਦਿੱਤੀ। ਮਾਮਲੇ ਨੂੰ ਗੰਭੀਰਤਾ ਨਾਲ ਲੈਂਦਿਆਂ ਸਬ-ਇੰਸਪੈਕਟਰ ਪ੍ਰੇਮਰਾਮ ਨੇ ਤੁਰੰਤ ਕਾਂਸਟੇਬਲ ਹੰਸਾ ਕੁਮਾਰੀ, ਸਾਵਿਤਰੀ ਫਗੇਡੀਆ, ਲਕਸ਼ਮੀ ਵਰਮਾ ਨੂੰ ਮੌਕੇ 'ਤੇ ਭੇਜਿਆ। ਉਦੋਂ ਤੱਕ ਪੂਜਾ ਦੀ ਹਾਲਤ ਕਾਫੀ ਵਿਗੜ ਚੁੱਕੀ ਸੀ, ਉਸ ਦਾ ਖੂਨ ਵਹਿਣਾ ਸ਼ੁਰੂ ਹੋ ਗਿਆ ਸੀ। ਪੂਜਾ ਦੀ ਹਾਲਤ ਹਸਪਤਾਲ ਲਿਜਾਣ ਦੇ ਲਾਇਕ ਵੀ ਨਹੀਂ ਸੀ। ਅਜਿਹੇ 'ਚ ਮਹਿਲਾ ਕਾਂਸਟੇਬਲਾਂ ਨੇ ਤੁਰੰਤ ਥਾਣੇ ਤੋਂ ਚਾਦਰ ਲੈ ਕੇ ਮੌਕੇ 'ਤੇ ਹੀ ਡਿਲੀਵਰੀ ਕਰਵਾਉਣ ਦਾ ਫੈਸਲਾ ਕੀਤਾ।
ਪਲੇਟਫਾਰਮ 'ਤੇ ਹੀ ਵਿਛਾ ਦਿੱਤੀ ਗਈ ਚਾਦਰ : ਮਹਿਲਾ ਕਾਂਸਟੇਬਲਾਂ ਨੇ ਸਫਾਈ ਕਰਮਚਾਰੀ ਪੂਜਾ ਦੀ ਡਿਲੀਵਰੀ ਕਰਵਾਉਣ ਲਈ ਪਲੇਟਫਾਰਮ 'ਤੇ ਚਾਦਰ ਵਿਛਾ ਦਿੱਤੀ। ਮਹਿਲਾ ਕਾਂਸਟੇਬਲਾਂ ਨੇ ਮਿਲ ਕੇ ਸਵੀਪਰ ਪੂਜਾ ਦੀ ਡਿਲੀਵਰੀ ਕਰਵਾਈ। ਸਵੀਪਰ ਪੂਜਾ ਇਕ ਖੂਬਸੂਰਤ ਬੇਟੀ ਦੀ ਮਾਂ ਬਣੀ। ਪੂਜਾ ਆਪਣੇ ਮੂੰਹ ਰਾਹੀਂ ਕੁਝ ਵੀ ਬੋਲਣ ਤੋਂ ਅਸਮਰੱਥ ਹੈ। ਆਰਪੀਐਫ ਸਟੇਸ਼ਨ ਇੰਚਾਰਜ ਲਕਸ਼ਮਣ ਸਿੰਘ ਗੌੜ ਨੇ ਦੱਸਿਆ ਕਿ ਸਫ਼ਾਈ ਕਰਮਚਾਰੀ ਪੂਜਾ ਅਤੇ ਉਸ ਦਾ ਪਤੀ ਗੋਪਾਲ ਰੇਲਵੇ ਸਟੇਸ਼ਨ ’ਤੇ ਸਫ਼ਾਈ ਦਾ ਕੰਮ ਕਰਦੇ ਹਨ।
ਦੋਵੇਂ ਯੂਪੀ ਦੇ ਫਰੂਖਾਬਾਦ ਜ਼ਿਲ੍ਹੇ ਦੇ ਰਹਿਣ ਵਾਲੇ ਹਨ। ਡਿਲੀਵਰੀ ਤੋਂ ਬਾਅਦ ਸਵੀਪਰ ਪੂਜਾ ਅਤੇ ਉਸ ਦੀ ਨਵਜੰਮੀ ਬੇਟੀ ਨੂੰ ਆਦਰਸ਼ ਨਗਰ ਦੇ ਸੈਟੇਲਾਈਟ ਹਸਪਤਾਲ 'ਚ ਭਰਤੀ ਕਰਵਾਇਆ ਗਿਆ ਹੈ। ਜਿੱਥੇ ਮਾਂ ਅਤੇ ਬੱਚੇ ਦੋਵਾਂ ਦੀ ਹਾਲਤ ਠੀਕ ਹੈ। ਉਨ੍ਹਾਂ ਨੂੰ ਜ਼ਰੂਰੀ ਵਸਤਾਂ ਤੋਹਫ਼ੇ ਵਜੋਂ ਦਿੱਤੀਆਂ ਗਈਆਂ ਹਨ। ਉਸ ਨੇ ਦੱਸਿਆ ਕਿ ਡੇਢ ਸਾਲ ਪਹਿਲਾਂ ਵੀ ਰੇਲਵੇ ਸਟੇਸ਼ਨ ਦੇ ਮੇਨ ਗੇਟ 'ਤੇ ਇਕ ਔਰਤ ਨੇ ਬੱਚੇ ਨੂੰ ਜਨਮ ਦਿੱਤਾ ਸੀ। ਗੌੜ ਨੇ ਦੱਸਿਆ ਕਿ ਮਹਿਲਾ ਪੁਲਿਸ ਕਾਂਸਟੇਬਲਾਂ ਦੀ ਤਤਪਰਤਾ ਅਤੇ ਇਨਸਾਨੀਅਤ ਕਾਰਨ ਸਵੀਪਰ ਪੂਜਾ ਅਤੇ ਉਸਦੀ ਨਵਜੰਮੀ ਬੱਚੀ ਦੀ ਜਾਨ ਬਚਾਈ ਗਈ ਹੈ।
