ਨਵੀਂ ਦਿੱਲੀ: ਗਲੋਬਲ ਬਾਜ਼ਾਰ ਖੁੱਲ੍ਹਣ ਤੋਂ ਬਾਅਦ ਹੀਟਿੰਗ, ਵੈਂਟੀਲੇਸ਼ਨ, ਏਅਰ ਕੰਡੀਸ਼ਨਿੰਗ ਅਤੇ ਰੈਫ੍ਰਿਜਰੇਸ਼ਨ (HVAC-R) ਉਤਪਾਦਾਂ ਦਾ ਨਿਰਯਾਤ ਵਧਿਆ ਹੈ। ਇਹ ਜਾਣਕਾਰੀ ਇੰਜੀਨੀਅਰਿੰਗ ਐਕਸਪੋਰਟ ਬਾਡੀ ਦੇ ਮੁਖੀ ਮਹੇਸ਼ ਦੇਸਾਈ ਨੇ ਦਿੱਤੀ।
ਹੀਟਿੰਗ, ਵੈਂਟੀਲੇਸ਼ਨ, ਏਅਰ ਕੰਡੀਸ਼ਨਿੰਗ ਅਤੇ ਰੈਫ੍ਰਿਜਰੇਸ਼ਨ (HVAC-R) ਹਿੱਸੇ 'ਤੇ ਇੱਕ ਵਰਚੁਅਲ ਐਕਸਪੋ ਨੂੰ ਸੰਬੋਧਿਤ ਕਰਦੇ ਹੋਏ, ਮਹੇਸ਼ ਦੇਸਾਈ ਨੇ ਉਮੀਦ ਪ੍ਰਗਟ ਕੀਤੀ ਕਿ ਆਉਣ ਵਾਲੇ ਸਮੇਂ ਵਿੱਚ, ਜਦੋਂ ਗਲੋਬਲ ਬਜ਼ਾਰ ਕਾਰੋਬਾਰ ਲਈ ਖੁੱਲ੍ਹਣਗੇ, ਬਾਹਰ ਜਾਣ ਵਾਲੀਆਂ ਸ਼ਿਪਮੈਂਟਾਂ ਦੀ ਰਫ਼ਤਾਰ ਵੀ ਤੇਜ਼ ਹੋਵੇਗੀ।
2020 ਦੇ ਦੌਰਾਨ, ਭਾਰਤ ਵਿੱਚ ਬਣੇ HVAC-R ਉਤਪਾਦਾਂ ਦੇ ਵਿਸ਼ਵਵਿਆਪੀ ਨਿਰਯਾਤ ਲਈ ਤਿੰਨ ਦੇਸ਼ ਬਹੁਤ ਅਨੁਕੂਲ ਸੀ। ਇਸ ਮਿਆਦ ਦੇ ਦੌਰਾਨ, HVAC-R ਉਤਪਾਦਾਂ ਦਾ 16.7 ਫੀਸਦ, ਅਮਰੀਕਾ ਨੂੰ, 7 ਫੀਸਦ ਯੂਏਈ ਨੂੰ ਅਤੇ 5.92 ਫੀਸਦ ਚੀਨ ਨੂੰ ਨਿਰਯਾਤ ਕੀਤਾ ਗਿਆ ਸੀ।
ਨਵੇਂ ਵਪਾਰਕ ਅੰਕੜਿਆਂ ਦੇ ਮੁਤਾਬਿਕ ਯੂਰਪੀਅਨ ਯੂਨੀਅਨ (EU) ਸਾਰੇ ਖੇਤਰਾਂ ਵਿੱਚ ਭਾਰਤ ਦੇ HVAC-R ਉਤਪਾਦਾਂ ਦਾ ਸਭ ਤੋਂ ਵੱਡਾ ਆਯਾਤਕ ਹੈ, ਜੋ ਇਹਨਾਂ ਉਤਪਾਦਾਂ ਦੇ ਭਾਰਤ ਦੇ ਕੁੱਲ ਵਿਸ਼ਵ ਨਿਰਯਾਤ ਦੇ ਪੰਜਵੇਂ ਹਿੱਸੇ ਤੋਂ ਵੱਧ ਖਪਤ ਕਰਦਾ ਹੈ। ਇਸ ਤੋਂ ਬਾਅਦ ਉੱਤਰੀ ਅਮਰੀਕਾ ਅਤੇ ਮੱਧ ਪੂਰਬ ਅਤੇ ਪੱਛਮੀ ਏਸ਼ੀਆ (MEWA) ਖੇਤਰ ਵਿੱਚ ਭਾਰਤੀ HVAC-R ਉਤਪਾਦਾਂ ਦੀ ਖਪਤ ਹੁੰਦੀ ਹੈ। ਇਹ ਭਾਰਤ ਦੇ ਕੁੱਲ ਨਿਰਯਾਤ ਦਾ 18.2 ਫੀਸਦੀ ਅਤੇ 16.5 ਫੀਸਦੀ ਸੀ। ਪਿਛਲੇ ਸਾਲ ਐਚਵੀਏਸੀ-ਆਰ ਉਤਪਾਦਾਂ ਦੇ ਭਾਰਤ ਦੇ ਗਲੋਬਲ ਨਿਰਯਾਤ ਵਿੱਚ ਆਸੀਆਨ ਅਤੇ ਉੱਤਰ-ਪੂਰਬੀ ਏਸ਼ੀਆਈ ਦੇਸ਼ਾਂ ਦਾ ਯੋਗਦਾਨ 10 ਫੀਸਦ ਤੋਂ ਵੱਧ ਸੀ।
ਇੰਜੀਨੀਅਰਿੰਗ ਨਿਰਯਾਤ ਸੰਸਥਾ ਦੇ ਮੁਖੀ ਮਹੇਸ਼ ਦੇਸਾਈ ਨੇ ਕਿਹਾ ਕਿ ਭਾਰਤ ਹੀਟਿੰਗ ਉਤਪਾਦਾਂ ਦੇ ਨਿਰਯਾਤ ਵਿੱਚ 24ਵੇਂ ਸਥਾਨ 'ਤੇ ਹੈ, ਜਦਕਿ ਏਸੀ ਦੇ ਨਿਰਯਾਤ ਵਿੱਚ ਗਲੋਬਲ ਰੈਂਕਿੰਗ 25 ਹੈ। ਰੈਫ੍ਰਿਜਰੇਸ਼ਨ ਯੂਨਿਟਾਂ ਦੇ ਨਿਰਯਾਤ ਵਿੱਚ ਭਾਰਤ 33ਵੇਂ ਸਥਾਨ 'ਤੇ ਹੈ। ਇਸ ਤੋਂ ਇਲਾਵਾ, ਭਾਰਤ ਹੀਟਿੰਗ, ਏਅਰ ਕੰਡੀਸ਼ਨਿੰਗ, ਰੈਫ੍ਰਿਜਰੇਸ਼ਨ ਅਤੇ ਵੈਂਟੀਲੇਸ਼ਨ (HVAC-R) ਉਪਕਰਨਾਂ ਦੇ ਹਿੱਸੇ ਦਾ ਦੁਨੀਆ ਦਾ 16ਵਾਂ ਸਭ ਤੋਂ ਵੱਡਾ ਐਕਸਪੋਰਟਰ ਹੈ।
ਵਰਚੁਅਲ ਐਕਸਪੋ ਵਿੱਚ ਬੋਲਦਿਆਂ, ਈਈਪੀਸੀ ਇੰਡੀਆ ਦੇ ਵਾਈਸ ਚੇਅਰਮੈਨ ਅਰੁਣ ਕੁਮਾਰ ਗਰੋਡੀਆ ਨੇ ਕਿਹਾ ਕਿ ਇੰਜਨੀਅਰਿੰਗ ਖੇਤਰ ਵਿੱਚ ਮਜ਼ਬੂਤ ਵਿਕਾਸ ਦੇ ਨਾਲ, ਦੇਸ਼ ਮੌਜੂਦਾ ਵਿੱਤੀ ਸਾਲ ਵਿੱਚ 400 ਬਿਲੀਅਨ ਡਾਲਰ ਤੋਂ ਵੱਧ ਦਾ ਰਿਕਾਰਡ ਨਿਰਯਾਤ ਹਾਸਲ ਕਰਨ ਲਈ ਤਿਆਰ ਹੈ। ਉਨ੍ਹਾਂ ਕਿਹਾ ਕਿ ਹੀਟਿੰਗ ਅਤੇ ਰੈਫ੍ਰਿਜਰੇਸ਼ਨ ਸੈਕਟਰ ਵਿੱਚ ਗਲੋਬਲ ਕੰਪਨੀਆਂ ਅਤੇ ਸਥਾਨਕ ਖਿਡਾਰੀਆਂ ਵਿਚਕਾਰ ਸਖ਼ਤ ਮੁਕਾਬਲਾ ਹੈ।
ਇੱਕ ਪਾਸੇ ਕੈਰੀਅਰ ਕਾਰਪੋਰੇਸ਼ਨ, ਡਾਈਕਿਨ ਇੰਡਸਟਰੀਜ਼, ਮਿਤਸੁਬਿਸ਼ੀ ਇਲੈਕਟ੍ਰਿਕ ਕਾਰਪੋਰੇਸ਼ਨ, LG ਇਲੈਕਟ੍ਰਾਨਿਕਸ ਇੰਕ., ਇੰਗਰਸੋਲ-ਰੈਂਡ ਪੀਐਲਸੀ ਅਤੇ ਪੈਨਾਸੋਨਿਕ ਕਾਰਪੋਰੇਸ਼ਨ ਵਰਗੀਆਂ ਗਲੋਬਲ ਬ੍ਰਾਂਡਾਂ ਮਾਰਕੀਟ ਹਿੱਸੇਦਾਰੀ ਲਈ ਮੁਕਾਬਲਾ ਕਰ ਰਹੀਆਂ ਹਨ, ਬਲੂ ਸਟਾਰ, ਹੈਵੇਲਜ਼ ਇੰਡੀਆ ਅਤੇ ਵੋਲਟਾਸ ਵਰਗੀਆਂ ਭਾਰਤੀ ਕੰਪਨੀਆਂ ਆਪਣੇ ਉਤਪਾਦਾਂ ਦੀ ਵਧਦੀ ਮੰਗ ਦੇ ਕਾਰਨ ਆਪਣੇ ਲਈ ਬਾਜ਼ਾਰ ਚ ਥਾਂ ਬਣਾ ਰਹੀਆਂ ਹਨ।
ਉਦਯੋਗ ਦੇ ਅਨੁਮਾਨਾਂ ਅਨੁਸਾਰ, ਭਾਰਤ ਨੇ 2020 ਵਿੱਚ 2 ਬਿਲੀਅਨ ਡਾਲਰ ਤੋਂ ਵੱਧ ਮੁੱਲ ਦੇ ਹੀਟਿੰਗ, ਏਅਰ ਕੰਡੀਸ਼ਨਿੰਗ, ਰੈਫ੍ਰਿਜਰੇਸ਼ਨ ਅਤੇ ਵੈਂਟੀਲੇਸ਼ਨ (HVAC-R) ਉਤਪਾਦਾਂ ਦਾ ਨਿਰਯਾਤ ਕੀਤਾ। ਇਸ ਅੰਕੜੇ ਵਿੱਚ HVAC-R) ਸਿਸਟਮ ਦੇ ਹਿੱਸਿਆਂ ਦਾ ਨਿਰਯਾਤ ਵੀ ਸ਼ਾਮਲ ਹੈ।
ਨਿਰਯਾਤ ਵਿੱਚ ਹਵਾਦਾਰੀ ਪ੍ਰਣਾਲੀਆਂ ਦਾ ਸਭ ਤੋਂ ਵੱਡਾ ਹਿੱਸਾ 77 ਫੀਸਦ ਤੋਂ ਵੱਧ ਸੀ। ਇਸ ਤੋਂ ਬਾਅਦ ਹੀਟਿੰਗ ਸਾਜ਼ੋ-ਸਾਮਾਨ ਅਤੇ ਪੁਰਜ਼ਿਆਂ ਦਾ ਨਿਰਯਾਤ 11 ਫੀਸਦ ਤੋਂ ਵੱਧ ਦੇ ਹਿੱਸੇ ਨਾਲ ਹੋਇਆ। ਨਿਰਯਾਤ 'ਚ ਰੈਫ੍ਰਿਜਰੇਟਿੰਗ ਯੂਨਿਟਾਂ ਦੀ ਹਿੱਸੇਦਾਰੀ 6.64 ਫੀਸਦੀ ਰਹੀ। ਏਅਰ ਕੰਡੀਸ਼ਨਿੰਗ ਯੂਨਿਟਾਂ ਦਾ ਹਿੱਸਾ ਵੀ 4 ਫੀਸਦ ਤੋਂ ਵੱਧ ਰਿਹਾ।
ਭਾਰਤ ਵਿੱਚ ਹੀਟਿੰਗ, ਏਅਰ ਕੰਡੀਸ਼ਨਿੰਗ, ਰੈਫ੍ਰਿਜਰੇਸ਼ਨ ਅਤੇ ਵੈਂਟੀਲੇਸ਼ਨ (HVAC-R) ਮਾਰਕੀਟ 2030 ਤੱਕ 31.6 ਬਿਲੀਅਨ ਡਾਲਰ ਤੱਕ ਪਹੁੰਚਣ ਲਈ ਤਿਆਰ ਹੈ। ਘਰੇਲੂ ਬਾਜ਼ਾਰ ਦੇ 2020 ਅਤੇ 2030 ਦੇ ਵਿਚਾਲੇ 16 ਫੀਸਦ ਦੀ ਮਿਸ਼ਰਿਤ ਸਾਲਾਨਾ ਵਿਕਾਸ ਦਰ (CAGR) ਨਾਲ ਵਧਣ ਦਾ ਅਨੁਮਾਨ ਲਗਾਇਆ ਗਿਆ ਹੈ।
ਵਰਚੁਅਲ ਐਕਸਪੋ ਵਿੱਚ,ਈਈਪੀਸੀ ਇੰਡੀਆ ਦੇ ਸਾਬਕਾ ਪ੍ਰਧਾਨ ਰਾਕੇਸ਼ ਸ਼ਾਹ ਨੇ ਕਿਹਾ ਕਿ ਹੀਟਿੰਗ ਅਤੇ ਰੈਫ੍ਰਿਜਰੇਸ਼ਨ ਖੰਡ ਬਾਰੇ ਐਕਸਪੋ ਵਿਦੇਸ਼ੀ ਖਰੀਦਦਾਰਾਂ ਨੂੰ ਭਾਰਤ ਤੋਂ ਖਰੀਦਣ ਲਈ ਹੋਰ ਉਤਸ਼ਾਹਿਤ ਕਰੇਗਾ। ਉਨ੍ਹਾਂ ਦਾਅਵਾ ਕੀਤਾ ਕਿ ਇੰਜੀਨੀਅਰਿੰਗ ਖੇਤਰ ਤੋਂ ਆਉਣ ਵਾਲੇ 107 ਬਿਲੀਅਨ ਡਾਲਰ ਤੋਂ ਵੱਧ ਦੀ ਬਰਾਮਦ ਭਾਰਤ ਨੂੰ 400 ਬਿਲੀਅਨ ਡਾਲਰ ਦੇ ਟੀਚੇ ਨੂੰ ਹਾਸਲ ਕਰਨ ਵਿੱਚ ਮਦਦ ਕਰੇਗੀ। ਇਸ ਵਰਚੁਅਲ ਐਕਸਪੋ ਵਿੱਚ 36 ਦੇਸ਼ਾਂ ਦੇ ਵਪਾਰ ਪ੍ਰਤੀਨਿਧਾਂ ਨੇ ਹਿੱਸਾ ਲਿਆ।
ਇਹ ਵੀ ਪੜੋ: ਅਮਰੀਕੀ ਏਅਰਲਾਈਨ ਕੰਪਨੀਆਂ ਨੇ ਦਿੱਤੀ ਚਿਤਾਵਨੀ, 5G ਕਾਰਨ ਰੁਕ ਸਕਦੇ ਨੇ ਜਹਾਜ਼ !
