ਭਰਾ ਦੀ ਬੇਵਕੂਫੀ ਤੇ ਨਾਸਮਝੀ ਨੇ ਲੈ ਲਈ ਮਾਸੂਮ ਕੁੜੀ ਦੀ ਜਾਨ, ਕਤਲ ਦੀ ਵਜ੍ਹਾ ਪੜ੍ਹ ਕੇ ਹੋ ਜਾਵੇਗਾ ਦਿਮਾਗ ਸੁੰਨ

ਮਹਾਂਰਾਸ਼ਟਰ ਵਿੱਚ ਇਕ ਭਰਾ ਵਲੋਂ ਆਪਣੀ ਮਾਸੂਮ ਭੈਣ ਦਾ ਇਸ ਸ਼ੱਕ ਵਿੱਚ ਕਤਲ ਕਰ ਦਿੱਤਾ ਗਿਆ ਕਿ ਉਸਨੂੰ ਪਹਿਲੀ ਵਾਰ ਪੀਰੀਅਡਸ ਯਾਨੀ ਕਿ ਮਾਂਹਵਾਰੀ ਆਈ ਸੀ ਤੇ ਖੂਨ ਦੇ ਧੱਬੇ ਦੇਖ ਕੇ ਉਸਦੇ ਭਰਾ ਨੂੰ ਸ਼ੱਕ ਸੀ ਉਸਦੀ ਭੈਣ ਨੇ ਕਿਸੇ ਨਾਲ ਪ੍ਰੇਮ ਸੰਬੰਧ ਬਣਾਏ ਹਨ।

ਚੰਡੀਗੜ੍ਹ : ਮਹਾਂਰਾਸ਼ਟਰ ਦੇ ਠਾਣੇ ਵਿੱਚ ਇਕ ਭਰਾ ਨੇ ਸ਼ੱਕ ਵਿੱਚ ਹੀ ਆਪਣੀ ਭੈਣ ਦਾ ਕਤਲ ਕਰ ਦਿੱਤਾ ਹੈ। ਜਾਣਕਾਰੀ ਮੁਤਾਬਿਕ 30 ਸਾਲਾ ਸੁਰੱਖਿਆ ਗਾਰਡ ਵਲੋਂ ਆਪਣੀ 12 ਸਾਲ ਦੀ ਭੈਣ ਦਾ ਕਤਲ ਕੀਤਾ ਗਿਆ ਹੈ। ਕਤਲ ਦਾ ਕਾਰਨ ਵੀ ਅਜੀਬ ਅਤੇ ਬੇਬੁਨਿਆਦ ਹੈ। ਭਰਾ ਨੂੰ ਸਿਰਫ ਆਪਣੀ ਭੈਣ ਦੇ ਪ੍ਰੇਮ ਸੰਬੰਧਾਂ ਦਾ ਸ਼ੱਕ ਸੀ। ਦੱਸਿਆ ਜਾ ਰਿਹਾ ਹੈ ਕਿ ਉਸਦੀ ਭੈਣ ਨੂੰ ਪਹਿਲੀ ਵਾਰ ਮਾਂਹਵਾਰੀ ਆਈ ਸੀ। ਇਸ ’ਤੇ ਮੁਲਜ਼ਮ ਨੂੰ ਇਹ ਸ਼ੱਕ ਸੀ ਕਿ ਉਸਦੀ ਭੈਣ ਨੇ ਕਿਸੇ ਪਾਸੇ ਸਰੀਰਕ ਸਬੰਧ ਬਣਾਏ ਹਨ। ਇਹੀ ਸ਼ੱਕ ਉਸਦੀ ਭੈਣ ਦੇ ਕਤਲ ਦਾ ਕਾਰਣ ਬਣ ਗਿਆ। ਜਾਣਕਾਰੀ ਮੁਕਾਬਿਕ ਲੜਕੀ ਉਲਹਾਸਨਗਰ 'ਚ ਆਪਣੇ ਭਰਾ ਅਤੇ ਸਾਲੇ ਨਾਲ ਹੀ ਰਹਿ ਰਹੀ ਸੀ।

ਚਿਹਰਾ ਅਤੇ ਪਿੱਠ ਸਾੜ ਕੇ ਕੀਤਾ ਕਤਲ : ਪੁੁਲਿਸ ਮੁਤਾਬਿਕ ਇਕ ਭਰਾ ਦੀ ਬੇਵਕੂਫੀ ਦਾ ਖਾਮਿਆਜਾ ਉਸਦੀ ਭੈਣ ਨੇ ਭੁਗਤਿਆ ਹੈ। ਪੁਲਿਸ ਦਾ ਕਹਿਣਾ ਹੈ ਕਿ ਕੁਝ ਦਿਨ ਪਹਿਲਾਂ ਹੀ ਲੜਕੀ ਨੂੰ ਪੀਰੀਅਡਸ ਆਉਣੇ ਸ਼ੁਰੂ ਹੋਏ ਸਨ ਅਤੇ ਉਸਦੇ ਖੂਨ ਵਗ ਰਿਹਾ ਸੀ। ਦੂਜੇ ਪਾਸੇ ਉਸਦੇ ਭਰਾ ਨੇ ਦੇਖਿਆ ਕਿ ਲੜਕੀ ਦੇ ਕੱਪੜਿਆਂ 'ਤੇ ਖੂਨ ਦੇ ਧੱਬੇ ਸਨ ਅਤੇ ਉਸ ਤੋਂ ਬਾਅਦ ਉਸ ਨੂੰ ਸ਼ੱਕ ਹੋਣ ਲੱਗਾ ਕਿ ਉਸ ਦਾ ਕਿਸੇ ਨਾਲ ਪ੍ਰੇਮ ਸੰਬੰਧ ਹਨ। ਉਸ ਮਾਸੂਮ ਕੁੜੀ ਨੂੰ ਵੀ ਇਸ ਮਾਂਹਵਾਰੀ ਬਾਰੇ ਕੋਈ ਜਾਣਕਾਰੀ ਨਹੀਂ ਸੀ। ਜਦੋਂ ਮੁਲਜ਼ਮ ਨੇ ਉਸਨੂੰ ਖੂਨ ਦੇ ਧੱਬਿਆਂ ਬਾਰੇ ਪੁੱਛਿਆ ਤਾਂ ਲੜਕੀ ਡਰ ਗਈ ਅਤੇ ਇਸ ਬਾਰੇ ਕੁੱਝ ਨਹੀਂ ਕਹਿ ਸਕੀ। ਪੁਲਿਸ ਮੁਤਾਬਿਕ ਮੁਲਜ਼ਮ ਨੇ ਬਲਦੀ ਚੀਜ਼ ਨਾਲ ਉਸਦਾ ਚਿਹਰਾ ਅਤੇ ਪਿੱਠ ਸਾੜ ਦਿੱਤੀ। ਲੜਕੀ ਇੰਨੀ ਬੁਰੀ ਤਰ੍ਹਾਂ ਸੜ ਗਈ ਕਿ ਉਸ ਦੀ ਜਾਨ ਚਲੀ ਗਈ।

ਦੱਸਿਆ ਜਾ ਰਿਹਾ ਹੈ ਕਿ ਇਹ ਮਾਮਲਾ ਉਦੋਂ ਸਾਹਮਣੇ ਆਇਆ ਜਦੋਂ ਬੱਚੀ ਨੂੰ ਇਲਾਜ ਲਈ ਉਲਹਾਸਨਗਰ ਸੈਂਟਰਲ ਹਸਪਤਾਲ ਲਿਆਂਦਾ ਗਿਆ। ਹਸਪਤਾਲ 'ਚ ਡਾਕਟਰਾਂ ਨੇ ਲੜਕੀ ਨੂੰ ਮ੍ਰਿਤਕ ਐਲਾਨ ਦਿੱਤਾ। ਮੁਲਜ਼ਮ ਖ਼ਿਲਾਫ਼ ਕਤਲ ਦਾ ਕੇਸ ਦਰਜ ਕਰ ਲਿਆ ਗਿਆ ਹੈ। ਲੜਕੀ ਦੀ ਲਾਸ਼ ਨੂੰ ਪੋਸਟਮਾਰਟਮ ਲਈ ਭੇਜ ਦਿੱਤਾ ਗਿਆ ਹੈ। ਲੜਕੇ ਨੇ ਕਤਲ ਦੀ ਸਾਰੀ ਕਹਾਣੀ ਦੱਸੀ ਹੈ।