ਬੈਂਗਲੁਰੂ: ਚੰਦਰਯਾਨ-2 ਸ਼ੁੱਕਰਵਾਰ-ਸ਼ਨੀਵਾਰ ਦੀ ਦੇਰ ਰਾਤ ਨੂੰ ਚੰਨ 'ਤੇ ਉਤਰੇਗਾ। ਚੰਦਰਯਾਨ-2 ਲਈ ਚੰਨ 'ਤੇ ਉਤਰਨਾ ਬਹੁਤ ਹੀ ਚੁਣੌਤੀਪੂਰਨ ਹੋਵੇਗਾ। ਜੇ ਵਿਕਰਮ ਲੈਂਡਰ ਦੀ ਇਹ ਨਰਮ ਲੈਂਡਿੰਗ ਸਫ਼ਲ ਹੁੰਦੀ ਹੈ ਤਾਂ ਰੂਸ, ਅਮਰੀਕਾ ਅਤੇ ਚੀਨ ਤੋਂ ਬਾਅਦ, ਭਾਰਤ ਅਜਿਹੀ ਪ੍ਰਾਪਤੀ ਹਾਸਲ ਕਰਨ ਵਾਲਾ ਵਿਸ਼ਵ ਦਾ ਚੌਥਾ ਦੇਸ਼ ਬਣ ਜਾਵੇਗਾ। ਇਸ ਦੇ ਨਾਲ ਭਾਰਤ ਚੰਦਰਮਾ ਦੇ ਦੱਖਣੀ ਧਰੁਵ ਤੱਕ ਪਹੁੰਚਣ ਵਾਲਾ ਵਿਸ਼ਵ ਦਾ ਪਹਿਲਾ ਦੇਸ਼ ਵੀ ਬਣ ਜਾਵੇਗਾ।
ਵਿਕਰਮ ਲੈਂਡਰ ਸ਼ਨੀਵਾਰ ਨੂੰ ਸਵੇਰੇ 1 ਵਜੇ ਤੋਂ 2 ਵਜੇ ਦੇ ਵਿਚਕਾਰ ਚੰਦਰਮਾ ਵੱਲ ਤੁਰਨਾ ਸ਼ੁਰੂ ਕਰੇਗਾ ਅਤੇ ਦੇਰ ਰਾਤ 1:30 ਤੋਂ 2:30 ਵਜੇ ਦੇ ਵਿਚਾਲੇ ਧਰਤੀ ਦੇ ਉਪਗ੍ਰਹਿ ਦੇ ਦੱਖਣੀ ਧਰੁਵ ਖੇਤਰ ਵਿੱਚ ਉਤਰੇਗਾ। ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਇਸ ਖ਼ਾਸ ਪਲਾਂ ਨੂੰ ਵੇਖਣ ਲਈ ਖ਼ੁਦ ਇਸਰੋ ਦੇ ਬੰਗਲੁਰੂ ਕੇਂਦਰ 'ਚ ਮੌਜੂਦ ਰਹਿਣਗੇ। ਉਨ੍ਹਾਂ ਦੇ ਨਾਲ ਇੱਥੇ 60-70 ਸਕੂਲੀ ਬੱਚੇ ਹੋਣਗੇ ਜੋ ਦੇਸ਼ਭਰ ਤੋਂ ਕੁਇਜ਼ ਮੁਕਾਬਲੇ ਦੁਆਰਾ ਚੁਣ ਕੇ ਸਿੱਧਾ ਪ੍ਰਸਾਰਣ ਵੇਖਣ ਲਈ ਇੱਥੇ ਆਉਣਗੇ।
ਜ਼ਿਕਰਯੋਗ ਹੈ ਕਿ ਇਸਰੋ ਦਾ ਦੂਜਾ ਡੀ-ਆਰਬਿਟਲ ਆਪ੍ਰੇਸ਼ਨ ਬੁੱਧਵਾਰ ਨੂੰ ਸਫ਼ਲਪੂਰਨ ਹੁੰਦੇ ਹੀ ਭਾਰਤ ਦਾ ਪਹਿਲਾ ਚੰਦਰਮਾ ਲੈਂਡਰ ਵਿਕਰਮ 7 ਸਤੰਬਰ ਨੂੰ ਚੰਦਰਮਾ ‘ਤੇ ਉਤਰਨ ਦੇ ਲਈ ਤਿਆਰ ਹੈ। ਭਾਰਤੀ ਪੁਲਾੜ ਏਜੰਸੀ ਇਸਰੋ ਦੇ ਮੁਤਾਬਕ ਵਿਕਰਮ ਦਾ ਦੂਜਾ ਡੀ-ਆਰਬਿਟਲ ਆਪ੍ਰੇਸ਼ਨ ਬੁੱਧਵਾਰ ਤੜਕੇ 3.42 ਵਜੇ ਆਨ ਬੋਰਡ ਓਪਰੇਟਿੰਗ ਸਿਸਟਮ ਦੀ ਵਰਤੋਂ ਨਾਲ ਸ਼ੁਰੂ ਹੋਇਆ ਅਤੇ ਨੌਂ ਸਕਿੰਟਾਂ ਵਿੱਚ ਪੂਰਾ ਹੋ ਗਿਆ।
ਵਿਕਰਮ ਲੈਂਡਰ ਦੀ ਕਕਸ਼ਾ 35 ਕਿਲੋਮੀਟਰ ਗੁਣਾ 101 ਕਿਲੋਮੀਟਰ ਦੀ ਹੈ। ਇਸਰੋ ਨੇ ਕਿਹਾ ਕਿ ਇਸ ਕਾਰਵਾਈ ਨਾਲ ਵਿਕਰਮ ਦੇ ਚੰਦਰਮਾ ਦੀ ਸਤ੍ਹਾ 'ਤੇ ਉੱਤਰਣ ਦੀ ਜ਼ਰੂਰੀ ਆਰਬਿਟ ਪ੍ਰਾਪਤ ਕਰ ਲਈ ਗਈ ਹੈ। ਇਸਰੋ ਮੁਤਾਬਕ ਵਿਕਰਮ ਚੰਨ ਦੇ ਦੱਖਣ ਧਰੁਵ 'ਤੇ 7 ਸਤੰਬਰ ਨੂੰ ਸਵੇਰੇ 1:30 ਤੋਂ 2:30 ਵਜੇ ਦੇ ਵਿਚਕਾਰ ਉਤਰੇਗਾ।
