ਦੇਹਰਾਦੂਨ: ਰੱਖਿਆ ਮੰਤਰੀ ਰਾਜਨਾਥ ਸਿੰਘ ਨੇ ਵੀਡਿਓ ਕਾਨਫਰੰਸਿੰਗ ਰਾਹੀਂ ਦੇਹਰਾਦੂਨ ਆਈ.ਐੱਮ.ਏ. ਵਿੱਚ ਬਣਾਈਆਂ ਜਾਣ ਵਾਲੀਆਂ ਦੋਹਾਂ ਸੁਰੰਗਾਂ ਦਾ ਵਰਚੁਅਲੀ ਨੀਂਹ ਪੱਥਰ ਰੱਖਿਆ। ਇਸ ਦੌਰਾਨ ਉਤਰਾਖੰਡ ਦੇ ਮੁੱਖ ਮੰਤਰੀ ਤ੍ਰਿਵੇਂਦਰ ਸਿੰਘ ਰਾਵਤ ਵੀ ਮੌਜੂਦ ਰਹੇ। ਆਈਐਮਏ ਵਿਖੇ 2 ਅੰਡਰਪਾਸਾਂ ਦੇ ਨਿਰਮਾਣ ਲਈ ਕੇਂਦਰ ਸਰਕਾਰ ਵੱਲੋਂ 45 ਕਰੋੜ ਰੁਪਏ ਮਨਜ਼ੂਰ ਕੀਤੇ ਗਏ ਹਨ। ਆਈਐਮਏ ਵਿੱਚ 2 ਅੰਡਰਪਾਸ ਪ੍ਰਸਤਾਵਿਤ ਹਨ। ਇੱਕ ਸੁਰੰਗ ਜਾਣ ਲਈਅਤੇ ਦੂਜੀ ਆਉਣ ਲਈ ਹੋਵੇਗੀ।
ਇਸ ਦੌਰਾਨ ਰੱਖਿਆ ਮੰਤਰੀ ਰਾਜਨਾਥ ਸਿੰਘ ਨੇ ਕਿਹਾ ਕਿ ਆਈਐਮਏ ਦੇਹਰਾਦੂਨ ਦੇਸ਼ ਦੀ ਹੀ ਨਹੀਂ, ਬਲਕਿ ਵਿਸ਼ਵ ਦੀ ਇੱਕ ਵਧੀਆ ਫੌਜੀ ਅਕੈਡਮੀ ਹੈ। ਇਸ ਵਿੱਚ, ਸਾਡੇ ਕੈਡਿਟਾਂ ਦੇ ਨਾਲ, ਸਹਿਯੋਗੀ ਦੇਸ਼ਾਂ ਦੇ ਕੈਡਿਟ ਵੀ ਸਿਖਲਾਈ ਲੈਂਦੇ ਹਨ। ਇਥੋਂ ਪਾਸ ਆਊਟ ਅਫ਼ਸਰਾਂ ਨੇ ਨਾ ਸਿਰਫ ਯੁੱਧ ਵਿੱਚ ਬਹਾਦਰੀ ਦੀ ਮਿਸਾਲ ਕਾਇਮ ਕੀਤੀ ਹੈ ਬਲਕਿ ਭਾਰਤੀ ਫੌਜ ਦੀ ਅਗਵਾਈ ਵੀ ਕੀਤੀ ਹੈ।
ਰਾਜਨਾਥ ਸਿੰਘ ਨੇ ਕਿਹਾ ਕਿ ਕਈ ਵਾਰ ਆਈਐਮਏ ਵਿੱਚ ਇੱਕ ਅਜੀਬ ਸਥਿਤੀ ਪੈਦਾ ਹੋ ਜਾਂਦੀ ਹੈ। ਕੈਡਿਟਾਂ ਨੂੰ ਆਉਣ ਜਾਉਣ ਲਈ ਕੈਂਪਸ ਦੇ ਮੱਧ ਵਿੱਚ ਆਵਾਜਾਈ ਰੁਕਣ ਦਾ ਇੰਤਜ਼ਾਰ ਕਰਨਾ ਪੈਂਦਾ ਹੈ, ਜਿਸ ਕਾਰਨ ਸਿਖਲਾਈ ਹਾਸਲ ਕਰ ਰਹੇ ਕੈਡਿਟਸ ਅਤੇ ਯਾਤਰੀਆਂ ਨੂੰ ਵਧੇਰੀ ਪ੍ਰੇਸ਼ਾਨੀ ਦਾ ਸਾਹਮਣਾ ਕਰਨਾ ਪੈਂਦਾ ਹੈ।
ਬਦਲਦੇ ਸਮੇਂ ਦੇ ਨਾਲ ਰਾਜਧਾਨੀ ਦੇਹਰਾਦੂਨ ਵਿੱਚ ਟ੍ਰੈਫਿਕ ਦਾ ਭਾਰ ਵੀ ਵਧਿਆ ਹੈ। ਇਸ ਅੰਡਰਪਾਸ ਦੇ ਨਿਰਮਾਣ ਨਾਲ NH-72 'ਤੇ ਟ੍ਰੈਫਿਕ ਜਾਮ ਤੋਂ ਰਾਹਤ ਮਿਲੇਗੀ। ਇਸ ਨਾਲ ਨਾ ਸਿਰਫ਼ ਦੇਹਰਾਦੂਨ ਦੇ ਲੋਕਾਂ, ਬਲਕਿ ਉਤਰਾਖੰਡ, ਪੰਜਾਬ, ਹਿਮਾਚਲ ਪ੍ਰਦੇਸ਼ ਅਤੇ ਹਰਿਆਣਾ ਆਉਣ-ਜਾਣ ਵਾਲੇ ਯਾਤਰੀਆਂ ਨੂੰ ਵੀ ਲਾਭ ਹੋਵੇਗਾ।
ਦੱਸ ਦੱਈਏ ਕਿ ਇੰਡੀਅਨ ਮਿਲਟਰੀ ਅਕੈਡਮੀ ਦੀ ਸੁਰੱਖਿਆ ਲਈ ਚਕਰਾਤਾ ਰੋਡ 'ਤੇ ਦੋ ਅੰਡਰਪਾਸਾਂ ਦੀ ਲੰਬੇ ਸਮੇਂ ਤੋਂ ਮੰਗ ਕੀਤੀ ਜਾ ਰਹੀ ਸੀ। ਅਜਿਹੀ ਸਥਿਤੀ ਵਿੱਚ, ਆਈਐਮਏ ਵਿਖੇ ਦੋ ਅੰਡਰਪਾਸਾਂ ਦਾ ਨਿਰਮਾਣ ਇੱਕ ਪਾਸੇ ਅਕੈਡਮੀ ਦੀ ਸੁਰੱਖਿਆ ਨੂੰ ਮਜ਼ਬੂਤ ਕਰੇਗਾ। ਇਸ ਦੇ ਨਾਲ ਹੀ, ਚਕਰਾਤਾ ਹਾਈਵੇਅ 'ਤੇ ਟ੍ਰੈਫਿਕ ਲੋਡ ਵੀ ਘੱਟ ਹੋਵੇਗਾ। ਆਈਐਮਏ ਅਕੈਡਮੀ ਵਿਖੇ ਕੈਡਿਟਸ ਦੀ ਹਰ ਸਾਲ ਦੋ ਵਾਰ ਪਾਸਿੰਗ ਆਊਟ ਪਰੇਡ ਹੁੰਦੀ ਹੈ। ਪਾਸਿੰਗ ਆਉਟ ਪਰੇਡ ਅਤੇ ਇਸ ਦੀਆਂ ਤਿਆਰੀਆਂ ਦੌਰਾਨ ਅਕੈਡਮੀ ਵਿੱਚੋਂ ਲੰਘਦਾ ਹਾਈਵੇਅ ਕਈ ਦਿਨਾਂ ਤੱਕ ਬੰਦ ਕਰਨਾ ਪੈਂਦਾ ਹੈ।
