ਨਵੀਂ ਦਿੱਲੀ: ਭਗੋੜੇ ਸ਼ਰਾਬ ਕਾਰੋਬਾਰੀ ਵਿਜੇ ਮਾਲਿਆ ਕਿਸੇ ਵੀ ਵੇਲੇ ਭਾਰਤ ਪਹੁੰਚ ਸਕਦਾ ਹੈ। ਜਾਂਚ ਏਜੰਸੀਆਂ ਦੇ ਸੂਤਰਾਂ ਨੇ ਸੰਕੇਤ ਦਿੱਤੇ ਹਨ ਕਿ ਮਾਲਿਆ ਦਾ ਜਹਾਜ਼ ਬੁੱਧਵਾਰ ਰਾਤ ਨੂੰ ਮੁੰਬਈ ਹਵਾਈ ਅੱਡੇ 'ਤੇ ਉਤਰ ਸਕਦਾ ਹੈ।
ਮੁੰਬਈ 'ਚ ਉਸ ਦੇ ਵਿਰੁੱਧ ਮੁਕੱਦਮਾ ਦਰਜ ਹੈ, ਇਸ ਲਈ ਉਸ ਨੂੰ ਮੁੰਬਈ ਹੀ ਲਿਆਇਆ ਜਾਵੇਗਾ। ਮਾਲਿਆ ਦੇ ਨਾਲ ਕੇਂਦਰੀ ਜਾਂਚ ਬਿਊਰੋ (ਸੀਬੀਆਈ) ਅਤੇ ਇਨਫੋਰਸਮੈਂਟ ਡਾਇਰੈਕਟੋਰੇਟ (ਈਡੀ) ਦੇ ਅਧਿਕਾਰੀ ਵੀ ਆਉਣਗੇ। ਮੁੰਬਈ ਏਅਰਪੋਰਟ 'ਤੇ ਇੱਕ ਮੈਡੀਕਲ ਟੀਮ ਉਸ ਦੀ ਸਿਹਤ ਜਾਂਚ ਕਰੇਗੀ।
ਜੇ ਮਾਲਿਆ ਰਾਤ ਨੂੰ ਮੁੰਬਈ ਪਹੁੰਚ ਜਾਂਦਾ ਹੈ, ਤਾਂ ਉਸ ਨੂੰ ਸ਼ਹਿਰ ਦੇ ਸੀਬੀਆਈ ਦਫ਼ਤਰ ਵਿਖੇ ਕੁਝ ਸਮਾਂ ਬਿਤਾਉਣਾ ਪਏਗਾ। ਬਾਅਦ ਵਿੱਚ ਉਸ ਨੂੰ ਅਦਾਲਤ ਵਿਚ ਪੇਸ਼ ਕੀਤਾ ਜਾਵੇਗਾ।
ਦਰਅਸਲ ਯੂਕੇ ਕੋਰਟ ਨੇ 14 ਮਈ ਨੂੰ ਮਾਲਿਆ ਦੇ ਭਾਰਤ ਹਵਾਲਗੀ 'ਤੇ ਆਖਿਰੀ ਮੁਹਰ ਲਗਾਈ ਸੀ। ਨਿਯਮ ਮੁਤਾਬਕ, ਭਾਰਤ ਸਰਕਾਰ ਨੂੰ ਮਾਲਿਆ ਨੂੰ ਉਸ ਤਾਰੀਖ ਤੋਂ 28 ਦਿਨ ਦੇ ਅੰਦਰ ਬ੍ਰਿਟੇਨ ਤੋਂ ਲੈ ਜਾਣਾ ਹੈ। ਅਜਿਹੇ 'ਚ 20 ਦਿਨ ਗੁਜ਼ਰ ਚੁੱਕੇ ਹਨ। ਉੱਥੇ ਦੂਜੇ ਪਾਸੇ, ਹਵਾਲਗੀ ਦੀ ਸਾਰੀ ਕਾਨੂੰਨੀ ਪ੍ਰਕਿਰਿਆ ਵੀ ਪੂਰੀ ਹੋ ਚੁੱਕੀ ਹੈ। ਅਜਿਹੇ 'ਚ ਮਾਲਿਆ ਨੂੰ ਕਦੇ ਵੀ ਭਾਰਤ ਲਿਆਇਆ ਜਾ ਸਕਦਾ ਹੈ।
