ਕੋਲਕਾਤਾ: ਕੋਲਕਾਤਾ ਤੋਂ ਮੁੰਬਈ ਜਾ ਰਹੀ ਏਅਰ ਏਸ਼ੀਆ ਦੀ ਇੱਕ ਫਲਾਈਟ ਵਿੱਚ ਅੱਜ ਉਸ ਸਮੇਂ ਹੰਗਾਮਾ ਮਚ ਗਿਆ ਜਦੋਂ ਫਲਾਈਟ 'ਚ ਬੈਠੀ ਇੱਕ ਮਹਿਲਾ ਨੇ ਫਲਾਈਟ ਨੂੰ ਬੰਬ ਨਾਲ ਉਡਾਣ ਦੀ ਧਮਕੀ ਦੇ ਦਿੱਤੀ। ਜਿਸ ਤੋਂ ਬਾਅਦ ਫਲਾਈਟ ਨੂੰ ਵਿਚਕਾਰ ਰਸਤੇ ਵਾਪਸੀ ਕਰਨੀ ਪਈ ਤੇ ਕੋਲਕਾਤਾ 'ਚ ਐਮਰਜੈਂਸੀ ਲੈਂਡਿੰਗ ਕਰਵਾਉਣੀ ਪਈ।
ਜਾਣਕਾਰੀ ਮੁਤਾਬਕ 25 ਸਾਲ ਦੀ ਇੱਕ ਔਰਤ ਮੋਹਿਨੀ ਮੰਡਲ ਨੇ ਯਾਤਰੀ ਜਹਾਜ਼ ਨੂੰ ਉਡਾਉਣ ਦੀ ਧਮਕੀ ਦਿੱਤੀ ਸੀ, ਜਿਸ ਤੋਂ ਬਾਅਦ ਜਹਾਜ਼ ਨੂੰ ਵਾਪਸ ਮੋੜਨਾ ਪਿਆ। ਮੋਹਿਨੀ ਮੰਡਲ ਨੇ ਕਥਿਤ ਤੌਰ 'ਤੇ ਕੈਬਿਨ ਕਰੂ 'ਚੋਂ ਇਕ ਨੂੰ ਇਕ ਨੋਟ ਦਿੱਤਾ। ਉਸ ਨੇ ਕਿਹਾ ਕਿ ਇਹ ਨੋਟ ਫਲਾਈਟ ਕੈਪਟਨ ਕੋਲ ਪਹੁੰਚਾਇਆ ਜਾਵੇ। ਅਧਿਕਾਰੀਆਂ ਨੇ ਕਿਹਾ ਕਿ ਨੋਟ 'ਚ ਲਿਖਿਆ ਗਿਆ ਸੀ ਕਿ ਉਸ ਦੇ ਸਰੀਰ 'ਚ ਬੰਬ ਬੱਝੇ ਸਨ ਤੇ ਉਸ ਵਿੱਚ ਕਿਸੇ ਵੀ ਸਮੇਂ ਧਮਾਕਾ ਹੋ ਸਕਦਾ ਹੈ। ਜਿਸ ਤੋਂ ਬਾਅਦ ਫਲਾਈਟ ਦੀ ਐਮਰਜੈਂਸੀ ਲੈਂਡਿੰਗ ਕਰਵਾਉਣੀ ਪਈ।
ਅਧਿਕਾਰੀਆਂ ਨੇ ਕਿਹਾ ਕਿ ਮੋਹਿਨੀ ਨੂੰ ਗ੍ਰਿਫ਼ਤਾਰ ਕਰ ਲਿਆ ਗਿਆ ਹੈ। ਫਲਾਈਟ ਨੇ ਸ਼ਨਿਚਰਵਾਰ ਰਾਤ 9:57 ਵਜੇ ਉਡਾਨ ਭਰੀ ਸੀ। ਇਕ ਘੰਟੇ ਬਾਅਦ ਫਲਾਈਟ ਵੱਲੋਂ ਏਅਰ ਟ੍ਰੈਫਿਕ ਕੰਟਰੋਲਰ ਨੂੰ ਸੂਚਿਤ ਕੀਤਾ ਗਿਆ ਕਿ ਫਲਾਈਟ ਨੂੰ ਬੰਬ ਨਾਲ ਉਡਾਉਣ ਦੀ ਧਮਕੀ ਕਾਰਨ ਜਹਾਜ਼ ਕੋਲਕਾਤਾ ਵਾਪਸ ਪਰਤ ਰਿਹਾ ਹੈ। ਮੋਹਿਨੀ ਨੂੰ ਕੇਂਦਰੀ ਉਦਯੋਗਿਕ ਸੁਰੱਖਿਆ ਬਲ ਨੇ ਹਿਰਾਸਤ 'ਚ ਲੈ ਲਿਆ ਅਤੇ ਉਸ ਤੋਂ ਪੁਛਗਿੱਛ ਕੀਤੀ ਜਾ ਰਹੀ ਹੈ।
