ਨਵੀਂ ਦਿੱਲੀ: ਭਾਰਤ ਦੇ ਸੱਜੇ ਹੱਥ ਦੇ ਵਿਕਟਕੀਪਰ ਬੱਲੇਬਾਜ਼ ਸੰਜੂ ਸੈਮਸਨ ਦੇ ਪਿਤਾ ਸੈਮਸਨ ਵਿਸ਼ਵਨਾਥ ਨੇ ਕੇਰਲ ਕ੍ਰਿਕਟ ਸੰਘ (ਕੇ.ਸੀ.ਏ.) 'ਤੇ ਗੰਭੀਰ ਦੋਸ਼ ਲਗਾਏ ਹਨ। ਵਿਸ਼ਵਨਾਥ ਨੇ ਦਾਅਵਾ ਕੀਤਾ ਕਿ ਉਨ੍ਹਾਂ ਨੂੰ ਕੈਂਪ ਤੋਂ ਪਹਿਲਾਂ ਹੀ ਪਤਾ ਸੀ ਕਿ ਸੰਜੂ ਨੂੰ ਵਿਜੇ ਹਜ਼ਾਰੇ ਟੂਰਨਾਮੈਂਟ ਵਿੱਚ ਨਹੀਂ ਖਿਡਾਇਆ ਜਾਵੇਗਾ। ਉਨ੍ਹਾਂ ਨੇ ਕਿਹਾ ਕਿ ਕੈਂਪ ਵਿਚ ਹਿੱਸਾ ਨਾ ਲੈਣ ਵਾਲੇ ਹੋਰ ਖਿਡਾਰੀਆਂ ਨੂੰ ਵੀ ਟੂਰਨਾਮੈਂਟ ਲਈ ਚੁਣਿਆ ਗਿਆ, ਹਾਲਾਂਕਿ ਉਨ੍ਹਾਂ ਨੇ ਕੇਸੀਏ ਅਧਿਕਾਰੀਆਂ ਦਾ ਨਾਂ ਨਹੀਂ ਲਿਆ ਅਤੇ ਕਿਹਾ, 'ਮੈਨੂੰ ਪਤਾ ਹੈ ਕਿ ਉਹ ਕੌਣ ਹਨ'। ਉਨ੍ਹਾਂ ਇਹ ਵੀ ਸਵਾਲ ਕੀਤਾ ਕਿ ਕੀ ਕੇਸੀਏ ਕੋਲ ਇਸ ਬਾਰੇ ਕੋਈ ਸਪੱਸ਼ਟੀਕਰਨ ਹੈ। ਵਿਸ਼ਵਨਾਥ ਨੇ ਇਹ ਟਿੱਪਣੀਆਂ ਇੱਕ ਨਿੱਜੀ ਆਨਲਾਈਨ ਇੰਟਰਵਿਊ ਵਿੱਚ ਕੀਤੀਆਂ।
ਮੇਰੇ ਦੋਵੇਂ ਪੁੱਤਰਾਂ ਨਾਲ ਹੋਇਆ ਵਿਤਕਰਾ
ਵਿਸ਼ਵਨਾਥ ਨੇ ਦੱਸਿਆ ਕਿ ਸੰਜੂ ਤੋਂ ਪਹਿਲਾਂ ਉਨ੍ਹਾਂ ਦਾ ਵੱਡਾ ਬੇਟਾ ਸੈਲੀ (ਸੈਲੀ ਸੈਮਸਨ) ਕੇਰਲ ਲਈ ਖੇਡਿਆ ਸੀ। ਉਸ ਨੇ ਅੰਡਰ-19 ਟੀਮ ਲਈ ਸੈਂਕੜਾ ਜੜਿਆ ਸੀ ਅਤੇ ਉਸ ਨੂੰ ਹੋਣਹਾਰ ਖਿਡਾਰੀ ਮੰਨਿਆ ਜਾਂਦਾ ਸੀ। ਬਾਅਦ ਵਿੱਚ, ਉਸ ਨੇ ਰਣਜੀ ਕੈਂਪ ਵਿੱਚ ਵਧੀਆ ਪ੍ਰਦਰਸ਼ਨ ਕੀਤਾ, ਪਰ ਰਣਜੀ ਟਰਾਫੀ ਟੀਮ ਲਈ ਚੁਣਿਆ ਨਹੀਂ ਗਿਆ। ਵਿਸ਼ਵਨਾਥ ਨੇ ਕਿਹਾ ਕਿ ਜਦੋਂ ਸੈਲੀ ਨੂੰ ਕੇਰਲ ਦੀ ਅੰਡਰ-25 ਟੀਮ 'ਚ ਸ਼ਾਮਲ ਕੀਤਾ ਗਿਆ ਸੀ ਤਾਂ ਉਸ ਨੂੰ ਉਦੋਂ ਵੀ 4 ਮੈਚਾਂ 'ਚ ਖੇਡਣ ਦਾ ਮੌਕਾ ਨਹੀਂ ਦਿੱਤਾ ਗਿਆ ਸੀ। ਵਿਸ਼ਵਨਾਥ ਨੇ ਕਿਹਾ, 'ਅਸੀਂ ਖਿਡਾਰੀ ਹਾਂ। ਸਾਨੂੰ ਖੇਡਾਂ ਦੇ ਕਾਰੋਬਾਰ ਵਿੱਚ ਕੋਈ ਦਿਲਚਸਪੀ ਨਹੀਂ ਹੈ। ਕੁਝ ਲੋਕ ਸੋਚ ਸਕਦੇ ਹਨ ਕਿ ਅਸੀਂ ਇੱਥੇ ਰੈਂਕ ਵਧਾਉਣ ਲਈ ਆਏ ਹਾਂ, ਪਰ ਸਾਨੂੰ ਇਸ ਵਿੱਚ ਕੋਈ ਦਿਲਚਸਪੀ ਨਹੀਂ ਹੈ'।
Sanju Samson’s father said: “There are people within KCA who have something against my child, We’ve never spoken out against the association before, but this time, it’s become too much. Sanju isn’t the only one who didn’t attend the camp“ (Mathrubhumi)
— Vipin Tiwari (@Vipintiwari952) January 21, 2025
pic.twitter.com/Y2vPwv5KXm
ਸੰਜੂ ਨੂੰ ਹਟਾਉਣ ਦੀ ਵੀ ਕੋਸ਼ਿਸ਼ ਕੀਤੀ ਗਈ
ਵਿਸ਼ਵਨਾਥ ਨੇ ਇਹ ਸਵਾਲ ਵੀ ਉਠਾਇਆ ਕਿ ਸੰਜੂ ਤੋਂ ਪਹਿਲਾਂ ਭਾਰਤੀ ਟੀਮ ਦੇ ਸੰਭਾਵੀ ਉਮੀਦਵਾਰ ਦੇ ਤੌਰ 'ਤੇ ਦੇਖੇ ਜਾਣ ਵਾਲੇ ਉਨ੍ਹਾਂ ਦੇ ਵੱਡੇ ਬੇਟੇ ਨੂੰ ਕਿਉਂ ਬਾਹਰ ਰੱਖਿਆ ਗਿਆ। ਉਨ੍ਹਾਂ ਨੇ ਅੱਗੇ ਦਾਅਵਾ ਕੀਤਾ ਕਿ ਸੰਜੂ ਨੂੰ ਹਟਾਉਣ ਦੀ ਕੋਸ਼ਿਸ਼ ਕੀਤੀ ਗਈ ਸੀ। ਉਨ੍ਹਾਂ ਨੇ ਰਣਜੀ ਮੈਚ ਦੌਰਾਨ ਵਾਪਰੀ ਘਟਨਾ ਨੂੰ ਯਾਦ ਕੀਤਾ ਜਦੋਂ ਉਨ੍ਹਾਂ ਦੇ ਪੁੱਤਰ ਦੇ ਦੋਵੇਂ ਗੋਡੇ ਜ਼ਖ਼ਮੀ ਹੋ ਗਏ ਸਨ। ਵਿਸ਼ਵਨਾਥ ਨੇ ਛੁੱਟੀ ਮੰਗਣ ਲਈ ਫੋਨ ਕੀਤਾ ਸੀ ਅਤੇ ਕੇਸੀਏ ਦੇ ਤਤਕਾਲੀ ਪ੍ਰਧਾਨ ਟੀਸੀ ਮੈਥਿਊ ਨਾਲ ਉਨ੍ਹਾਂ ਦੀ ਥੋੜੀ ਜਿਹੀ ਬਹਿਸ ਹੋਈ ਸੀ।
ਵਿਸ਼ਵਨਾਥ ਦੇ ਮੁਤਾਬਕ, ਮੈਥਿਊ ਨੂੰ ਉਨ੍ਹਾਂ ਨੇ ਆਦਰ ਨਾਲ ਸੰਬੋਧਨ ਕੀਤਾ ਸੀ ਪਰ ਇਸ ਦੇ ਬਾਵਜੂਦ ਉਨ੍ਹਾਂ ਨਾਲ ਸਹੀ ਤਰੀਕੇ ਨਾਲ ਗੱਲ ਨਹੀਂ ਕੀਤੀ ਗਈ। 'ਮੈਂ ਉਨ੍ਹਾਂ ਨੂੰ ਸਰ ਕਿਹਾ, ਪਰ ਉਨ੍ਹਾਂ ਨੇ ਜਵਾਬ 'ਚ ਪੁੱਛਿਆ, 'ਕੀ ਤੁਸੀਂ ਕੇਰਲ ਕ੍ਰਿਕਟ ਟੀਮ ਦੇ ਕੋਚ ਹੋ?' ਵਿਸ਼ਵਨਾਥ ਨੇ ਯਾਦ ਕਰਦਿਆਂ ਕਿਹਾ ਕਿ ਉਹ ਕੇਸੀਏ ਦੁਆਰਾ ਉਨ੍ਹਾਂ ਦੇ ਪਰਿਵਾਰ ਨੂੰ ਦਿੱਤੇ ਗਏ ਪਿਛਲੇ ਸਮਰਥਨ ਦੀ ਸ਼ਲਾਘਾ ਕਰਦੇ ਹਨ।
ਕੇਸੀਏ ਵਿੱਚ ਕੁਝ ਲੋਕਾਂ ਨਾਲ ਸਮੱਸਿਆ ਹੈ
ਵਿਸ਼ਵਨਾਥ ਨੇ ਕਿਹਾ ਕਿ ਜੇਕਰ ਉਨ੍ਹਾਂ ਦੇ ਬੱਚਿਆਂ ਤੋਂ ਕੋਈ ਗਲਤੀ ਜਾਂ ਸਮੱਸਿਆ ਹੈ ਤਾਂ ਕੇਸੀਏ ਉਨ੍ਹਾਂ ਨਾਲ ਸਿੱਧਾ ਸੰਪਰਕ ਕਰ ਸਕਦਾ ਹੈ। ਉਨ੍ਹਾਂ ਨੇ ਕਿਹਾ, 'ਅਸੀਂ ਕਦੇ ਵੀ ਕੇਸੀਏ ਦੇ ਖਿਲਾਫ ਨਹੀਂ ਖੜ੍ਹੇ ਹੋਏ। ਸਮੱਸਿਆ ਕੁਝ ਲੋਕਾਂ ਨਾਲ ਹੈ'। ਉਨ੍ਹਾਂ ਨੇ ਕਿਹਾ, 'ਜੇਕਰ ਤੁਸੀਂ ਉਨ੍ਹਾਂ ਨੂੰ ਨਮਸਕਾਰ ਨਹੀਂ ਕਰਦੇ, ਤਾਂ ਵੀ ਇਹ ਇੱਕ ਸਮੱਸਿਆ ਬਣ ਜਾਂਦੀ ਹੈ। ਮੇਰੇ ਮਨ 'ਚ ਸਾਰਿਆਂ ਲਈ ਸਤਿਕਾਰ ਅਤੇ ਪਿਆਰ ਹੈ'।
ਤੁਹਾਨੂੰ ਦੱਸ ਦਈਏ ਕਿ ਇਸ ਤੋਂ ਪਹਿਲਾਂ ਸੰਸਦ ਮੈਂਬਰ ਸ਼ਸ਼ੀ ਥਰੂਰ ਨੇ ਵੀ ਟਿੱਪਣੀ ਕੀਤੀ ਸੀ ਕਿ ਕੇਸੀਏ ਅਧਿਕਾਰੀਆਂ ਦਾ ਹੰਕਾਰ ਸੰਜੂ ਦੇ ਕਰੀਅਰ ਨੂੰ ਨੁਕਸਾਨ ਪਹੁੰਚਾ ਰਿਹਾ ਹੈ। ਥਰੂਰ ਨੇ ਸੋਸ਼ਲ ਮੀਡੀਆ ਪਲੇਟਫਾਰਮ ਐਕਸ 'ਤੇ ਆਪਣੇ ਵਿਚਾਰ ਸਾਂਝੇ ਕੀਤੇ ਸਨ।
