ਮੁੰਬਈ (ਬਿਊਰੋ): ਮੁੰਬਈ ਇੰਡੀਅਨਜ਼ ਅਤੇ ਰਾਜਸਥਾਨ ਰਾਇਲਸ ਵਿਚਾਲੇ ਖੇਡੇ ਗਏ ਮੈਚ 'ਚ ਰਾਜਸਥਾਨ ਰਾਇਲਸ ਨੇ ਸ਼ਾਨਦਾਰ ਜਿੱਤ ਹਾਸਲ ਕੀਤੀ ਹੈ। ਰਾਜਸਥਾਨ ਦੀ ਇਸ ਸੀਜ਼ਨ 'ਚ ਇਹ ਲਗਾਤਾਰ ਤੀਜੀ ਜਿੱਤ ਹੈ ਅਤੇ ਇਸ ਦੇ ਨਾਲ ਸੰਜੂ ਸੈਮਸਨ ਦੀ ਅਗਵਾਈ ਵਾਲੀ ਰਾਜਸਥਾਨ ਅੰਕ ਸੂਚੀ 'ਚ ਸਿਖਰ 'ਤੇ ਪਹੁੰਚ ਗਈ ਹੈ। ਮੁੰਬਈ ਇੰਡੀਅਨਜ਼ ਨੂੰ ਇਸ ਸੀਜ਼ਨ 'ਚ ਲਗਾਤਾਰ ਤੀਜੀ ਹਾਰ ਦਾ ਸਾਹਮਣਾ ਕਰਨਾ ਪਿਆ ਹੈ। ਹਾਰਦਿਕ ਪੰਡਯਾ ਦੀ ਅਗਵਾਈ ਵਾਲੀ ਮੁੰਬਈ ਦੀ ਇਸ ਆਈਪੀਐਲ ਵਿੱਚ ਸ਼ੁਰੂਆਤ ਚੰਗੀ ਨਹੀਂ ਰਹੀ ਹੈ।
MI ਦੇ ਚੋਟੀ ਦੇ 3 ਬੱਲੇਬਾਜ਼ਾਂ ਦੀ ਗੋਲਡਨ ਡੱਕਸ: ਰਾਜਸਥਾਨ ਨੇ ਟਾਸ ਜਿੱਤ ਕੇ ਪਹਿਲਾਂ ਗੇਂਦਬਾਜ਼ੀ ਕਰਨ ਦਾ ਫੈਸਲਾ ਕੀਤਾ। ਬੱਲੇਬਾਜ਼ੀ ਕਰਨ ਆਈ ਮੁੰਬਈ ਦੀ ਟੀਮ ਦੀ ਸ਼ੁਰੂਆਤ ਕਾਫੀ ਖਰਾਬ ਰਹੀ। ਸਾਬਕਾ ਕਪਤਾਨ ਅਤੇ ਸਲਾਮੀ ਬੱਲੇਬਾਜ਼ ਰੋਹਿਤ ਸ਼ਰਮਾ 0 ਦੌੜਾਂ 'ਤੇ ਆਊਟ ਹੋਏ। ਇਸ ਤੋਂ ਬਾਅਦ ਅਗਲੀ ਹੀ ਗੇਂਦ 'ਤੇ ਬੋਲਟ ਨੇ ਨਮਨ ਧੀਰ ਨੂੰ ਪੈਵੇਲੀਅਨ ਭੇਜ ਦਿੱਤਾ। ਇਸ ਤੋਂ ਬਾਅਦ ਬੱਲੇਬਾਜ਼ੀ ਕਰਨ ਆਏ ਬ੍ਰੇਵਿਸ ਵੀ 0 ਦੇ ਸਕੋਰ 'ਤੇ ਹੀ ਰਹੇ। ਇਹ ਤਿੰਨੋਂ ਬੱਲੇਬਾਜ਼ ਮੁੰਬਈ ਦੇ ਟਾਪ ਆਰਡਰ ਬੱਲੇਬਾਜ਼ ਸਨ।
ਮੈਦਾਨ 'ਚ ਇਕ ਫੈਨ ਸੁਰੱਖਿਆ ਨੂੰ ਬਾਈਪਾਸ ਕਰ ਕੇ ਰੋਹਿਤ ਸ਼ਰਮਾ ਦੇ ਕੋਲ ਮੈਦਾਨ 'ਤੇ ਪਹੁੰਚ ਗਿਆ। ਜਦੋਂ ਉਹ ਰੋਹਿਤ ਸ਼ਰਮਾ ਕੋਲ ਪਹੁੰਚਿਆ ਤਾਂ ਰੋਹਿਤ ਸ਼ਰਮਾ ਉਸ ਨੂੰ ਦੇਖ ਕੇ ਘਬਰਾ ਗਿਆ, ਜਿਸ ਤੋਂ ਬਾਅਦ ਉਸ ਨੇ ਰੋਹਿਤ ਸ਼ਰਮਾ ਨੂੰ ਜੱਫੀ ਪਾ ਲਈ। ਉਸ ਨੇ ਕੋਲ ਖੜ੍ਹੇ ਈਸ਼ਾਨ ਕਿਸ਼ਨ ਨੂੰ ਵੀ ਜੱਫੀ ਪਾ ਲਈ। ਇਸ ਤੋਂ ਪਹਿਲਾਂ ਵੀ ਕਈ ਵਾਰ ਪ੍ਰਸ਼ੰਸਕ ਆਪਣੇ ਚਹੇਤੇ ਖਿਡਾਰੀਆਂ ਨੂੰ ਮਿਲਣ ਲਈ ਮੈਚ ਦੇ ਵਿਚਕਾਰ ਮੈਦਾਨ ਵਿੱਚ ਛਾਲ ਮਾਰ ਕੇ ਅਜਿਹਾ ਕਰ ਚੁੱਕੇ ਹਨ।
ਟ੍ਰੇਂਟ ਬੋਲਟ ਬਣਿਆ ਪਲੇਅਰ ਆਫ ਦਾ ਮੈਚ : ਰਾਜਸਥਾਨ ਰਾਇਲਜ਼ ਦੇ ਤੇਜ਼ ਗੇਂਦਬਾਜ਼ ਟ੍ਰੇਂਟ ਬੋਲਟ ਨੂੰ ਉਨ੍ਹਾਂ ਦੇ ਸ਼ਾਨਦਾਰ ਪ੍ਰਦਰਸ਼ਨ ਦੇ ਆਧਾਰ 'ਤੇ ਪਲੇਅਰ ਆਫ ਦਾ ਮੈਚ ਚੁਣਿਆ ਗਿਆ। ਇਸ ਮੈਚ 'ਚ ਉਸ ਨੇ ਪਹਿਲੇ ਓਵਰ 'ਚ 2 ਅਤੇ ਦੂਜੇ ਓਵਰ 'ਚ ਇਕ ਵਿਕਟ ਲਈ। ਬੋਲਟ ਨੇ ਆਪਣੇ 4 ਓਵਰਾਂ 'ਚ 22 ਦੌੜਾਂ ਦੇ ਕੇ 3 ਵਿਕਟਾਂ ਲਈਆਂ। ਸੀਜ਼ਨ ਦੇ ਪਹਿਲੇ ਮੈਚ 'ਚ ਵੀ ਬੋਲਟ ਨੇ ਸ਼ਾਨਦਾਰ 2 ਵਿਕਟਾਂ ਲਈਆਂ ਸਨ। ਤਿੰਨ ਵਿਕਟਾਂ ਲੈ ਕੇ ਬੋਲਟ ਆਈਪੀਐਲ ਦੇ ਪਹਿਲੇ ਓਵਰ ਵਿੱਚ 25 ਵਿਕਟਾਂ ਲੈਣ ਵਾਲੇ ਪਹਿਲੇ ਖਿਡਾਰੀ ਬਣ ਗਏ ਹਨ।
ਰਿਆਨ ਪਰਾਗ ਨੂੰ ਮਿਲੀ ਔਰੇਂਜ ਕੈਪ: ਇਸ ਸੀਜ਼ਨ ਵਿੱਚ ਸ਼ਾਨਦਾਰ ਪ੍ਰਦਰਸ਼ਨ ਕਰ ਰਹੇ ਰਿਆਨ ਪਰਾਗ ਨੇ ਅਰਧ ਸੈਂਕੜੇ ਦੀ ਸ਼ਾਨਦਾਰ ਪਾਰੀ ਖੇਡੀ। ਉਸ ਨੇ ਤੀਜੇ ਮੈਚ ਵਿੱਚ ਅਜੇਤੂ 54 ਦੌੜਾਂ ਬਣਾਈਆਂ। ਇਸ ਤੋਂ ਪਹਿਲਾਂ ਉਸ ਨੇ 84 ਦੌੜਾਂ ਦੀ ਅਜੇਤੂ ਪਾਰੀ ਖੇਡੀ ਸੀ। ਉਸ ਨੇ ਲਖਨਊ ਖਿਲਾਫ 43 ਦੌੜਾਂ ਬਣਾਈਆਂ ਸਨ। ਕੁੱਲ ਮਿਲਾ ਕੇ ਉਨ੍ਹਾਂ ਨੇ 3 ਮੈਚਾਂ 'ਚ 181 ਦੌੜਾਂ ਬਣਾਈਆਂ ਹਨ।ਇਸ ਸੀਜ਼ਨ 'ਚ ਵਿਰਾਟ ਕੋਹਲੀ ਦੇ ਨਾਂ ਵੀ 81 ਦੌੜਾਂ ਹਨ।
