ਮੁੰਬਈ (ਬਿਊਰੋ): ਹਿੰਦੀ, ਮਰਾਠੀ ਅਤੇ ਬੰਗਾਲੀ ਫਿਲਮਾਂ 'ਚ ਆਪਣੀ ਅਦਾਕਾਰੀ ਲਈ ਮਸ਼ਹੂਰ ਅਦਾਕਾਰਾ ਸਮ੍ਰਿਤੀ ਬਿਸਵਾਸ ਨਹੀਂ ਰਹੇ। ਬੁੱਧਵਾਰ ਨੂੰ 100 ਸਾਲ ਦੀ ਉਮਰ 'ਚ ਉਨ੍ਹਾਂ ਦੀ ਮੌਤ ਹੋ ਗਈ। ਇਸ ਗੱਲ ਦੀ ਪੁਸ਼ਟੀ ਫਿਲਮ ਹੈਰੀਟੇਜ ਫਾਊਂਡੇਸ਼ਨ ਨੇ ਕੀਤੀ, ਉਨ੍ਹਾਂ ਨੇ ਮਹਾਰਾਸ਼ਟਰ ਦੇ ਨਾਸਿਕ ਸਥਿਤ ਆਪਣੇ ਘਰ ਆਖਰੀ ਸਾਹ ਲਿਆ। ਸਮ੍ਰਿਤੀ ਬਿਸਵਾਸ ਨੇ 17 ਫਰਵਰੀ 2024 ਨੂੰ ਆਪਣਾ 100ਵਾਂ ਜਨਮਦਿਨ ਮਨਾਇਆ।
ਫਿਲਮ ਹੈਰੀਟੇਜ ਫਾਊਂਡੇਸ਼ਨ ਨੇ ਕੀਤੀ ਮੌਤ ਦੀ ਪੁਸ਼ਟੀ: ਫਿਲਮ ਹੈਰੀਟੇਜ ਫਾਊਂਡੇਸ਼ਨ ਨੇ ਸੋਸ਼ਲ ਮੀਡੀਆ 'ਤੇ ਅਦਾਕਾਰਾ ਦੀ ਤਸਵੀਰ ਪੋਸਟ ਕੀਤੀ ਅਤੇ ਲਿਖਿਆ, 'ਮਸ਼ਹੂਰ ਅਦਾਕਾਰਾ ਸਮ੍ਰਿਤੀ ਬਿਸਵਾਸ ਦੇ ਦੇਹਾਂਤ ਦੀ ਖਬਰ ਸੁਣ ਕੇ ਬਹੁਤ ਦੁੱਖ ਹੋਇਆ। ਉਨ੍ਹਾਂ ਨੇ ਇਸ ਸਾਲ ਫਰਵਰੀ 'ਚ ਆਪਣਾ 100ਵਾਂ ਜਨਮਦਿਨ ਮਨਾਇਆ ਸੀ। ਉਹ 1940 ਅਤੇ 1950 ਦੇ ਦਹਾਕੇ ਦੀਆਂ ਸਭ ਤੋਂ ਪ੍ਰਤਿਭਾਸ਼ਾਲੀ ਅਤੇ ਸੁੰਦਰ ਸੁੰਦਰੀਆਂ ਵਿੱਚੋਂ ਇੱਕ ਸੀ। ਵੀਰਵਾਰ ਨੂੰ ਈਸਾਈ ਰੀਤੀ ਰਿਵਾਜ਼ਾਂ ਅਨੁਸਾਰ ਉਸ ਦਾ ਸਸਕਾਰ ਕਰ ਦਿੱਤਾ ਗਿਆ।
ਬਾਲੀਵੁੱਡ ਨੂੰ ਦਿੱਤੀਆਂ ਕਈ ਹਿੱਟ ਫਿਲਮਾਂ: ਆਪਣੇ ਐਕਟਿੰਗ ਕਰੀਅਰ 'ਚ ਇਸ ਦਿੱਗਜ ਅਦਾਕਾਰਾ ਨੇ ਕਈ ਹਿੱਟ ਫਿਲਮਾਂ 'ਚ ਕੰਮ ਕੀਤਾ। ਉਨ੍ਹਾਂ ਨੇ 'ਨੇਕ ਦਿਲ', 'ਅਪਰਾਜਿਤਾ' ਅਤੇ 'ਮਾਡਰਨ ਗਰਲ' ਵਰਗੀਆਂ ਕਈ ਹਿੱਟ ਫਿਲਮਾਂ 'ਚ ਯਾਦਗਾਰੀ ਕਿਰਦਾਰ ਨਿਭਾਏ। ਉਸਨੇ ਸਿਰਫ 10 ਸਾਲ ਦੀ ਉਮਰ ਵਿੱਚ ਬੰਗਾਲੀ ਫਿਲਮ 'ਸੰਧਿਆ' ਵਿੱਚ ਬਾਲ ਕਲਾਕਾਰ ਦੇ ਰੂਪ ਵਿੱਚ ਆਪਣੇ ਕਰੀਅਰ ਦੀ ਸ਼ੁਰੂਆਤ ਕੀਤੀ ਸੀ। ਅਦਾਕਾਰਾ ਨੇ ਆਪਣੀ ਦਮਦਾਰ ਅਦਾਕਾਰੀ ਕਰਕੇ ਇੰਡਸਟਰੀ ਵਿੱਚ ਆਪਣੀ ਵੱਖਰੀ ਪਛਾਣ ਬਣਾਈ ਸੀ।
ਵਿਆਹ ਤੋਂ ਬਾਅਦ ਬਣਾਈ ਸੀ ਫਿਲਮਾਂ ਤੋਂ ਦੂਰੀ: ਉਹ ਬਿਮਲ ਰਾਏ ਦੀ ਫਿਲਮ 'ਆਦਮੀ', ਕਿਸ਼ੋਰ ਕੁਮਾਰ ਦੀ ਫਿਲਮ 'ਭਾਗਮ ਭਾਗ', ਭਗਵਾਨ ਦਾਦਾ ਦੀ ਫਿਲਮ 'ਬਾਪ ਰੇ ਬਾਪ', ਦੇਵਾਨੰਦ ਦੀ ਫਿਲਮ 'ਹਮ ਸਫਰ', ਗੁਰੂ ਦੱਤ ਦੀ ਫਿਲਮ 'ਸੈਲਾਬ' 'ਚ ਨਜ਼ਰ ਆਈ ਅਤੇ ਉਹ ਸ਼ਾਂਤਾਰਾਮ ਦੀ 'ਤੀਨ ਬੱਤੀ', ਰਾਜ ਕਪੂਰ ਦੀ 'ਜਾਗਤੇ ਰਹੋ', ਬੀਆਰ ਚੋਪੜਾ ਦੀ 'ਚਾਂਦਨੀ ਚੌਕ' ਸਮੇਤ ਕਈ ਫਿਲਮਾਂ ਦਾ ਹਿੱਸਾ ਸੀ। 1960 ਵਿੱਚ ਫਿਲਮ ਨਿਰਦੇਸ਼ਕ ਐਸਡੀ ਨਾਰੰਗ ਨਾਲ ਵਿਆਹ ਕਰਨ ਤੋਂ ਬਾਅਦ ਅਦਾਕਾਰਾ ਅਦਾਕਾਰੀ ਤੋਂ ਦੂਰ ਰਹੀ।
