ବ୍ରହ୍ମପୁରରେ ବୁଲା କୁକୁରଙ୍କ ଦୌରାତ୍ମ୍ୟ: କୁକୁର ଭୟରେ କାରରେ ପିଟିହେଲା ସ୍କୁଟି, ଭିଡିଓ ଭାଇରାଲ

ବ୍ରହ୍ମପୁର: ବ୍ରହ୍ମପୁରରେ ଦିନକୁ ଦିନ ବଢ଼ୁଛି ବୁଲା କୁକୁରଙ୍କ ଆତଙ୍କ । କୁକୁର ଭୟରେ ରାସ୍ତାକଡ଼ରେ ଥିବା କାରରେ ପିଟି ହୋଇଗଲେ ଦୁଇ ମହିଳା ଓ ଶିଶୁ । ସ୍କୁଟିରେ ଯାଉଥିବା ସମୟରେ କୁକୁର ଗୋଡ଼ାଇବାରୁ ଅନ୍ୟମନସ୍କ ହୋଇ ରାସ୍ତା କଡ଼ରେ ଛିଡ଼ା ହୋଇଥିବା କାରରେ ପିଟି ହୋଇଯାଇଥିବାର ଭିଡିଓ ଏକ ସିସିଟିଭି କ୍ୟାମେରାରେ କଏଦ ହୋଇଛି । ଯାହା ସ୍ଥାନୀୟ ଅଞ୍ଚଳରେ ଏବେ ସୋସିଆଲ ମିଡିଆରେ ଭାଇରାଲ ହେଉଛି । ବ୍ରହ୍ମପୁର ସହରରେ ଘଟିଯାଇଛି ଏଭଳି ଘଟଣା ।  

ସୂଚନା ଅନୁସାରେ ସୋମବାର ସକାଳ ସମୟରେ ବ୍ରହ୍ମପୁର ସହରର ଗାନ୍ଧିନଗର ଅଞ୍ଚଳର ଦୁଇ ଭଉଣୀ ନିଜର ଏକ ସ୍କୁଟି ଧରି ବ୍ରହ୍ମପୁର ସହରର ନୀଳକଣ୍ଠେଶ୍ଵର ଶୈବପୀଠକୁ ଦର୍ଶନ କରିବାକୁ ଯାଉଥିଲେ । ଏହି ସମୟରେ ସ୍କୁଟି ଚାଳକଙ୍କୁ ଗାନ୍ଧିନଗର ସପ୍ତମ ଲାଇନ୍ ନିକଟରେ ଉକ୍ତ ସାହିର କିଛି ବୁଲା କୁକୁର ଗୋଡାଇଥିଲେ । ଫଳରେ ସେମାନେ ଭୟରେ କୁକୁର ଗୁଡିକୁ ଘଉଡାଇବା ପାଇଁ ଚେଷ୍ଟା କରି ବିଫଳ ହେବା ପରେ କୁକୁରଙ୍କ ଆକ୍ରମଣ ଭୟରେ ସ୍କୁଟି ଚାଳକ ଜଣଙ୍କ ଦୃତଗତିରେ ଯାଉଥିଲେ । ଏତିକିବେଳେ ରାସ୍ତାକଡ଼ରେ ରହିଥିବା ଏକ କାରରେ ପିଟି ହୋଇ ଯାଇଥିଲେ । ଦୁର୍ଘଟଣାରେ ଦୁଇ ମହିଳା ସାମାନ୍ୟ ଗୁରୁତର ହୋଇଥିବା ବେଳେ ଶିଶୁଟି ମଧ୍ୟ ସାମାନ୍ୟ ଆହତ ହୋଇ ଅଳ୍ପକେ ବର୍ତ୍ତିଛନ୍ତି । ହେଲେ ଏହି ଘଟଣାର ଭିଡିଓ ସ୍ଥାନୀୟ ଅଞ୍ଚଳରେ ଲାଗିଥିବା ସିସିଟିଭିରେ କଏଦ ହୋଇଥିବା ବେଳେ ସେହି ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି ।  

ତେବେ ରେଶମ ସହର ବ୍ରହ୍ମପୁରରେ ଦିନକୁ ଦିନ ବୁଲା କୁକୁରଙ୍କ ଦୌରାତ୍ମ୍ୟ ବୃଦ୍ଧି ପାଉଛି ।‌ ଯାହାର ଜ୍ବଳନ୍ତ ଉଦାହରଣ ଏହି ଘଟଣାରେ ସ୍ପଷ୍ଟ ହୋଇଛି । ଭୋର ସକାଳ ୬ଟା ସମୟରେ କିଛି ବୁଲା କୁକୁର ସ୍କୁଟିକୁ ଗୋଡାଇବା ସହ ଭାରସାମ୍ୟ ହରାଇ ସ୍କୁଟିଟି ରାସ୍ତା ପାର୍ଶ୍ବରେ ରହିଥିବା କାରକୁ ଧକ୍କା ଦେବା ଘଟଣା ସାରା ସହରରେ ଚର୍ଚ୍ଚାର ବିଷୟ ପାଲଟିଛି । କାରକୁ ଧକ୍କା ଦେବା ଫଳରେ ସ୍କୁଟି ବସିଥିବା ଦୁଇ ମହିଳା ଓ ଶିଶୁ ଓଲଟି ତଳେ ପଡ଼ିଥିଲେ । ତେବେ ବୁଲା କୁକୁରଙ୍କ ପ୍ରାଦୁର୍ଭାବ ଦିନକୁ ଦିନ ବଢୁଥିବା ବେଳେ ଏନେଇ ବ୍ରହ୍ମପୁର ମହାନଗର ନିଗମ ପକ୍ଷରୁ କୈାଣସି ପଦକ୍ଷେପ ନିଆଯାଉନଥିବା ଯୋଗୁଁ ଏଥିପ୍ରତି ଅଧିକ ଗୁରୁତ୍ବ ଦେବାକୁ ଅନୁରୋଧ କରିଛନ୍ତି ଦୁଇ ଆହତ ମହିଳା ଏ.ସସ୍ମିତା ଏବଂ ଏ.ସୁପ୍ରିୟା । ସେପଟେ ଏଭଳି ଭିଡିଓଟି ସମସ୍ତଙ୍କୁ ବ୍ୟଥିତ କରିଛି । ଆହତ ଦୁଇ ମହିଳାଙ୍କ ସମେତ ସେମାନଙ୍କ ପରିବାର ସହ ଏନେଇ ଆଲୋଚନା କରିଛନ୍ତି ଆମ ପ୍ରତିନିଧି ସମୀର ଆଚାର୍ଯ୍ୟ ।

ଇଟିଭି ଭାରତ, ବ୍ରହ୍ମପୁର