ସୁବର୍ଣ୍ଣପୁର: ଜିଲ୍ଲାର ଡୁଙ୍ଗୁରିପାଲି ପୋଲିସ ପିଙ୍କୁ (ହିରୋ) ହାତୀର ହତ୍ୟାକାରୀମାନଙ୍କୁ ଗିରଫ କରିବା ସହିତ ହତ୍ୟା ଘଟଣାର ପର୍ଦ୍ଦାଫାସ କରିବାରେ ସଫଳ ହୋଇଛି । ହତ୍ୟାକାରୀମାନେ ଡୁମେରଖୋଲ ଗାଁର ମକରଧ୍ବଜ ମଲ୍ଲିକ, ଅନନ୍ତ ରଣା, ସଚ୍ଚିଦାନନ୍ଦ ମଲ୍ଲିକ ଓ ସହଯୋଗୀ ସୁଧିର ବଗୁ ବୋଲି ଜିଲ୍ଲା ଆରକ୍ଷୀ ଅଧିକ୍ଷକ ଆୟୋଜିତ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ।
ସୂଚନାଯୋଗ୍ୟଯେ ଗତ 14 ତାରିଖରେ ଜିଲ୍ଲାର ବାରପାହାଡ ଜଙ୍ଗଲରେ ଏକ ଗଳିତ ଶବ ପୋଲିସ ଉଦ୍ଧାର କରିଥିଲା । ସାଇନଟିଫିକ ଟିମ ସହାୟତାରେ ତଦନ୍ତ କରିବା ସହିତ ଡୁମେରଖୋଲ ଗାଁର ଧନୁର୍ଜୟ ହାତୀଙ୍କ ପୁଅ ପିଙ୍କୁର ଶବ ବୋଲି ଚିହ୍ନଟ କରାଯାଇଥିଲା । ତେବେ ପୋଲିସ ଛାନଭିନ କରିବା ପରେ ପିଙ୍କୁକୁ ମକରଧ୍ବଜ ଘରକୁ ଯାଇ ଉତ୍ପାତ କରିଥିବା ବେଳେ ବାରମ୍ବାର ମନା କରିବା ସତ୍ତ୍ବେ ମକରଧ୍ବଜ ଘରୁ ବାହାରି ନ ଥିଲା । ଫଳରେ ମକରଧ୍ବଜ ,ଅନନ୍ତ ଓ ସଚ୍ଚିଦାନନ୍ଦ ଟାଙ୍ଗିଆରେ ତାକୁ ଆକ୍ରମଣ କରିଥିଲେ । ଘଟଣାସ୍ଥଳରେ ହିଁ ପିଙ୍କୁର ମୃତ୍ୟୁ ହୋଇଥିଲା ।
ଅଭିଯୁକ୍ତମାନେ ସୁଧିର ସହାୟତାରେ ଶବକୁ ନେଇ ଜଙ୍ଗଲରେ ଫୋଫାଡି ଦେଇଥିଲେ । ଯାହାକୁ କି ପୋଲିସ ଉଦ୍ଧାର କରି ତଦନ୍ତ ଆରମ୍ଭ କରିଥିଲା । ପିଙ୍କୁ ହାତୀର ଶବରେ ବହୁ କ୍ଷତ ଥିବାବେଳେ ତାର ଗୋଡ ଭାଙ୍ଗି ଯାଇଥିବା ତଦନ୍ତରୁ ଜଣାପଡିଥିଲା । ପୋଲିସ ନିଜ ସୁତ୍ରକୁ ଆଧାର କରି ତଦନ୍ତ କରି ଅଭିଯୁକ୍ତମାନଙ୍କୁ ଗିରଫ କରି ପଚରା ଉଚୁରା କରିବା ପରେ ସଂପୂର୍ଣ୍ଣ ଘଟଣା ପଦାକୁ ଆସିଥିଲା । ପୋଲିସ ଆଗରେ ଅଭିଯୁକ୍ତମାନେ ଦୋଷ ସ୍ବୀକାର ବି କରିଛନ୍ତି । ତେବେ ହତ୍ୟା ଅଭିଯୁକ୍ତମାନଙ୍କୁ ଆଜି ପୋଲିସ କୋର୍ଟ ଚାଲାଣ କରିଥିବା ଜିଲ୍ଲା ଆରକ୍ଷୀ ଅଧିକ୍ଷକ ସୂଚନା ଦେଇଛନ୍ତି ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
