ସୁବର୍ଣ୍ଣପୁର : ଜିଲ୍ଲାରେ ଥିବା ତେଲ ନଦୀରୁ ଆଜି(ଗୁରୁବାର) ଏକ ବିରଳ ପ୍ରଜାତିର ମାଛ ଉଦ୍ଧାର ହୋଇଛି । ତେଲ ନଦୀରେ ଆଜି ସକାଳୁ ମତ୍ସ୍ୟଜୀବୀମାନେ ମାଛ ଧରୁଥିବାବେଳେ ଏହି ବିରଳ ପ୍ରଜାତିର ମାଛ ଜାଲରେ ଲାଗିଥିଲା ।
ତେଲ ନଦୀର ବିରଳ ପ୍ରଜାତିର ମାଛ
ମତ୍ସ୍ୟଜୀବୀ ସଂଜୟ ଅଧିକାରୀ ଓ ପ୍ରମୋଦ ନାୟକ ଡଙ୍ଗାରେ ତେଲ ନଦୀ ଗର୍ଭକୁ ମାଛ ଧରା ଉପକରଣ ନେଇ ମାଛ ମାରିବାକୁ ଯାଇଥିଲେ । ତେବେ ମାଛ ମାରୁ ମାରୁ ଏକ ବିରଳ ପ୍ରଜାତିର ମାଛ ଜାଲରେ ଲାଗିଥିବା ଦେଖିବାକୁ ପାଇଥିଲେ।
ଏକ କିଲୋଗ୍ରାମ ଓଜନର ଏହି ବିରଳ ପ୍ରଜାତିର ମାଛକୁ ଆଣି ଅନ୍ୟ ମତ୍ସ୍ୟଜୀବୀଙ୍କୁ ଦେଖାଇଥିଲେ । ତେବେ ସେମାନେ କେହି ବି ଏଭଳି ମାଛ ତେଲ ନଦୀ ଅବା ମହାନଦୀରେ କେବେ ଦେଖି ନଥିବା କହିଥିଲେ ।
ଏହାକୁ ଦେଖିବା ପାଇଁ ଲୋକେ ମତ୍ସ୍ୟଜୀବୀଙ୍କ ପାଖରେ ରୁଣ୍ଡ ହୋଇ ଯାଇଥିଲେ । ତେବେ ମାଛଟି ବୁଦ୍ଧିଆ ପ୍ରଜାତିର ବୋଲି କିଛି ମତ୍ସ୍ୟଜୀବୀ ଅନୁମାନ କରି କହିଥିଲେ । ମାଛଟିକୁ ପୁନଶ୍ଚ ନଦୀରେ ଛାଡ଼ି ଦିଆ ଯାଇଥିବା ଜଣାପଡିଛି ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
