ରାୟଗଡ଼ା: ଜିଲ୍ଲାର ମଝିଘରିଆଣୀ ମନ୍ଦିର ପୋଲ ନିକଟରେ ସ୍କୁଟି ଓ ଟ୍ରକ ମଧ୍ୟରେ ମୁହାଁମୁହିଁ ଧକ୍କା ହୋଇଛି । ଏହି ଦୁର୍ଘଟଣାରେ ଜଣଙ୍କର ମୃତ୍ୟୁ ଘଟିଥିବାବେଳେ 3 ଜଣ ଆହତ ହୋଇଛନ୍ତି । ଏ ସମ୍ପର୍କରେ ଖବର ପାଇ ରାୟଗଡ଼ା ପୋଲିସ ଘଟଣାସ୍ଥଳରେ ପହଞ୍ଚି ଟ୍ରକ ଡ୍ରାଇଭରକୁ ଅଟକ ରଖି ଏକ ଅପମୃତ୍ୟୁ ମାମଲା ରୁଜୁ କରିଛି ।
ମୃତକ ଜଣକ ହେଉଛନ୍ତି ଜଣେ 5 ବର୍ଷର ଶିଶୁକନ୍ୟା ଇନ୍ଦୁ ତାଡ଼ିଙ୍ଗି । ତାଙ୍କ ଘର ରାୟଗଡ଼ା ବ୍ଲକ ବୈରାଗିହାଲୁଆ ପଞ୍ଚାୟତ ଅନ୍ତର୍ଗତ ଉମରବିଲି ଗ୍ରାମରେ । ଗ୍ରାମର ସନ୍ତୋଷ ତାଡ଼ିଙ୍ଗି ତାଙ୍କ ଝିଅ ଲିଜା ଓ ରାଇସିଂ ତାଡ଼ିଙ୍ଗିଙ୍କ ଝିଅ ଇନ୍ଦୁ ତାଡ଼ିଙ୍ଗିଙ୍କ ସହ ଚାନ୍ଦିଲି ଥାନା ଅନ୍ତର୍ଗତ ମାଲିଗାଁ ଆଶ୍ରମ ବିଦ୍ୟାଳୟକୁ ଏକ ସ୍କୁଟି (ଓଡି-୧୮-ସି-୫୬୨୬) ଯୋଗେ ଯାଉଥିଲେ । ସେଠାରୁ ନିଜ ଗାଁ ଉପରବିଲିକୁ ଫେରିବା ବେଳେ ମଝିଘରିଆଣୀ ପୋଲ ନିକଟରେ ଆନ୍ଧ୍ରପ୍ରଦେଶ ପଟରୁ ରାୟଗଡ଼ାକୁ ଫେରୁଥିବା ଟ୍ରକ (ଓଡି-୧୮-ଏ-୫୧୮୭) ମୁହାଁମୁହିଁ ଧକ୍କା ହୋଇଥିଲା ।
ଫଳରେ ଘଟଣାସ୍ଥଳରେ ସମସ୍ତ ୪ ଜଣ ଗୁରୁତର ଆହତ ହୋଇ ରାସ୍ତାରେ ପଡ଼ିଥିଲେ । ଏହାପରେ ସ୍ଥାନୀୟ ଲୋକେ ଏକ ଅଟୋ ଯୋଗେ ସମସ୍ତଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟକୁ ନେଇ ଭର୍ତ୍ତି କରିଥିଲେ । ସେଠାରେ ଚିକିତ୍ସା ବେଳେ ଡ଼ାକ୍ତର ଇନ୍ଦୁ ତାଡ଼ିଙ୍ଗିଙ୍କ ମୃତ୍ୟୁ ହୋଇଥିବା ସୂଚନା ଦେଇଥିଲେ । ଖବର ପାଇ ରାୟଗଡ଼ା ପୋଲିସ ଘଟଣାସ୍ଥଳରେ ପହଞ୍ଚି ଟ୍ରକ ଡ୍ରାଇଭରକୁ ଅଟକ ରଖି ଏକ ଅପମୃତ୍ୟୁ ମାମଲା ରୁଜୁ କରିବା ସହ ତଦନ୍ତ ଜାରି ରଖିଛି ।
ରାୟଗଡ଼ାରୁ ରଞ୍ଜନ କୁମାର ରଥ, ଇଟିଭି ଭାରତ
