ରାୟଗଡା: ଗୁଣୁପୁର ଉପଖଣ୍ଡର ପଦ୍ମପୁର, ଗୁଡାରୀ, ଦୁର୍ଗୀ, ଗୁଣୁପୁର, ମୁକୁନ୍ଦପୁର୍, ବିଷମ କଟକ ଏବଂ ପୋଡ଼ସି ଆନ୍ଧ୍ରର ବାତୀଲି ଥାନା ଅଞ୍ଚଳରେ ବିଭିନ୍ନ ସ୍ଥାନରେ ଚୋରୀ ଘଟଣାର ପର୍ଦ୍ଦାଫାସ ହୋଇଛି । ଆଜି(ଶନିବାର) ଗୁଣୁପୁର ଆଦର୍ଶ ଥାନାରେ ଏସମ୍ପର୍କରେ ଏକ ସାମ୍ବାଦିକ ସମ୍ମିଳନୀର ଆୟୋଜନ ହୋଇଥିଲା ।
ସୂଚନା ଅନୁଯାୟୀ ଗୁଡ଼ାରୀ ଥାନାରେ ୭/୧୦ /୨୧ ତାରିଖରେ କେ. ଶ୍ରୀନିବାସ ରାଓ ତାଙ୍କ ଦୋକାନରେ ଚୋରୀ ହୋଇଥିବା ନେଇ ଏତଲା ଦେଇଥିଲେ। ଏତଲାକୁ ଆଧାର କରି ପୋଲିସ ତଦନ୍ତ ଜାରି ରଖିଥିଲା । ଏକ ସି.ସି ଟିଭି ଫୁଟେଜ ଆଧାରରେ ଅନୁସନ୍ଧାନ କରି ପଦ୍ମପୁରର ରାଜୁ ସାହୁକୁ ଧରିବାରେ ପୋଲିସ ସଫଳ ହୋଇଛି ।
ରାଜୁ ପାଖରୁ ୧ ଲକ୍ଷ ୬୦ ହଜାର ଟଙ୍କା, ୬ଟି ମୋବାଇଲ ଫୋନ, ୨ଟି ମୋଟର ସାଇକେଲ ଏବଂ ଗୋଟିଏ ଲ୍ୟାପଟପ୍ ଯବତ୍ କରାଯାଇଛି । ଏଥିସହିତ ଚୋରୀ କରିବା ପାଇଁ ବ୍ୟବହୃତ ହେଉଥିବା ୨ଟି ଲୁହା କଟା ମେସିନ୍ ଯବତ୍ କରାଯାଇଛି। ରାଜୁ ନାଁରେ ରାୟଗଡା, ଗଜପତି ଏବଂ ଆନ୍ଧ୍ର ପ୍ରଦେଶର ଶ୍ରୀକାକୁଲମ, ବିଜୟନଗରମ ଜିଲ୍ଲାରେ ଅନେକ ମାମଲା ରହିଛି ।
ରାୟଗଡାରୁ ରଞ୍ଜନ କୁମାର ରଥ, ଇଟିଭି ଭାରତ
