ରାୟଗଡା: କୋଭିଡ-19 ମୁକାବିଲା ପାଇଁ ସ୍ବାସ୍ଥ୍ୟ ବିଭାଗର ଭାରତୀୟ ଆୟୁର୍ବିଜ୍ଞାନ ଅନୁସନ୍ଧାନ ପରିଷଦ (ଆଇସିଏମଆର) ଟିମ ଶନିବାରଠାରୁ ରାୟଗଡା ଜିଲ୍ଲାରେ ଆରମ୍ଭ କରିଛି ଅଭିଯାନ । ରବିବାର ଜିଲ୍ଲାର ବିଭିନ୍ନ ବ୍ଲକକୁ ଯାଇ ରକ୍ତ ନମୁନା ସଂଗ୍ରହ କରାଯାଇଛି । ଜିଲ୍ଲାର 10ଟି କ୍ଲଷ୍ଟରରୁ ଏହି ଟିମ 400 ରକ୍ତ ନମୁନା ସଂଗ୍ରହ କରି ଜିଲ୍ଲା ଚିକିତ୍ସାଳୟରେ ଜମା କରିଥିଲା । ସେଠାରେ ରକ୍ତରୁ ରକ୍ତ କଣିକାକୁ ବିଭାଜିତ କରି ଭୁବନେଶ୍ବର RMRCକୁ ପଠାଇ ଦିଆଯାଇଛି । ସଂଗୃହୀତ ରକ୍ତ ନମୁନାରେ ରୋଗ ପ୍ରତିଷେଧକ ଶକ୍ତିର ପରିମାଣ ସହ ଇମ୍ୟୁନୋଗ୍ଲୋବିନ୍-ଜି ଓ ଇମ୍ୟୁନୋଗ୍ଲୋବିନ୍ଏ-ମ୍ ରହିଛି କି ନାହିଁ ସେ ଦିଗରେ ଅନୁସନ୍ଧାନ କରିବ ପୁଣେସ୍ଥିତ ରାଷ୍ଟ୍ରୀୟ ମହାମାରୀ ବିଜ୍ଞାନ କେନ୍ଦ୍ର ।
ଭାରତର ବିଭିନ୍ନ ରାଜ୍ୟରେ ଦେଖା ଦେଇଥିବା କୋରୋନାର ସ୍ଥିତି, ଲକ୍ଷଣ ଓ ସଂକ୍ରମଣ ସଂପର୍କରେ ଅନୁସନ୍ଧାନ କରିବାକୁ ବିଶ୍ବ ସ୍ବାସ୍ଥ୍ୟ ସଂଗଠନ, ରାଷ୍ଟ୍ରୀୟ ରୋଗ ନିୟନ୍ତ୍ରଣ କେନ୍ଦ୍ର ସହଯୋଗରେ ଭାରତୀୟ ଆୟୁର୍ବିଜ୍ଞାନ ଅନୁସନ୍ଧାନ ପରିଷଦ ଗୋଷ୍ଠୀଭିତ୍ତିକ ରକ୍ତ କଣିକା ସର୍ବେକ୍ଷଣ ଆରମ୍ଭ କରିଛି । ପୁଣେସ୍ଥିତ ରାଷ୍ଟ୍ରୀୟ ମହାମାରୀ ବିଜ୍ଞାନ କେନ୍ଦ୍ର, ଚେନ୍ନାଇସ୍ଥିତ ରାଷ୍ଟ୍ରୀୟ ଯକ୍ଷ୍ମା ଗବେଷଣା କେନ୍ଦ୍ର ଏହାର ସଂଯୋଜନା କରୁଥିବା ବେଳେ 21ଟି ରାଜ୍ୟର 69 ଜିଲ୍ଲାରୁ 24 ହଜାର ବ୍ୟକ୍ତିଙ୍କ ନିକଟରୁ ନମୁନା ସଂଗ୍ରହ ହେବାର ଯୋଜନା ରହିଛି ।
ଭାରତର 21ଟି ରାଜ୍ୟର 69ଟି ଜିଲ୍ଲାରୁ ନମୁନା ସଂଗ୍ରହ ପାଇଁ ଆଇସିଏମଆର ନିଷ୍ପତ୍ତି ନେଇଥିବା ବେଳେ ତାଲିକାରେ ଓଡ଼ିଶାର 3ଟି ଜିଲ୍ଲା ଯଥା ରାୟଗଡ଼ା, କୋରାପୁଟ ଓ ଗଞ୍ଜାମ ରହିଛି । ସଂଗ୍ରହ ହୋଇଥିବା ରକ୍ତ ନମୁନା ପୁଣେସ୍ଥିତ ଜାତୀୟ ଭୂତାଣୁ ବୈଜ୍ଞାନିକ ଅଧ୍ୟୟନ ସଂସ୍ଥା (ଏନ୍ଆଇଭି) ଦ୍ବାରା ଗବେଷଣା କରାଯିବ । ପରୀକ୍ଷା ସମୟରେ କୋରୋନା ସଂସ୍ପର୍ଶରେ ଆସିଥବା ଏବଂ ନ ଆସିଥିବା ବ୍ୟକ୍ତିଙ୍କ ଦେହରେ କୋରୋନା ମୁକାବିଲା ପାଇଁ ରୋଗ ପ୍ରତିରୋଧକ ଶକ୍ତି କେତେ ରହିଛି ସେ ଦିଗରେ ବିଶେଷଜ୍ଞ ଟିମ ଅନୁଧ୍ୟାନ କରିବ । ଓଡ଼ିଶାରେ ଆକ୍ରାନ୍ତ 70 ପ୍ରତିଶତ ରୋଗୀଙ୍କ ନିକଟରେ କୋରୋନା ଲକ୍ଷଣ ନଥିବାରୁ ଏହି ପରୀକ୍ଷଣ ଲାଭଦାୟକ ହେବ ବୋଲି ଟିମ କର୍ତ୍ତୃପକ୍ଷ ସୂଚନା ଦେଇଛନ୍ତି ।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
