ରାୟଗଡା: ଗୁଣପୁର ମେଡ଼ିକାଲର ସ୍ତ୍ରୀ ରୋଗ ବିଶେଷଜ୍ଞଙ୍କ ସହ ୨ ଜଣ ଆଟେଣ୍ଡାଣ୍ଟ କରୋନାରେ ଆକ୍ରାନ୍ତ ହୋଇଛନ୍ତି । ବିଶେଷଜ୍ଞ ଓ ୨ ଆଟେଣ୍ଡାଣ୍ଟଙ୍କ ସ୍ବାବ ରିପୋର୍ଟ ପଜିଟିଭ ଆସିବା ପରେ ସଂକ୍ରମଣ ରୋକିବାକୁ ପ୍ରଶାସନ ପକ୍ଷରୁ ପଦକ୍ଷେପ ନିଆଯାଇଛି । ଉପଖଣ୍ଡ ଚିକିତ୍ସାଳୟ ବର୍ହି ବିଭାଗ ସହ ପ୍ରସୂତୀ କକ୍ଷକୁ ଆସନ୍ତା ୩ ଦିନ ପର୍ଯ୍ୟନ୍ତ ବନ୍ଦ କରି ଦିଆଯାଇଛି ।
ଜିଲ୍ଲାପାଳ ପ୍ରମୋଦ କୁମାର ବେହେରା ଗୁଣପୁର ଉପଖଣ୍ଡ ଚିକିତ୍ସାଳୟ ପରିଦର୍ଶନ କରି ସ୍ଥିତି ସମୀକ୍ଷା କରିବା ସହ କେବଳ ଜରୁରୀ ଚିକିତ୍ସା ସେବା ଉପଲବ୍ଧ ରଖିବାକୁ ନିର୍ଦ୍ଦେଶ ଦେଇଛନ୍ତି । ବିଶେଷଜ୍ଞଙ୍କ ସମେତ ସଂକ୍ରମିତ ୨ ଆଟେଣ୍ଡାଣ୍ଟଙ୍କୁ ଜେକେପୁର କୋଭିଡ଼ ସ୍ବାସ୍ଥ୍ୟକେନ୍ଦ୍ରକୁ ସ୍ଥାନାନ୍ତର କରାଯାଇଛି । ସଂକ୍ରମିତଙ୍କ ସଂସ୍ପର୍ଶରେ ୪୦ରୁ ଉର୍ଦ୍ଧ୍ବ ଗର୍ଭବତୀ ଆସିଥିବାରୁ ରାପିଡ ରେସପନ୍ସ ଟିମ୍ ପକ୍ଷରୁ କଣ୍ଟାକ୍ଟ ଟ୍ରେସିଂ ଆରମ୍ଭ ହୋଇଛି ।
ପରିସ୍ଥିତି ଉପରେ ନଜର ରଖିବା ସହ ସମସ୍ତ ମେଡ଼ିକାଲ କର୍ମଚାରୀ ଏବଂ ସଂସ୍ପର୍ଶରେ ଆସିଥିବା ରୋଗୀ ଓ ସମ୍ପର୍କିୟଙ୍କ ସ୍ବାବ ସଂଗ୍ରହ ଆରମ୍ଭ ହୋଇଛି ।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
