ପୁରୀ: ଗୁଣ୍ଡିଚା ମନ୍ଦିରର ନାକ ଚଣା ଦ୍ବାରର ହେବ ସମ୍ପ୍ରସାରଣ କାର୍ଯ୍ୟ । ମହାପ୍ରଭୁଙ୍କ ପହଣ୍ଡି ବେଳେ ଆଗାମୀ ଦିନରେ ଯେଭଳି କୌଣସି ସମସ୍ୟା ନ ଉପୁଜେ ସେଥିପାଇଁ ନାକଚଣା ଦ୍ଵାର ହେବ ସମ୍ପ୍ରସାରଣ । ଏହି ନିଷ୍ପତ୍ତି ଶ୍ରୀମନ୍ଦିର ପ୍ରଶାସନ ନେବା ପରେ ଏହାକୁ ବିଭିନ୍ନ ମହଲରେ ବିରୋଧ ଆରମ୍ଭ ହୋଇଛି । ଗୁଣ୍ଡିଚା ମନ୍ଦିର ଭଳି ଏକ ଐତିହ୍ୟକୁ ସୁରକ୍ଷା ଦେବା ବଦଳରେ ନାକ ଚଣା ଦ୍ବାର ସମ୍ପ୍ରସାରଣ ଆଳରେ କୌଣସି ଭଙ୍ଗାରୁଜା କାର୍ଯ୍ୟ ହେଲେ ଦୃଢ ବିରୋଧ ହେବ ବୋଲି ଜଗନ୍ନାଥ ଭକ୍ତ ଓ ବିଭିନ୍ନ ବର୍ଗର ଲୋକେ ଚେତାବନୀ ଦେଇଛନ୍ତି ।
ନାକଚଣା ଦ୍ବାରର ସମ୍ପ୍ରସାରଣ କାର୍ଯ୍ୟ ନିଷ୍ପତ୍ତିକୁ ବିରୋଧ କରି ଜଗନ୍ନାଥ ଭକ୍ତ ଦିଲ୍ଲୀପ ବରାଳ କହିଚନ୍ତି ନାକଚଣା ଦ୍ଵାର ଶ୍ରୀମନ୍ଦିର ପ୍ରଶାସନ କରିନାହିଁ । ଏହା ଶହଶହ ବର୍ଷ ପୂର୍ବରୁ ରାଜା ମହାରାଜା ମାନେ ନିର୍ମାଣ କରିଛନ୍ତି । ସେହିପରି ମହାପ୍ରଭୁଙ୍କ ପହଣ୍ଡି ଆଜି କି କାଲି ଆରମ୍ଭ ହୋଇନାହିଁ । ଏଣୁ ନାକଚଣା ଦ୍ବାରରେ ପହଣ୍ଡି ବେଳେ ଅସୁବିଧା କେତେବେଳେ ହେଲା ବୋଲି ପ୍ରଶ୍ନ କରିଛନ୍ତି । ରାଜ୍ୟ ସରକାରଙ୍କ ଅର୍ଥକୁ କିଛି ଅସାଧୁ ଅଧିକାରୀ ଚଳୁ କରିବା ଉଦ୍ଦେଶ୍ୟରେ ନାକଚଣା ଦ୍ଵାର ସମ୍ପ୍ରସାରଣ କାର୍ଯ୍ୟ କରିବା ପାଇଁ ଉଦ୍ୟମ ଆରମ୍ଭ କରୁଛନ୍ତି । ନାକଚଣା ଦ୍ବାରରେ କୌଣସି ଭଙ୍ଗାରୁଜା ହେଲେ ସେ ଏହା ବିରୋଧରେ କୋର୍ଟର ଦ୍ଵାରସ୍ଥ ହେବେ ବୋଲି ଚେତାବନୀ ଦେଇଛନ୍ତି ଦିଲ୍ଲୀପ ବରାଳ।
ଅଧିକ ପଢନ୍ତୁ- ହାଇକୋର୍ଟଙ୍କ ନିର୍ଦ୍ଦେଶ ପରେ ଆରମ୍ଭ ହେଲା ଶ୍ରୀମନ୍ଦିର ନାଟମଣ୍ଡପ ମରାମତି କାର୍ଯ୍ୟ
ସେପଟେ ଶ୍ରୀମନ୍ଦିର ପ୍ରଶାସନର ଏହି ନିଷ୍ପତ୍ତିକୁ କଡା ବିରୋଧ କରିଛି ଜଗନ୍ନାଥ ସେନା । ସେନାର ଆବାହକ ପ୍ରିୟ ଦର୍ଶନ ପଟ୍ଟନାୟକ କହିଛନ୍ତି, ‘ସୁପ୍ରିମକୋର୍ଟଙ୍କ ନିର୍ଦ୍ଦେଶ ରହିଛି କୌଣସି ଐତିହ କୀର୍ତ୍ତିରାଜି ଭଙ୍ଗା ଯାଇପାରିବ ନାହିଁ । ଏହାକୁ କେବଳ ସଂରକ୍ଷିତ ରଖାଯିବ । ଏଭଳି ନିଷ୍ପତ୍ତି ନେବାରୁ ଶ୍ରୀମନ୍ଦିର ପ୍ରଶାସନ କ୍ଷାନ୍ତ ରହୁ । ନ ହେଲେ ଜଗନ୍ନାଥ ସେନା କଡା ବିରୋଧ କରିବ । ସାରା ରାଜ୍ୟରେ ଆନ୍ଦୋଳନ ହେବ ।’ ସେହିପରି ଯୁବ ବିଜେପି ନେତା ଜୟନ୍ତ ଦାସ କହିଛନ୍ତି, ‘ଗୁଣ୍ଡିଚା ମନ୍ଦିର କାହାରି ବ୍ୟକ୍ତିଗତ ସମ୍ପତ୍ତି ନୁହେଁ । ଏହା ଆମ ଐତ୍ୟହ । ଏହାକୁ କିଏ ନଷ୍ଟ କରିବାକୁ ଚାହିଁବ । ଯଦି ଉଦ୍ୟମ କରନ୍ତିତ ନିଆଁ ଜଳିବ । ସାରା ରାଜ୍ୟରେ ବ୍ୟାପକ ଆନ୍ଦୋଳନ ହେବ । ଏଭଳି ନିଷ୍ପତ୍ତିରୁ ଶ୍ରୀମନ୍ଦିର ପ୍ରଶାସନ କ୍ଷାନ୍ତ ରହୁ ।’
ପୂର୍ବରୁ ଶ୍ରୀମନ୍ଦିର ପରିକ୍ରମା ପ୍ରକଳ୍ପ ଆଳରେ ସରକାର ବହୁ ପୁରାତନ ଐତିହ କୀର୍ତ୍ତିରାଜି, ମଠ ଉଚ୍ଛେଦକୁ ନେଇ ବ୍ୟାପକ ବିରୋଧ ହୋଇଥଲା । ପୁଣି ଗୁଣ୍ଡିଚା ମନ୍ଦିର ନାକଚଣା ଦ୍ବାର ସମ୍ପ୍ରସାରଣ ଆଳରେ ଏହାକୁ ଭଙ୍ଗା ଯିବା ନେଇ ଚର୍ଚ୍ଚା ଜୋର ଧରିଥିବା ବେଳେ ଏହାକୁ ନେଇ ପୁରୀରେ ବିରୋଧ ଆରମ୍ଭ ହୋଇଛି ।
ଇଟିଭି ଭାରତ, ପୁରୀ
