ପୁରୀ: ଶ୍ରୀମନ୍ଦିରରେ sop ପରିବର୍ତ୍ତନକୁ ଭକ୍ତଙ୍କ ମହଲରେ ସ୍ୱାଗତ । ପୂର୍ବ ଭଳି ରବିବାର ବି ମହାପ୍ରଭୁଙ୍କୁ ଦର୍ଶନ କରିପାରିବେ ଭକ୍ତ । ସବୁଠୁ ବଡ଼ କଥା ହେଉଛି କି ଏଣିକି ଆନନ୍ଦ ବଜାରରେ ଭକ୍ତମାନେ ବସି ମହାପ୍ରସାଦ ସେବନ ମଧ୍ୟ କରିପାରିବେ । 12 ତାରିଖ ଅର୍ଥାତ୍ ଶୁକ୍ରବାର ଠାରୁ ଏହି ନୂଆ ନିୟମ ଲାଗୁ ହେବ ।
ଅନ୍ୟପଟେ ଶନିବାର ରାତିରେ ବଡ଼ସିଂହାର ବେଶରେ ଚତୁର୍ଦ୍ଧାମୂର୍ତ୍ତିଙ୍କ ଦୁର୍ଲଭ ପଦ୍ମ ବେଶ ଅନୁଷ୍ଠିତ ହେବ । ପର ଦିନ ସକାଳ ଅବକାଶ ଯାଏଁ ପଦ୍ମ ବେଶ ଦର୍ଶନ କରିପାରିବେ ଭକ୍ତ । କୋଭିଡ କଟକଣା ପାଇଁ ମହାପ୍ରଭୁଙ୍କ ଦୁର୍ଲଭ ନାଗାର୍ଜୁନ ବେଶ ଦର୍ଶନରୁ ଭକ୍ତ ଚଳିତ ବର୍ଷ ବଞ୍ଚିତ ହୋଇ ଗଭୀର ଦୁଃଖ ପ୍ରକାଶ କରିଥିଲେ । ଏଥର କିନ୍ତୁ ମହାପ୍ରଭୁଙ୍କ ପଦ୍ମ ବେଶ ଦର୍ଶନ ନେଇ ରବିବାର ଦିନ ଥିବା କଟକଣା ହଟିବା ପରେ ଜଗନ୍ନାଥପ୍ରେମୀ ଅତ୍ୟନ୍ତ ଖୁସିବ୍ୟକ୍ତ କରିଛନ୍ତି । ଏଥିସହ ଶ୍ରୀମନ୍ଦିର ପ୍ରଶାସନକୁ ଧନ୍ୟବାଦ ଦେଇଛନ୍ତି ଭକ୍ତ । ସେହିପରି ଶ୍ରୀମନ୍ଦିରରେ ପାନଛେପ ପକାଇବା ନେଇ 1000 ଟଙ୍କା ଓ ପଲିଥିନ ବ୍ୟବହାର ଉପରେ 100 ଟଙ୍କା ଫାଇନ ବ୍ୟବସ୍ଥାକୁ ଭକ୍ତଙ୍କ ମହଲରେ ସ୍ୱାଗତ କରାଯାଇଛି ।
ସେପଟେ sop ପରିବର୍ତ୍ତନ ପରେ ଅନେକ ଶ୍ରଦ୍ଧାଳୁ ଶ୍ରୀମନ୍ଦିରକୁ ମହାପ୍ରଭୁଙ୍କ ଦର୍ଶନ ପାଇଁ ଆସିବାର ସମ୍ଭାବନା ରହିଛି । ଏଣୁ ଭିଡ଼ ନିୟନ୍ତ୍ରଣ ଓ କୌଣସି ଭକ୍ତ ଅସୁସ୍ଥ ହେଲେ କିଭଳି ସଙ୍ଗେ ସଙ୍ଗେ ପୋଲିସ ବାହିନୀ ସାହାଯ୍ୟ ଯୋଗାଇ ଦେବ, ସେନେଇ ଏକ ମକ ଡ୍ରିଲ କରାଯାଇଛି । ଏଥିସହ ମନ୍ଦିର ଭିତରେ ପକେଟ ମାର୍ ଉପରେ ନଜର ସମେତ ସମୁଦ୍ରକୂଳରେ ଅଧିକ ଲୋକଙ୍କ ସମାଗମକୁ ଦୃଷ୍ଟିରେ ରଖି ଅଧିକ ପୋଲିସ ମୁତୟନ କରାଯିବାର ବନ୍ଦୋବସ୍ତ କରାଯାଇଛି । ସେହିପରି ଟଙ୍କ ତୋରାଣୀ ନାଁରେ ଦହି ପାଣି ବିକ୍ରି ଉପରେ ମଧ୍ୟ ପୋଲିସ ଖୁବଶୀଘ୍ର ପଦକ୍ଷେପ ନେବ ବୋଲି କହିଛନ୍ତି ପୁରୀ ଏସପି କେ ବିଶାଳ ସିଂ । ତେବେ ଶ୍ରୀମନ୍ଦିର ପ୍ରବେଶବେଳେ ମାସ୍କ ଏବଂ ସାନିଟାଇଜ ବାଧ୍ୟତାମୂଳକ ରହିଛି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
