ପୁରୀ: ପୂର୍ବତନ ବାଚସ୍ପତି, ବରିଷ୍ଠ ବିଜେଡି ନେତା ମହେଶ୍ବର ମହାନ୍ତିଙ୍କ ବିୟୋଗ ପରେ, ପୁରୀ ସଦର ବିଧାନସଭା ନିର୍ବାଚନ ମଣ୍ଡଳୀରେ କିଏ ଧରିବ ବିଜୁ ଜନତା ଦଳର ମଙ୍ଗ ତାକୁ ନେଇ ଜୋର ଧରିଛି ଚର୍ଚ୍ଚା । ଭେଟେରାନ ରାଜନେତା ମହେଶ୍ବର ମହାନ୍ତିଙ୍କ ଅବର୍ତ୍ତମାନରେ ତାଙ୍କ ବଡ଼ ପୁଅ ସୁନିଲ ମହାନ୍ତିଙ୍କୁ ସଦର ଆସନ ଦାୟିତ୍ଵ ଦିଆଯିବା ନେଇ ଶୁଣିବାକୁ ମିଳୁଛି । କାରଣ ପୂର୍ବରୁ ନଜିର ରହିଛି, ଯେତେବେଳେ ଦଳର କୌଣସି ତୁଙ୍ଗ ନେତାଙ୍କୁ ହରାଇଛି, ସେତେବେଳେ ବିଜେଡି ସୁପ୍ରିମୋ ନବୀନ ପଟ୍ଟନାୟକ, ଦିବଙ୍ଗତ ନେତାଙ୍କ ପରିବାର ଉପରେ ଭରସା କରିଛନ୍ତି । ନବୀନଙ୍କ ଏହି ଗେମ୍ ପ୍ଲାନ୍ ବାରମ୍ବାର ସଫଳ ମଧ୍ୟ ହୋଇଛି । ଏବେ ମହେଶ୍ବର ମହାନ୍ତିଙ୍କ ଅବର୍ତ୍ତମାନରେ ପୁରୀରେ ସମାନ ପ୍ରୟୋଗ କରିପାରନ୍ତି ନବୀନ?
ମହେଶ୍ବରଙ୍କ ଉତ୍ତରାଧିକାରୀ ବଡ଼ପୁଅ ସୁନିଲ !
ଗତ ଦୁଇ ବର୍ଷ ତଳେ ବଡ଼ ପୁଅ ସୁନିଲ ମହାନ୍ତିକୁ ଦଳରେ ସାମିଲ କରି, ନିଜର ଉତ୍ତରଧିକାରୀ କରିବା ନେଇ ଆଭାସ ଦେଇଥିଲେ ସ୍ବର୍ଗତ ମହେଶ୍ବର ମହାନ୍ତି । ସୁନିଲ ଏବେ ରାଜ୍ୟ ବିଜେଡିର ଉପ ସଭାପତି ଦାୟିତ୍ବ ତୁଲାଉଛନ୍ତି । କେବଳ ସେତିକି ନୁହେଁ, ବାପାଙ୍କ ଉତ୍ତରାଧିକାରୀ ହେବା ଆଶାରେ ସୁନିଲ ଗତ କିଛି ମାସ ହେଲା, ନିର୍ବାଚନ ମଣ୍ଡଳୀ ବୁଲି ଲୋକସମ୍ପର୍କ ସ୍ଥାପନ କରି ଚାଲିଛନ୍ତି । ପୁରୀରେ ବିଭିନ୍ନ ସାମାଜିକ ଏବଂ ସାଂସ୍କୃତିକ କାର୍ଯ୍ୟକ୍ରମରେ ନିଜକୁ ସାମିଲ କରି ଲୋକସମ୍ପର୍କ ବଢ଼ାଇବାରେ ଲାଗିଛନ୍ତି । ସୁନିଲଙ୍କ ସମର୍ଥନରେ ବାହାରିଛନ୍ତି, ମହେଶ୍ବରଙ୍କ ସମର୍ଥକ । ସେମାନେ ମଧ୍ୟ ସୁନିଲଙ୍କ ପ୍ରାର୍ଥୀତ୍ବକୁ ପୂର୍ଣ୍ଣ ସମର୍ଥନ କରୁଛନ୍ତି । ସୁନିଲ ଜଣେ ଉଚ୍ଚ ଶିକ୍ଷିତ ଯୁବକ ଏବଂ ସମାଜସେବୀ । ସୁନିଲଙ୍କୁ ଟିକେଟ ମିଳିଲେ, ପୁରୀରେ ପୁଣି ଥରେ ଶଙ୍ଖନାଦ ହେବ ବୋଲି ଆଶା ବାନ୍ଧିଛନ୍ତି ମହେଶ୍ବରଙ୍କ ସମର୍ଥକ ।
ଏବେ ବି ଅତୁଟ ରହିଛି ମହେଶ୍ବରଙ୍କ ଲୋକପ୍ରିୟତା
ସ୍ବର୍ଗତ ମହେଶ୍ବର ମହାନ୍ତି ଥିଲେ ଜଣେ ଦକ୍ଷ ରାଜନେତା ଏବଂ ବିଜେଡିର ସୁସଂଗଠକ । ତାଙ୍କର ପୁରୀ ସହର ସମେତ ସଦର ନିର୍ବାଚନ ମଣ୍ଡଳୀରେ ରହିଛି ବେଶ୍ ଲୋକପ୍ରିୟତା । ଗତ ୨୦୧୯ ନିର୍ବାଚନରେ ଦଳରେ ଥିବା କିଛି କର୍ମକର୍ତ୍ତାଙ୍କ ଅନ୍ତର୍ଘାତି କାର୍ଯ୍ୟ ଯୋଗୁଁ, ମହେଶ୍ବର ଅଳ୍ପ ଭୋଟ ବ୍ୟବଧାନରେ ବିଜେପି ପ୍ରାର୍ଥୀ ଜୟନ୍ତ ଷଡ଼ଙ୍ଗୀଙ୍କଠାରୁ ପରାସ୍ତ ହୋଇଥିଲେ । ତେବେ ୨୦୨୨ରେ ପଞ୍ଚାୟତ ଓ ଜିଲ୍ଲା ପରିଷଦ ନିର୍ବାଚନରେ ମହେଶ୍ବରଙ୍କ ନେତୃତ୍ବରେ ବିଜେଡି ଦମଦାର ପ୍ରଦର୍ଶନ କରିଥିଲା । ମହେଶ୍ବରଙ୍କ ମୃତ୍ୟୁ ପରେ ବି, ପୁରୀ ନିର୍ବାଚନ ମଣ୍ଡଳୀରେ ତାଙ୍କର ଲୋକପ୍ରିୟତା ଏବେ ବି ଅତୁଟ ରହିଛି ।
