ନୟାଗଡ: କୁକୁଡା ଫାର୍ମକୁ ନେଇ ତେଜୁଛି ଅସନ୍ତୋଷ । ଫାର୍ମ ମାଲିକ ଓ ଗ୍ରାମବାସୀ ମୁହାଁମୁହିଁ ପରିସ୍ଥିତିରେ । ଏମିତି ଏକ ଘଟଣା ଘଟିଛି ନୟାଗଡା ଜିଲ୍ଲା ରଣପୁର ତହସିଲ ବାଲିଆ ଗାଁରେ । ଗାଁରେ ଥିବା ସରକାରୀ ଜାଗା ଉପରେ କୁକୁଡ଼ା ଫାର୍ମ ହାଉସ କୁ ବିରୋଧ ନେଇ ଘଟିଛି ଏଭଳି ଘଟଣା ।
ଘଟଣା ଅନୁସାରେ ରଣପୁର ତହସିଲ ବାଲିଆ ଗାଁ ମଝିରେ ଥିବା କୁକୁଡ଼ା ଫାର୍ମ ଯୋଗୁଁ ପ୍ରଦୂଷଣ ବଢିବା ସହ ପ୍ରବଳ ଦୁର୍ଗନ୍ଧ ହେଉଛି । ଫଳରେ ଲୋକେ ବିଭିନ୍ନ ପ୍ରକାର ସମସ୍ୟା ଭୋଗୁଛନ୍ତି । ଦୁଇବର୍ଷ ତଳେ ଗାଁର ଗ୍ରାମବାସୀ ଜିଲ୍ଲାପାଳଙ୍କ ଅଭିଯୋଗ ପ୍ରକଷ୍ଠରେ ଅଭିଯୋଗ କରିଥିଲେ ।
ଜିଲାପାଳ ଅଭିଯୋଗ ଶୁଣି ରଣପୁର ତହସିଲଦାରଙ୍କୁ ଚିଠି ଲେଖି ଘଟଣାର ତଦନ୍ତ କରି ପଦକ୍ଷେପ ନେବାପାଇଁ ନିର୍ଦେଶ ଦେଇଥିଲେ । ହେଲେ ବିଡମ୍ବନା ହେଲା ସେତେବେଳେ ଯେଉଁ ତହସିଲଦାର ଥିଲେ ତାଙ୍କ ବଦଳି ଯୋଗୁଁ ନା ତଦନ୍ତ ହୋଇଥିଲା, ନା କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିଲା । ଫଳରେ ପୁଣି ଥରେ ଗ୍ରାମବାସୀ ଏକତ୍ରିତ ହୋଇ କୁକୁ଼ଡା ଫାର୍ମ ଉଚ୍ଛେଦ ଦାବିରେ ତହସିଲ ଅଫିସ ଆଗରେ ଧାରଣ ଦେଇଥିଲେ।
ତହସିଲଦାର ଗ୍ରାମବାସୀଙ୍କ ଅଭିଯୋଗ ଶୁଣିବା ସହ କାର୍ଯ୍ୟାନୁଷ୍ଠାନ ନେବାସହ କୁକୁଡା ଫାର୍ମକୁ ଉଚ୍ଛେଦ କରିବେ ବୋଲି ଲିଖିତ ପ୍ରତିଶୃତି ଦେବା ପରେ ଧାରଣରୁ ଉଠିଥିଲେ ଗ୍ରାମବାସୀ ।
ନୟାଗଡରୁ ଉତ୍ପଳ ସାହୁ, ଇଟିଭି ଭାରତ
