ନୟାଗଡ଼: ଜୀବନରେ ଦୁଃଖ କେତେବେଳେ ଆସିବ ତାହା କାହାକୁ ବି ଜଣାନଥାଏ । ଆଉ ଚିକିତ୍ସାରେ ଯେବେ ଅର୍ଥ ବାଧକ ସାଜେ ସେତେବେଳେ ଦୁଃଖ ଆହୁରି ବଢିଯାଏ । ଖେଳକୁଦ ବୟସରେ ଯକ୍ଷ୍ମା ରୋଗରେ ଆକ୍ରାନ୍ତ ହୋଇଛି ନୟାଗଡ ଜିଲ୍ଲା ନୂଆଗାଁ ବ୍ଲକ ଜାକେଡା ଗ୍ରାମର କୁନି ପୁଅ । ଯନ୍ତ୍ରଣାରେ ଛଟପଟ ହେଉଥିଲେ ବି ଚିକିତ୍ସା ପାଇଁ ଅର୍ଥ ସାଜିଛି ବାଧକ ।
ଯକ୍ଷ୍ମା ରୋଗ ଦେଉଛି ଅସହ୍ୟ ଯନ୍ତ୍ରଣା । ଚିକିତ୍ସା ପାଇଁ ଅର୍ଥ ସାଜିଛି ବାଧକ । ସରକାରୀ ଏବଂ ବେସରକାରୀ ସହାୟତା ଅପେକ୍ଷାରେ ପରିବାର । ପରିବାର ଲୋକେ ପୁଅର ଚିକିତ୍ସା ପାଇଁ ବିଭିନ୍ନ ମେଡିକାଲକୁ ଦୌଡି ଦୌଡି ନୟାନ୍ତ ହୋଇପଡିଲେଣି ହେଲେ କିଛି ସୁଫଳ ମିଳିପାରୁନି । ସମ୍ପୂର୍ଣ୍ଣ ଶରୀର ଶୁଖି ଯାଇଥିବା ବେଳେ କଥା ପଦେ କହିବାକୁ ଅକ୍ଷମ ହୋଇପଡିଛନ୍ତି ସେ ।
ନୂଆଗାଁ ବ୍ଲକ ଜାକେଡା ଗ୍ରାମର ସୁବାସ ପ୍ରଧାନଙ୍କ ପୁଅ ବିଶ୍ବ ରଞ୍ଜନ ପ୍ରଧାନ । ୩ ମାସ ହେଲା ଯକ୍ଷ୍ମା ରୋଗରେ ପୀଡିତ ହୋଇ ଯନ୍ତ୍ରଣାରେ ଛଟପଟ ହେଉଛନ୍ତି । ୩ ମାସ ତଳୁ ବିଶ୍ବଙ୍କୁ ଜ୍ବର ହେବାରୁ ତାଙ୍କୁ ପ୍ରଥମେ ନୂଆଗାଁ ପ୍ରାଥମିକ ସ୍ବାସ୍ଥ୍ୟକେନ୍ଦ୍ରରେ ଦେଖାଇଥିଲେ । ସେଠାରେ କିଛି ଇଞ୍ଜେକ୍ସନ ଏବଂ ଔଷଧ ଦିଆଯାଇଥିଲା । ହେଲେ ସ୍ବାସ୍ଥ୍ୟରେ କୌଣସି ଉନ୍ନତି ନଆସିବାରୁ କିଛି ଦିନ ପରେ ମହିପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ନେଇଥିଲେ l ସେଠାରେ ରକ୍ତ ପରୀକ୍ଷା କରିବା ପରେ ସବୁ ଠିକ୍ ଥିବା କହିଥିଲେ l ଦୁଇ ଦିନ ପରେ ପୁଣି ସ୍ବାସ୍ଥ୍ୟ ଖରାପ ହେବାରୁ ତାଙ୍କୁ ନୟାଗଡ ଜିଲ୍ଲା ମୁଖ୍ୟ ଚିକିତ୍ସାଳୟକୁ ପରିବାର ଲୋକ ନେଇଥିଲେ l ସେଠାରେ ପ୍ରାୟ ୧୦ ଦିନଧରି ଚିକିତ୍ସିତ ହେବା ପରେ ବିଶ୍ବଙ୍କର ସ୍ବାସ୍ଥ୍ୟ କ୍ଷେତ୍ରରେ ଉନ୍ନତି ଆସିବା ପରିବର୍ତ୍ତେ ଅବନତି ଘଟିଥିଲା । ଏହାପରେ ବିଶ୍ବଙ୍କୁ ତୁରନ୍ତ ଶିଶୁଭବନକୁ ପଠାଇ ଦିଆଯାଇଥିଲା । ସେଠାରେ ବିଶ୍ବଙ୍କର ସ୍ବାସ୍ଥ୍ୟ ପରୀକ୍ଷା କରିବା ପରେ ସେ ଯକ୍ଷ୍ମା ରୋଗରେ ପୀଡିତ ଥିବା କଥା ଜଣାପଡିଥିଲା ।
ଏହା ମଧ୍ୟ ପଢନ୍ତୁ: ନିଆରା ସଙ୍ଗୀତ ସାଧକ ନୃସିଂହନାଥ, ପ୍ରତିଭା ଆଗରେ ପ୍ରତିବନ୍ଧକ ସାଜିନି ଶାରୀରିକ ଅକ୍ଷମତା
ତେବେ ସେଠାରେ ପ୍ରାୟ ୧୮ ଦିନ ଚିକିତ୍ସିତ ହେବା ପରେ ଘରକୁ ପଳେଇ ଆସିଲେ । ପୁଣି ସ୍ବାସ୍ଥ୍ୟ ଖରାପ ହେବାରୁ ୮ ଦିନ ପରେ ଭୁବନେଶ୍ବରର ଏକ ହସ୍ପିଟାଲକୁ ନେଇଯାଇଥିଲେ । ସେଠାରେ ଚିକିତ୍ସିତ ହେବା ପରେ ମୁଣ୍ତରେ ପାଣି ଜମିଥିବା ସହ ଅପରେସନ କରିବା ପାଇଁ ହସ୍ପିଟାଲ କର୍ତ୍ତୃପକ୍ଷ କହିଥିଲେ । କିନ୍ତୁ ଶରୀରରେ ରକ୍ତ ଶୁଖିଯାଇଥିବା ହେତୁ ଅପରେସନ କରିବା ନିମନ୍ତେ ଡାକ୍ତର ମନା କରିଥିଲେ । ହସ୍ପିଟାଲରେ ଆଉ କିଛି ଦିନ ଚିକିତ୍ସା କରାଇବା ପାଇଁ ବିଶ୍ବଙ୍କ ବାପା କହିଥିଲେ ସୁଦ୍ଧା ବିଶ୍ବଙ୍କୁ ଘରକୁ ନେଇଯିବା ପାଇଁ କହିବାରୁ ସେ ଘରକୁ ଚାଲି ଆସିଥିଲେ । ତେବେ ପ୍ରାୟ ୮ ଦିନ ହେଲା ବିଶ୍ବ ହସ୍ପିଟାଲରୁ ଆସି ଘରେ ପଡିଥିବା ବେଳେ ଏଠାରେ କୌଣସି ପ୍ରକାରର ଚିକିତ୍ସା ସେବା ମିଳିପାରୁନାହିଁ ।
ବିଶ୍ବଙ୍କ ଶରୀର ସମ୍ପୂର୍ଣ୍ଣ ଭାବେ ଶୁଖି ଯାଇଥିବା ବେଳେ ଗୋଟିଏ ଜାଗାରୁ ଅନ୍ୟ ଜାଗାକୁ ଯିବା ପାଇଁ ଅନ୍ୟ ଲୋକର ସହଯୋଗ ଆବଶ୍ୟକତା ପଡୁଛି । ପ୍ରାୟ ୨ ବର୍ଷ ହେଲା ବିଶ୍ବଙ୍କ ମାଆ ଆରପାରିକୁ ଚାଲିଯାଇଥିବା ବେଳେ ଘରେ ବିଶ୍ବଙ୍କ ସେବା କରିବା ପାଇଁ ବାପା ଏବଂ ଛୋଟ ଛୋଟ ଦୁଇ ଭଉଣୀ ଅଛନ୍ତି । ବଡ ଭଉଣୀ ନବମ ଏବଂ ସାନ ଭଉଣୀ ଚତୁର୍ଥ ଶ୍ରେଣୀରେ ପାଠ ପଢୁଛନ୍ତି । ବିଶ୍ବଙ୍କ ବାପା ଚାଷ କାମ କରି ପରିବାର ଚଳାଉଥିବା ବେଳେ ଏ ହସ୍ପିଟାଲରୁ ସେ ହସ୍ପିଟାଲକୁ ଦୌଡି ଦୌଡି ୩ ମାସ ହେଲା ନିଜ କାମ ବି କରିପାରୁନାହାଁନ୍ତି। ଏଭଳି ପରିସ୍ଥିତିରେ ପୁଅର ଚିକିତ୍ସା ପାଇଁ ହଜାର ହଜାର ଟଙ୍କା ଖର୍ଚ୍ଚ ହୋଇଯିବା ପରେ ବର୍ତମାନ ହସ୍ପିଟାଲକୁ ନେବା ପାଇଁ ପାଖରେ ଅର୍ଥ ନଥିବା ହେତୁ ନିଜ ମନରେ ସାହାସ ଜୁଟାଇ ପାରୁନାହାଁନ୍ତି । ଯଦି କୌଣସି ସରକାରୀ କିମ୍ବା ବେସରକାରୀ ସଂସ୍ଥା ଆର୍ଥିକ ସହଯୋଗ ମିଳିପାରେ ତାହାଲେ ପୁଅର ଚିକିତ୍ସା ହୋଇପାରିବ ।
ଇଟିଭି ଭାରତ, ନୟାଗଡ
