ନବରଙ୍ଗପୁର: ଚନ୍ଦାହାଣ୍ଡି ବ୍ଲକ ଦଲବେଡା ପଞ୍ଚାୟତର ଖୁଟୁଗୁଡା ବନ୍ଧପଡ଼ାର ଜନସାଧାରଣ ପାନୀୟଜଳ ଯନ୍ତ୍ରଣାରେ ହେଉଛନ୍ତି ଛଟପଟ । ଗାଁରେ ଥିବା ଦୁଇଟି ନଳକୂପ ମଧ୍ୟରୁ ଗୋଟିଏ ଦୀର୍ଘଦିନ ହେବ ଅଚଳ ହୋଇ ପଡିଥିବା ବେଳେ ଦୂରାବସ୍ଥାରେ ଅନ୍ୟ ଏକ ନଳକୂପ l ଘଣ୍ଟାଘଣ୍ଟା ସମୟ ବଳ ପ୍ରୟୋଗ କଲେ ବହୁ କଷ୍ଟରେ ପାଣି ବାହାରୁଥିବା ଦେଖିବାକୁ ମିଳିଛି l
ପାନୀୟଜଳ ଯନ୍ତ୍ରଣାରେ ଛଟପଟ ହେଉଥିବା ଖୁଟୁଗୁଡା ଗ୍ରାମବାସୀ ପାଣି ସମସ୍ୟାର ଦୂରୀକରଣ ପାଇଁ ପଞ୍ଚାୟତ ସମିତି ଦୌଡ଼ି ଦୌଡ଼ି ନୟାନ୍ତ ହେଲେଣି । ତଥାପି କେହି ଶୁଣୁ ନାହାନ୍ତି ଏମାନଙ୍କ ଗୁହାରୀ l ଏପରିକି ସ୍ଥାନୀୟ ସରପଞ୍ଚ ମଧ୍ୟ ଏହି ସମସ୍ୟା ପ୍ରତି ଧ୍ୟାନ ଦେଉନଥିବା ଅଭିଯୋଗ ହୋଇଛି । ତେବେ ବର୍ତ୍ତମାନ ଗୋଟିଏ ପଟେ ଲକଡାଉନ ଚାଲିଥିବା ବେଳେ ଅନ୍ୟପଟେ ପ୍ରଚଣ୍ଡ ଗ୍ରୀଷ୍ମ ପ୍ରବାହରେ ଜନସାଧାରଣ ନାହିଁ ନଥିବା କଷ୍ଟ ଭୋଗୁଛନ୍ତି । ପାଣିମୁନ୍ଦେ ପାଇଁ ପୋଖରୀ ଓ ନଦୀର ଗୋଳିଆ ଦୂଷିତ ପାଣିକୁ ବ୍ୟବହାର କରିବାକୁ ବାଧ୍ୟ ହେଉଛନ୍ତି ଗ୍ରାମବାସୀ ।
ଗାଁରେ ଅନ୍ୟାନ୍ୟ ସମସ୍ୟା ରହିଥିବା ବେଳେ ଜଳ ସମସ୍ୟାକୁ ନେଇ ବାରମ୍ବାର ଅଭିଯୋଗ ସତ୍ତ୍ବେ ମଧ୍ୟ କୌଣସି ସୁଫଳ ମିଳିନଥିବା ଦୁଃଖର ସହ କହିଛନ୍ତି ଗ୍ରାମବାସୀ । ବର୍ତ୍ତମାନ ସ୍ଥିତିରେ ଗ୍ରାମବାସୀ ପାଣି ପାଇଁ ଡହକ ବିକଳ ସହ ବହୁ ହନ୍ତସନ୍ତ ହେଉଛନ୍ତି l ତେବେ କେଉଁ ଦିନ ଖୁଟୁଗୁଡା ଗ୍ରାମବାସୀଙ୍କର ଏହି ଜଳ ସଙ୍କଟ ଦୂରହେବ ତାହା ଏବେ ଦେଖିବାକୁ ବାକି ରହିଲା ।
ନବରଙ୍ଗପୁରରୁ ତପନ କୁମାର ବିଷୋୟୀ, ଇଟିଭି ଭାରତ
