ଚିନ୍ତା ବଢାଉଛି ଗୁଜବ, ଚିକେନ ବ୍ୟବସାୟରୁ ମୁହଁ ଫେରାଉଛନ୍ତି ଚାଷୀ

ସଙ୍କଟରେ ଚିକେନ ବ୍ୟବସାୟ । କେତେବେଳେ ଗୁଜବ ତ ଆଉ କେତେବେଳେ ବାର୍ଡ ଫ୍ଲୁ ଆତଙ୍କ ଭିତରେ ପେଷି ହୋଇଯାଇଛି ବ୍ୟବସାୟ । କୁକୁଡ଼ା ବ୍ୟବସାୟ କରି ରୋଜଗାରର ପନ୍ଥା ଆପଣେଇଥିବା ଲୋକଙ୍କ ପାଇଁ ବର୍ତ୍ତମାନ ନିଜ ବ୍ୟବସାୟର ସ୍ଥିତିକୁ ନେଇ ଚିନ୍ତାରେ ।

ନବରଙ୍ଗପୁର: ସଙ୍କଟରେ ଚିକେନ ବ୍ୟବସାୟ । ଚିକେନରୁ ବ୍ୟାପୁଛି କୋରୋନା । କେତେବେଳେ ଗୁଜବ ତ ଆଉ କେତେବେଳେ ବାର୍ଡ ଫ୍ଲୁ ଆତଙ୍କ ଭିତରେ ପେଷି ହେଉଛନ୍ତି ନବରଙ୍ଗପୁର ଚିକେନ ବ୍ୟବସାୟୀ । ମାଂସ ଭିତରେ ସାଧାରଣତଃ ଲୋକେ ଚିକେନ ଖାଇବାକୁ ବେଶ ପସନ୍ଦ କରୁଥିଲେ । କିନ୍ତୁ ଗୁଜବରେ ଲୋକେ ଆତଙ୍କିତ ହୋଇ ଚିକେନ ଖାଇବା ଛାଡି ଦେଇଛନ୍ତି । କୋରୋନାର ଭୟାବହତା ଭିତରେ ଲକଡାଉନ ହେତୁ କୁକୁଡ଼ା ବ୍ୟବସାୟରେ ମାନ୍ଦାବସ୍ତା ଦେଖାଦେଇଥିଲା । କୁକୁଡା ବ୍ୟବସାୟୀ ବାଧ୍ୟ ହୋଇ କମ ଦାମ୍‌ରେ କୁକୁଡା ବିକ୍ରି କରୁଥିଲେ ତ ଅନ୍ୟ କେହି କୁକୁଡା ମାଗଣାରେ ବିକ୍ରି କରୁଥିଲେ । ପୁଣି କେହି କେହି କୁକୁଡାକୁ ବାହାରେ ଛାଡି ଦେଇଥିଲେ । କିଛି ମାସ ଯାଏଁ କୁକୁଡ଼ା ବ୍ୟବସାୟ ସମ୍ପୂର୍ଣ୍ଣ ବନ୍ଦ ହୋଇଯାଇଥିଲା । ଧୀରେ ଧୀରେ ଗୁଜବ ସନ୍ଦେହ ଦୂର ହେବା ପରେ କୁକୁଡ଼ା ବ୍ୟବସାୟ ଅଣ୍ଟା ସଳଖି ଛିଡା ହେବାର ସ୍ବପ୍ନ ଦେଖୁଥିବା ବେଳେ ପୁଣି ବାର୍ଡ ଫ୍ଲୁ ଆତଙ୍କ ଯୋଗୁଁ ବ୍ୟବସାୟ ଧିମେଇ ଯାଇଛି ।

ଗୋଟିଏ ପଟେ ଚିକେନ ବ୍ୟବସାୟର ଘୋର ମାନ୍ଦାବସ୍ଥା ଦେଖାଦେଇଥିବା ବେଳେ କିନ୍ତୁ ସରକାରଙ୍କ ତରଫରୁ ବ୍ୟବସାୟର ଉନ୍ନତି ପାଇଁ କୌଣସି ସଚେତନତା ମୂଳକ କାର୍ଯ୍ୟକ୍ରମ ପାଇଁ ପଦକ୍ଷେପ ନିଆଯାଉ ନଥିବା ଅଭିଯୋଗ ହୋଇଛି । ରାଜ୍ୟରେ ବର୍ତ୍ତମାନ ସୁଦ୍ଧା ବାର୍ଡ ଫ୍ଲୁ ର ମାମଲା ନଜରକୁ ଆସି ନଥିବା ବେଳେ ଯଦି ସରକାରୀ ସ୍ତରରେ ଲୋକଙ୍କୁ ଏଦିଗରେ ସଚେତନ କରାଯାଏ । ତେବେ ଲୋକଙ୍କ ମନରୁ ଭୟ ଦୂର କରାଯାଇପାରନ୍ତା । ଏବଂ ପୂର୍ବ ଭଳି ବ୍ୟବସାୟ ନିଜ ବେଗରେ ଚାଲିପାରନ୍ତା ।ଉପାନ୍ତ ଶିଳ୍ପ ବିହୀନ ନବରଙ୍ଗପୁର ଜିଲ୍ଲାରେ ଅନେକ ଲୋକେ ଋଣ କରି କୁକୁଡ଼ା ଫାର୍ମ କରି ଭଲ ଦି ପଇସା ରୋଜଗାର କରିବା ଆଶା ରଖିଥିବାବେଳେ ସେମାନେ ମୂଳରୁ ହିଁ ଭାଙ୍ଗିପଡିଛନ୍ତି । ଏଭଳି ସମୟରେ ଅନେକ ଏହି ବ୍ୟବସାୟରୁ ମୁହଁ ଫେରାଇବାକୁ ଉଚିତ ମଣୁଛନ୍ତି । ଏ ସମସ୍ୟା କେବେ ଦୂର ହେବ ତାକୁ ହିଁ ଅପେକ୍ଷା ।ନବରଙ୍ଗପୁରରୁ ତପନ କୁମାର ବିଷୋୟୀ, ଇଟିଭି ଭାରତ